ஃபேஷன் படிப்பில் சேர விண்ணப்பம் வாங்கவே பணம் இல்லை. வீட்டில் இருந்த தனது புத்தகங்களை விற்றுத்தான் ஃபேஷன் கல்லூரியில் விண்ணப்பம் வாங்கினார்.

அப்படிப்பட்டவர் இன்று வடிவமைக்கும் உடைகளை வாங்க வேண்டுமென்றால் சராசரியாக ஒரு வீட்டில் பணிபுரியும் மூவர், தங்கள் ஒரு மாத சம்பளத்தை அப்படியே தூக்கிக் கொடுக்க வேண்டும்!  அதுவும் மேல்தட்டு நடுத்தரக் குடும்பத்தின் வருமானமான ரூ.25,000 - ரூ.30,000 வரை இருந்தால்தான் ஒரு சாதாரண புடவையே வாங்க முடியும்!

இவ்வளவு பெருமைக்கும் சொந்தக்காரர், சப்யாசச்சி. கொல்கத்தாவிலுள்ள பெங்காலி குடும்பத்தில் மூத்த மகனாகப் பிறந்தவர் சப்யாசச்சி முகர்ஜி. ஒரே தங்கை இப்போது இவரது பிசினசை பார்த்துக்கொண்டிருக்கிறார். இதெல்லாம் இன்றைய நிலை. அன்று? வறுமைதான்.

திடீரென்று ஒருநாள் அப்பா சுகுமார் முகர்ஜிக்கு வேலை பறிபோனது. அரசு கல்லூரியில் கடைநிலை ஊழியராக பணியாற்றி வந்த அம்மா சொந்தியா முகர்ஜியின் வருமானத்தில்தான் மொத்தக் குடும்பமும் ஒரு வேளை பசியாறியது. உடுத்த சரியான ஆடைகளின்றி பல வருடங்கள் மொத்தக் குடும்பமும் திண்டாடியிருக்கிறது!