சினிமாவுக்கு வந்து வருஷம் இருபதை நெருங்குகிறது. ஆனால், இன்னமும் அம்மாவின் கஸ்டடியில்தான் இருக்கிறாராம் அந்த நடிகை.

வில்லனாக இருந்து காமெடி வில்லனானவர் அவர். படப்பிடிப்பு யூனிட்களில் அவரது அடாவடி ராவடி பற்றியே பேச்சாக இருக்கிறது.

விக் பயன்படுத்தும் அவர், தான் நடிக்கும் படங்களில் தனக்கான விக்கை, தானே ரெடி பண்ணிக் கொள்வதாக முரண்டு பிடிக்கிறாராம். வெறும் சில ஆயிரங்களில் உள்ள விக்கிற்கு, ‘இதை மலேசியாவில்தான் ரெடி பண்ண முடியும்...’ என்று சொல்லி அரை லகரத்திற்கு மேல் பில் நீட்டுகிறாராம்.

கையில் ஒருசில படங்கள் வைத்திருந்தாலும், நடித்து முடித்த படங்களின் புரொமோஷனுக்கு வராமல் முரண்டு பிடிக்கும் லிஸ்ட்டில் சேர்ந்திருக்கிறார் ரெண்டு கோடி சம்பளம் வாங்கி வரும் ஹீரோ.

ஆறு மாதங்களுக்கு முன்பே ரெடியான ஒரு படத்தின் புரொமோஷனுக்கு ஹீரோவை வரச்சொல்லி தயாரிப்பு தரப்பு அழைத்து. அதை ஹீரோ அலட்சியம் செய்ய, கடுப்பானார் புரொட்யூசர். சொந்தக் காசில் படம் தயாரித்து வரும் அவருக்கு மீட்டர் வட்டி கட்ட வேண்டிய சிக்கல்கள் இல்லாததால், தயாரித்த படத்தை அவரும் கண்டுக்காமல் விட்டுவிட்டார். இப்போது கையில் பச்சைக்கொடியோடு திரிகிறார் ஹீரோ.