‘சைக்கோ’ வெளியாகி அதிரடியாய் கவனம் பெற்றிருக்கிறது.மிஷ்கின், இளையராஜா, தன்வீர், உதயநிதி என அதிதீவிரமாகப் பாய்ச்சல் காட்டியிருந்தாலும் அதையும் மீறி வெளியே வந்தது சைக்கோ கேரக்டர்.

கொலைக்களத்தில் ஆவேசமும், இறுக்கமும் பதற்றமும் நிறைந்த இடத்தில் அசால்ட்டாக நடித்திருக்கிறார் ராஜ்குமார் பிச்சுமணி. ‘பயமுறுத்திட்டீங்க, நடுங்கிப்போயிட்டோம் சார்’ என அவர் முன் குவியும் டெடிகேட்களே குறையவில்லை. இதோ நம்முன் உட்கார்ந்து சைக்கோ அனுபவங்களை விவரிக்கிறார்:

சினிமா ரொம்பவும் பிடிச்சுப்போய் கன்னியாகுமரியிலிருந்து வந்திட்டேன். கொஞ்ச நாள் ஐடியில் வேலை பார்த்தேன். கௌதம் மேனனின். ‘நீதானே என் பொன்வசந்தத்’தில் ஜீவாவின் நண்பனாக வந்தேன்.

‘பிரியாணி’ல வந்துட்டுப் போனேன். அப்புறம்தான் ஒருநாள் போட்டோஸ் எடுத்துக்கிட்டு மிஷ்கின் சார் ஆபீஸ் வந்தேன். தட்டிட்டு கதவைத் திறந்தால் நடுநாயகமாக மிஷ்கின் உட்கார்ந்திருக்கார். உடனே கதவை மூடிட்டேன். கூப்பிட்டுப் பேசினார். ‘நான் நடிக்கத்தான் வந்தேன். ஆனால், உங்ககிட்டே உதவியாளராகச் சேரணும்’னு சொன்னேன்.

ஒண்ணுமே தெரியாமல் சினிமா ஆசையில் வந்தேன். ஆனால், எனக்கு ‘பதேர் பாஞ்சாலி’, குரோசவா படங்கள் போட்டுக் காட்டினார் மிஷ்கின். சினிமாங்கிறது கொஞ்சமாக புரிய ஆரம்பிச்சது. இதுக்கு மேலே எந்த இடத்தில் இப்படிக் கிடைக்கும்னு இங்கேயே இருந்திட்டேன்.

மறுநாள் அவரோட நண்பர் ஆண்டன் தாஸ் என்னை படமெடுத்து இவருக்கு அனுப்ப, ‘ஆண்டன், இவனை வெயிட்டிங்கில் வைச்சிருந்தேன். ‘கன்ஃபார்ம்’ பண்ணிட்டிங்க’னு சொன்னார். ஹீரோ மாறினாங்க. புரடியூசர் மாறினாங்க. ஆனால், நான் மாறவேயில்லை!

சினிமாவை விடுங்க, வாழ்க்கையை கத்துக் கொடுத்தார். ஒரு கோடி ரூபாய் வைச்சிருப்பார். பத்தாவது நாள் 100 ரூபாய் கூட பர்ஸில் இருக்காது. காசு இருக்கிறபோதும், இல்லாதபோதும் வித்தியாசமே தெரியாது.

வாழத்தெரிஞ்ச மனுஷன். நம்ம கூடவே இருக்கும்போது ‘என்ன... நம்மளை மாதிரி ஆள்தானே’னு திடீரென்று தோணும். அந்த இடத்திலிருந்து மறுநாள் ஒண்ணு பண்ணுவார். மறுபடியும் ‘அடேங்கப்பா, பெரிய ஆளு’ன்னு நினைக்க வைச்சிடுவார். எனக்கும் கம்பெனி குடுப்பார். மார்க்சிய அறிஞர் எஸ்.வி.ராஜதுரை வந்தாலும் மொழி, மார்க்சியம்னு நாலு மணி நேரம் பேசுவார்.

என் மனைவி சாய்லட்சுமி அழுதிட்டாங்க. தன் புருஷனுக்கு இப்படியெல்லாம் நடிக்கத் தெரியுமான்னு ஆச்சர்யப்பட்டு, அதை மக்கள் கொண்டாடுறதைப் பார்த்திட்டு அவங்களுக்கு அது கண்ணீரா உருமாறிப் போச்சு. ஒண்ணும் சாதிக்கலை. நான் மிஷ்கின் சார்கிட்டேதான் இருந்துகிட்டே இருக்கணும்னு நினைக்கிறேன். ‘டேய், நான் உன்னை பூமராங்கா விட்டுட்டேன்.

ஒரு சுற்றுப் போயிட்டு வா. குழந்தையா என்னையே சுத்திக்கிட்டு இருக்காதே. ஒரு நாள் உக்காந்து அடுத்த திட்டத்தைப் பேசுவோம். உனக்கு ஓர் அடையாளம் கொடுத்தாச்சே. புதுப்பயணமா புறப்படு’னு சொன்னார்.