நடிகையாகவும் ஜெயிக்கும் ஸ்டெம்செல் விஞ்ஞானி!

அட சன் டிவியில் ஒளிபரப்பாகும் ‘நாயகி’ சீரியலின் கதாநாயகிதானே இவர்... ‘சைவம்’, ‘பசங்க 2’ படங்களிலும் நடித்திருக்கிறார் அல்லவா..?இங்கிருக்கும் புகைப்படங்களைப் பார்த்ததும் இப்படித்தான் சொல்லத் தோன்றும்.ஆனால், வித்யா பிரதீப் வெறும் நடிகை மட்டுமல்ல என்பதுதான் ஸ்பெஷல்!

யெஸ். படிப்பிலும் கெட்டிக்காரர். பயோ டெக்னாலஜியில் முதுகலைப்படிப்பும், ஸ்டெம்செல் பயாலஜியில் முனைவர் (பி.எச்.டி.) பட்டமும் வாங்கியிருப்பவர். சர்வதேச பத்திரிகைகளில் இவரது கட்டுரைகள் வெளியாகியிருக்கின்றன. சயின்டிஸ்ட் பாஸ்!

‘‘பூர்வீகம் கேரளா. அப்பா ஆர்மி ஆபீசர். அம்மா டீச்சர். ஒரேயொரு தங்கை. பெங்களூர்ல அப்பாவுக்கு போஸ்டிங் இருந்தப்பதான் பிறந்தேன். ரொம்ப கண்டிப்பான ஃபேமிலி. பெரியவங்க ஆச்சாரத்தை கடைப்பிடிக்கறவங்க. அவங்க முன்னாடி பெண்கள் கால் மேல கால் போட்டு அமர்ந்தா கண்டிப்பாங்க!படிப்புக்கு அதிக முக்கியத்துவம் கொடுப்பாங்க. அதனாலயே பயோ டெக்னாலஜில மாஸ்டர் டிகிரி முடிக்க முடிஞ்சது. எனக்கும் படிப்புல ஆர்வம். மகிழ்ச்சியோட ஸ்டெம்செல் பயாலஜில பி.எச்.டி முடிச்சேன்.

தொடர்ந்து படிப்புல கவனம் போனதால மன அழுத்தம் வந்துடுமோனு லேசா பயம் வந்தது. அதனாலயே ரிலாக்ஸுக்காக மாடலிங் பக்கம் வந்தேன். விளம்பரப் படங்கள்ல நடிக்க சான்ஸ் கிடைச்சது. அங்கிருந்து சினிமா ஆஃபர். ‘சைவம்’ பண்ணினேன்.

தொடக்கத்துல அப்பா கோபப்பட்டார். ‘உனக்குனு நல்ல ஜாப் இருக்கு. இதெல்லாம் தேவையா’னு கேட்டார். ஆனா, ஆர்மில அவர் இருந்ததால எனக்கான சுதந்திரத்தையும் கொடுத்தார். சரியான முடிவைத்தான் நான் எடுப்பேன்னு நம்பினார். நடிப்புல எனக்கு passion இருப்பதைப் புரிஞ்சுகிட்டார். இப்ப என் நடிப்பைப் பாராட்டறார்!’’ இமைகள் படபடக்க சொல்லும் வித்யா, ஒரு ஜூனியர் சயன்டிஸ்ட்.

‘‘பி.எச்.டி என் ஓர்க் இண்டர்நேஷனல் ஜெர்னல் ஆஃப் செல் தெரபில, ‘Invitro transdifferentiation of skin keratinocytes to corneal epithelial cells’ என்ற தலைப்புல பப்ளிஷ் ஆகியிருக்கு. ஸ்டெம்செல் பயோலஜில ஸ்பெஷலிஸ்ட்டா இருக்கிறதால இப்ப நான் ஜூனியர் சயன்டிஸ்ட். கண் தொடர்பான கார்னியல் சிகிச்சைக்கான ஸ்டெம்செல் கல்ச்சர் பண்ணிட்டிருக்கேன் (used for ocular surface reconstruction for the treatment of corneal blindness).

ரொம்ப பிடிச்ச வேலை, சூழல்னு அமைஞ்சிருக்கு. உண்மைலயே இது கொடுப்பினை. ஆபீஸ் ஓர்க் பாதிக்காத வகைலதான் படங்கள்ல நடிச்சிட்டிருக்கேன். இப்பவும் மலையாளம், தமிழ்ல ஹீரோயினா நடிக்கக் கேட்டு நிறைய ஆஃபர்ஸ் வருது. நிறைய நாட்கள் கால்ஷீட்ஸ் கொடுக்க வேண்டியிருக்கறதால சம்மதிக்காம இருக்கேன். படிப்பு, நடிப்பு ரெண்டையும் பேலன்ஸ் பண்ணறது சவால்தான். ஆனாலும் இரண்டிலும் நூறு சதவிகித உழைப்பைக் கொடுக்கணும்னு நினைக்கறேன்.

வேலையை இன்னும் ரிசைன் பண்ணல. கொஞ்ச நாட்களா ஆபீஸ் பக்கம் போக முடியலை. அலுவலகத்தை ரொம்ப மிஸ் பண்ணறேன். வாழ்க்கைல பெரும் பகுதியை படிப்புலதான் செலவிட்டிருக்கேன். அந்தக் கல்விதான் நல்ல பொசிஷனை கொடுத்திருக்கு...’’ கம்பீரமாக சொல்லும் வித்யா, இதுவரை 15 படங்களில் நடித்திருக்கிறார். சீரியலுக்கு வந்தது சமீபத்தில்தான்.

‘‘ஆனா, சினிமால எனக்குக் கிடைக்காத பெயரும் புகழும் ‘நாயகி’லதான் கிடைச்சிருக்கு! படங்கள்ல நடிச்சுட்டு இருந்தப்பவே சீரியல்ல நடிக்கச் சொல்லி கேட்டாங்க. போகணுமானு ஒரு யோசனை இருந்தது.இந்த நேரத்துலதான் விகடன் டெலிவிஸ்டாஸ்ல இருந்து ஆஃபர் வந்தது. டாப் புரொட்யூசர், டாப் டைரக்டர்னு நல்ல காம்பினேஷன் அமைஞ்சதால உடனே கமிட் ஆகிட்டேன்.

சமீபத்துல எங்கம்மாவுக்கு உடம்பு முடியாம போச்சு. ஆஸ்பிடல்ல அட்மிட் செய்திருந்தோம். அப்ப ‘ஆனந்தி... ஆனந்தி...’னு மெலிசா ஒரு குரல் கேட்டுக்கிட்டே இருந்துச்சு. அது ‘நாயகி’ல என் கேரக்டர் பேரு. யார் இப்படிக் கூப்பிடறாங்கனு திரும்பிப் பார்த்தா... பக்கத்து பெட்ல இருந்த பேஷண்ட். டிரிப்ஸ் ஏறிட்டிருக்கு. கை, கால்கள்ல கட்டோடு இருக்கார். அவர்தான் ‘ஆனந்தி’னு கூப்பிட்டார்!