தல புராணம்

மெட்ராஸ் ரிக்கார்டு ஆபீஸ்

சென்னை எழும்பூர் ரயில்நிலையம் எல்லோருக்குமே தெரிந்த அடையாளம். ஆனால், இதன் எதிரே நூற்றாண்டைக் கடந்து அமைதியாக வீற்றிருக்கும் அந்தச் சிவப்பு வண்ண அலுவலகத்தைப் பார்த்திருப்போமா?

மரங்கள் சூழ அமைந்திருக்கும் மெட்ராஸ் ரிக்கார்டு ஆபீஸ் என ஆங்கிலேயர்களால் உருவாக்கப்பட்ட தமிழ்நாடு ஆவணக் காப்பகம் மற்றும் வரலாற்று ஆராய்ச்சித் துறைக்கு இப்போது வயது 109. ஆனால், உண்மையில் இது செயல்படத் துவங்கி முந்நூற்று ஐம்பது வருடங்கள் ஆகிவிட்டன! ஆம்; 1639ம் வருடம் ஆங்கிேலயர்கள் இங்கே காலூன்றியதில் இருந்தே எல்லா விஷயங்களையும் ஆவணப்படுத்தி வந்துள்ளனர்.

பூந்தமல்லியை ஆண்ட தமர்ல வெங்கடாத்ரி நாயக்கரிடம் இருந்து பிரான்சிஸ் டே மெட்ராஸைப் பெற்றபோது போட்ட ஒப்பந்தம், பின்னர் கம்பெனிக்கு அவர் எழுதிய கடிதங்களை, ‘Vestiges of old Madras’ நூலில் கர்னல் லவ் தந்துள்ளார். மட்டுமல்ல. ஆரம்பத்தில் நடந்த கொலைச் சம்பவங்களைக் கூட பதிவு செய்துள்ளனர்.

தவிர, 1680ம் வருடம் கோட்டையில் புனித மேரி ஆலயம் கட்டப்பட்டதும் பிறப்பு, இறப்பு, திருமண நிகழ்வுகளும் அங்கே பதிவு செய்யப்பட்டு பத்திரப்படுத்தப்பட்டன. இதிலிருந்து அன்று ஆவணங்களை எவ்வாறு பொக்கிஷமாகப் பேணிப் பாதுகாத்தனர் என்பதை அறியலாம்.

1672ம் வருடமே ஆவணங்களைப் பத்திரமாகப் பராமரிக்கும் முறை ஏற்பட்டது. கிழக்கிந்தியக் கம்பெனியின் தலைமையகம் முதன்முதலாக சர் வில்லியம் லாங்ஹோர்ன் என்பவரை மெட்ராஸ் கவர்னராக நியமித்தது. இவரே, அரசின் கடிதப் பரிவர்த்தனைகள், அறிக்கைகள் அனைத்தும் பாதுகாக்கப்பட வேண்டும் என வலியுறுத்தியவர்.

இதற்கிடையில் 1670ல் லண்டனிலுள்ள கிழக்கிந்தியக் கம்பெனியின் இயக்குநர்களிடம் இருந்து வரும் ஆலோசனைகளும், கடிதங்களும் மற்றும் இங்கிருந்து அங்கே அனுப்பப்படுபவைகளும் பாதுகாக்கப்பட்டு வந்தது குறிப்பிடத்தக்கது.இதன்பிறகு, வந்த ஸ்டேரேன்ஷாம் மாஸ்டர் காலத்தில் இன்னும் முன்னேற்றம் கண்டது. ஆவணங்கள் எல்லாம் கோட்டையிலிருந்த கவுன்சில் ஹவுஸில் பாதுகாக்கப்பட்டன.

18ம் நூற்றாண்டில் ஆவணங்கள் அதிகரிக்க இதற்கெனத் தனியிடமே தேவைப்பட்டது. 1803ம் வருடம் மெட்ராஸின் கவர்னராக வந்த லார்டு வில்லியம் பென்டிங்கின் காதுகளுக்கு இந்த விஷயம் எட்டியது. இதனால், 1805ம் வருடம் ஒவ்வொரு துறையிலிருந்தும் வரும் அனைத்து ஆவணங்களையும் ஒரு பொதுவான இடத்தில் வைத்து பராமரிக்கும்படி செய்தார்.