ஓவியர் ஷாம்லி! முகம் மறுமுகம்

அஜீத் ஃபேமிலியில் ஒரு ஓவியர் ரெடி. ஒரு காலத்தில் குழந்தை நட்சத்திரமாக தேசிய விருது வாங்கிய ஷாம்லி, பின்னர் ஹீரோயினாக சில படங்களில் சிறகடித்தார். அதன்பின், சிங்கப்பூரில் ஃபிலிம் மேக்கிங், லாஸ் ஏஞ்சல்ஸ் மற்றும் ஜெர்மனியில் வெஸ்டர்ன் டான்ஸ் கோர்ஸ் என பன்முகமாக மினுமினுத்தவர், இப்போது கையில் தூரிகை பிடிக்க ஆரம்பித்திருக்கிறார்!விதவிதமான ப்ரஷ்ஷும், கலர்ஃபுல் பெயிண்ட்ஸுமாக ஷாம்லி இப்போது பிசி.

‘‘அந்தப் படத்துல a girl in next door ரோல் பண்றேன். நல்ல கேரக்டர், நல்ல கதை. டோலிவுட்டிலும் பண்ணிட்டிருக்கேன்...’’ இப்படி சினிமாவைப்
பற்றிப் பேசிய ஷாம்லியின் பேச்சில் இன்று ஆச்சரிய மாற்றம். ‘‘ஆயில் பெயிண்டிங்கில் இருந்து அக்ரிலிக் பெயிண்டிங் வரை இப்போ அத்தனையும் வரைய வருது...’’ என கெத்தாக ஆரம்பிக்கும் ஷாம்லி, சமீபத்தில் பெங்களூருவில் நடந்த ஓவியக் கண்காட்சி ஒன்றில் தனது ஓவியங்களையும் வைத்து, வரவேற்பை அள்ளியிருக்கிறார்.

‘‘சின்ன வயசுல இருந்தே ஓவியம் வரையறதுல ஆர்வம். அப்ப நடிப்புல பிசியா இருந்தேன். தினமும் ஷூட் இருக்கும். படிப்பு பாதிக்காம பார்த்துக்கிட்டேன். அவுட்டோர்ல பிரேக் கிடைக்கிறப்ப பேப்பர், பென்சிலை எடுத்துக்கிட்டு ஏதாவது வரைவேன். மெல்ல மெல்ல இதுவே ஹாபியா மாறிச்சு! வளர்ந்து படிப்பு, நடிப்புனு டிராவல் பண்றப்ப என் அக்கா பெண் - ஆமா... அஜீத் சாரோட மகதான் - அனோஷ்கா, பிரபல ஓவியர் ஏ.வி.இளங்கோ சார்கிட்ட ஓவியம் கத்துக்க ஆரம்பிச்சா. இளங்கோ சார் பெயிண்டிங்ஸ் எனக்கு ரொம்பப் பிடிக்கும். தொன்மத்தையும் நவீனத்தையும் ஒருசேர அவர் ஓவியங்கள் பிரதிபலிக்கும்.

யதார்த்தமான மனித உணர்வுகளையும், உருவங்களையும் வரையறதுலதான் எனக்கும் ஆர்வம். அதனால அனோஷ்காவை டிராயிங் க்ளாஸுக்கு கூட்டிட்டுப் போய் வந்ததுல நானும் இளங்கோ சார் மாணவியாகிட்டேன்! அப்புறம், சிங்கப்பூருக்கு ஃபிலிம் மேக்கிங் கோர்ஸ் படிக்க போயிட்டேன். அங்கேயும் சரி, நியூ இயருக்காக ஜெர்மனிக்கும், சம்மருக்காக லாஸ் ஏஞ்சல்ஸுக்கு போனப்பவும் சரி... வெஸ்டர்ன் டான்ஸ் கத்துக்கிட்ட கையோடு அந்தந்த ஊர்ல இருந்த ஓவியக் கண்காட்சிகளுக்கும் போனேன்.

ஓவியம் வரைவது மட்டுமில்ல... அதைப் புரிஞ்சுக்கறதும் ஒரு கலைதான். வெளிநாடுகள்ல ஓவியங்களுக்கு கிடைக்கும் வரவேற்பும், மரியாதையும் தனி.
இதை நேர்ல பார்த்தப்ப எனக்குள்ள உத்வேகம் பிறந்தது. நாமும் நிறைய வரையணும்... இதே மாதிரி கண்காட்சி நடத்தணும்னு முடிவு செய்தேன்...’’ மலர்ச்சியுடன் சொல்லும் ஷாம்லி, ஆரம்பத்தில் சாதாரணமாகத்தான் ஸ்கெச்சிங் செய்ய ஆரம்பித்தாராம்.

‘‘ஓவியத்தின் பலமே கோடுகள்தான். கோடுகளின் தன்மை தெரிஞ்சாலே, கிரியேட்டிவ் மைண்ட் ஒர்க் ஆக ஆரம்பிச்சுடும். ஸ்கெச்சிங் தவிர வாட்டர் கலரிங், அக்ரிலிக்னு வெரைட்டியான ஃபார்ம்ஸ்ல வரைய ஆரம்பிச்சுட்டேன். என் ஒவ்வொரு ஓவியமும் அந்தந்த நேர மன ஓட்டத்தை
பிரதிபலிக்கும். அந்தந்த மூடுக்கான கலர்ஸையே பயன்படுத்துவேன். ஒரு பெயிண்டிங்குக்கு எத்தனை நாட்கள் ஆகும்னு சொல்ல முடியாது. அது நம் ஐடியாவைப்பொறுத்தது.  ரெண்டு நாள்லயும் முடிச்சிருக்கேன். மாசக்கணக்குலயும் வரைஞ்சிருக்கேன்.

மோனலிசா ஓவியம் முழுமை பெற 12 வருஷங்கள் ஆச்சுனு சொல்வாங்க. எப்படி செதுக்க செதுக்க சிற்பங்கள் புதுவடிவம் கொடுக்குமோ அப்படி டச் பண்ண டச் பண்ண ஓவியமும் மெருகேறும்.ஆக்சுவலா ஓவியம் வரைய ஆரம்பிச்சாலே கவனிக்கும் திறனும், கல்வித்திறனும் அதிகரிக்கும். இப்ப நிறைய வரைய ஆரம்பிச்சிருக்கேன். எப்பவும் பெயிண்ட்டும், ப்ரஷ்ஷுமா நான் இருக்கறதைப் பார்த்து எல்லாரும் ஆச்சர்யப்படறாங்க. பெண்களின் மறுபக்கத்தை ரியலிஸ்டிக் ஃபார்ம்ல வரைய பிடிக்கும்.