போலி வாக்காளர்கள்! ஷாக் ரிப்போர்ட்

நம் நாட்டில் எத் தனை பிரச்னைகள் இருந்தாலும் நாம் தலை நிமிர்ந்து சொல்லும் விஷயம் ஒன்று உண்டென்றால் அது வாக்குரிமைதான். எவ்வளவு மோசமான அரசியல்வாதிகள், கட்சிகள் இங்கு வந்தாலும் மக்கள் சக்தி ஐந்தாண்டுகளுக்கு ஒருமுறை வரும் தேர்தலில் அவர்கள் செயல்பாடுகளுக்கான பதிலைச் சொல்லிவிடும்.

மக்கள் நலனை மதிக்காமல் நாடாண்ட எத்தனையோ பெருந்தலைகளைக்கூட தயங்காமல் ஓரங்கட்டிய வரலாறு எல்லாம் இங்கு உண்டு. வாக்குரிமை எனும் சக்தி வாய்ந்த ஆயுதம் மக்களிடம் இருக்கும் பயத்தில்தான் பல அரசியல்வாதிகள் கொஞ்சமேனும் ஊருக்காக வேலை செய்கிறார்கள் அல்லது வேலை செய்வதுபோல பாவனையாவது செய்கிறார்கள்.

ஆனால், போலி வாக்காளர்கள் இந்தியாவில் அதிகரித்துக் கொண்டிருக்கிறார்கள் என்ற செய்தி ஜனநாயகத்தின் அஸ்திவாரத்தையே ஆட்டம் காணச் செய்வதாக உள்ளது. வாக்காளர் பட்டியலைச் சரி பார்ப்பதில் நிகழும் நடைமுறைக் கோளாறுகள், தவறுகளில் தொடங்கி அரசியல் கட்சிகளின் கோல்மால் வேலைகள் வரை பல காரணிகள் இத்தகைய போலி வாக்காளர்களை உருவாக்குகின்றன.