தயாரிப்பாளர்களின் ரத்தத்தை உறிஞ்சும் ஹீரோயின்ஸ்!

‘‘திரையைப் பார்க்க முடியாமல் இங்கே 450 படங்கள் முடங்கிக் கிடக்கின்றன. ஒரு படத்திற்கு இரண்டு கோடி என்றால் கூட ஆயிரம் கோடி ரூபாய்க்கு மேல் இப்படி முடங்கிக் கிடக்கிறது...’’ சமீபத்தில் இசைவெளியீட்டு விழா ஒன்றில் இயக்குநர் ஆர்.வி.உதயகுமார் சொன்ன அதிர்ச்சித் தகவல் இது. இன்னொரு புறம், ‘சினிமாவின் மொத்த வசூலே வெள்ளி, சனி, ஞாயிறு ஆகிய மூன்று நாட்களில்தான் அடங்கியிருக்கிறது.

நான்காவது நாளில் தியேட்டரிலிருந்து அந்தப் படத்தைத் தூக்கி விடுகிறார்கள்...’ என்ற எதார்த்தமும் தயாரிப்பாளர்களின் முகத்தில் அறைகிறது.தமிழ் சினிமா தயாரிப்பாளர்களின் நிலை இப்படி எல்லா பக்கங்களிலும் முள் பாதையாகவே இருக்கிறது.இதைக் குறித்து கவலையே படாமல் பல நடிகர், நடிகைகளும் டெக்னீஷியன்களும் ‘எக்ஸ்ட்ரா செலவுகளின் வழியே தயாரிப்பாளர்களை மேலும் மேலும் எப்படி சுரண்டலாம்’ என்றே கணக்கிடுவதாக கோடம்பாக்கம் குமுறுகிறது.

ஆமாம். உள்ளுக்குள்தான். யாரும் வாயைத் திறந்து இதைக் குறித்து பேசவே அஞ்சுகிறார்கள்.

என்னதான் நடக்கிறது கோடம்பாக்கத்தில்..?

‘‘டாப் டெக்னீஷியன் அவர். பாலிவுட் வரை ஒளிப்பதிவுக்கு பெயர் போனவர். திறமைசாலிதான். ஆனால், அவர் செய்யும் காரியங்கள்..? அவுட்டோர் ஷூட் என்றால் அவர் குறிப்பிடும் ஹோட்டலில்தான் ரூம் போட வேண்டும். இல்லையென்றால் ஸ்பாட்டுக்கு வர மாட்டார். தன் போனையும் ஸ்விட்ச் ஆஃப் செய்துவிடுவார்.

இவர் என்றில்லை... பெரும்பாலான நடிகர் நடிகைகளும் டெக்னீஷியன்களும் இப்படித்தான் இருக்கிறார்கள்...’’ என தன் மொபைலை சைலன்ட் மோடில் வைத்துவிட்டு ஆவேசத்துடன் பேசத் தொடங்கினார் அந்த பெயர் சொல்ல விரும்பாத தயாரிப்பாளர். ‘‘பொதுவாக டாப் ஸ்டார்ஸ் நடிக்கும் படங்களில் ஹீரோ, ஹீரோயினின் சாப்பாட்டு விஷயங்களை கவனிப்பதற்கு என்றே தனி ஆட்களை நியமிப்போம். அஜித், தமன்னா போன்றோர் தங்களுடனேயே சமையல் கலைஞர்களை வைத்திருக்கிறார்கள். அவர்களையே வெளியூர் படப்பிடிப்புகளுக்கு அழைத்து வந்து தங்கள் உடல்நலத்துக்கு ஏற்ப சமைத்துத் தரச் சொல்வார்கள்.

சென்னையில் படப்பிடிப்பு என்றால் சில ஹீரோக்கள் தங்கள் வீட்டிலிருந்தே தங்களுக்கான சாப்பாட்டை வரவழைத்து விடுவார்கள். ரஜினி, விஜய், விஜய் சேதுபதி உட்பட ஹீரோக்கள் பலரும் கேரவனுக்கு போகாமல் யூனிட்டினருடன் அமர்ந்து யூனிட் சாப்பாட்டையே சாப்பிடுகிறார்கள். சில இயக்குநர்கள் ரோட்டுக் கடையில் சூடாக ஒரு  டீ குடித்துவிட்டும் படப்பிடிப்புக்கு வருவார்கள். பல இயக்குநர்கள் வடபழனியில் உள்ள சாதாரண ஹோட்டலில் இருந்து சுடச்சுட இட்லியை வரவழைப்பார்கள்.

சூர்யாவுக்கு க்ரீமியான டீ பிடிக்காது. எனவே ஸ்பாட்டுக்கு பக்கத்தில் இருக்கும் சாதாரண டீக்கடையில் இருந்து தேநீர் வாங்கி வரச் சொல்வார். இப்படி ஹீரோக்கள், இயக்குநர்கள் பலரும் வறட்டு கவுரவம் பார்க்காமல், விரும்பியதை ஈகோ பார்க்காமல் கேட்டு வாங்கிச் சாப்பிடுகிறார்கள்.
எப்பொழுதாவது ஹீரோவாகவும், எப்பொழுதும் கேரக்டர் ரோலும் செய்பவர் அவர். மாடலிங், ஃபிட்ன்ஸிலும் ஆர்வம் உள்ளவர் என்பதால் கடும் டயட் கடைப்பிடிப்பார். ஒருவேளை மட்டும்தான் உண்பார்.