ஆங்கில மருந்துகளான, வயாகரா - பெனிகிரா போன்ற தயாரிப்புகளில் இருக்கக்கூடிய அதே கெமிக்கல். இரத்தக் குழாயை விரிவுபடுத்தி எழுச்சிக்காகக் கொடுக்கப்படுவது. அதைத்தான் இங்கே வரைமுறை இல்லாமல் சித்த மருந்துகளில் கலந்து கொண்டிருக்கின்றனர்.

அப்படி அந்த முறையில் தயாரிக்கப்பட்ட ஒரு சித்த மருந்தை சமீபத்தில் தடை செய்த விவகாரத்தை இதற்கு உதாரணமாகக் கொள்ளலாம். ஆனால், இங்கே யாருக்கும் தெரியாமல் கைப்பிடியளவு அள்ளிப் போட்டுக் கலந்து கொண்டிருக்கின்றனர்.

இந்தப் பயணத்தில் ஓய்வுபெற்ற அலோபதி அறுவை சிகிச்சை நிபுணரான பெண்மணி ஒருத்தரைச் சந்தித்தேன். அவரும்கூட அறியாமையில் தாடிச் சித்தர் ஒருத்தர் பரிந்துரைத்த மாத்திரைகளை உடல் குறைபாட்டிற்காகக் கடையில் வாங்கிப் பயன்படுத்தி அதிலிருந்து தப்பித்து ஓடி வந்திருக்கிறார்.

பொதுவாகவே சூரணம், லேகியம், தைலம், மாத்திரை, சிரப், கஷாயம், பஸ்பம், செந்தூரம் என மருந்துகளின் வகைகள் இருக்கின்றன. இதில் சூரணம் / கஷாயம் இவற்றில் மூலிகைகள் கலப்பதால், கலப்படம் வருவதற்கான வாய்ப்புகள் குறைவு என்றார் மருந்துத் தயாரிப்பாளர் ஒருத்தர்.

லேகியம், சிரப், பஸ்பம் போன்ற ரகங்களில் இது போலவான கலப்படங்கள் அதிகம் வருகின்றன என்கிறார்கள். மாத்திரைகளில் அளவுக்கதிகமாக வருகிறதாம்.

இது பற்றி தகவல்கள் தேடிய போது, அப்படியான தரவுகள் எதுவும் கிடைக்கவில்லை என்பதையும் இங்கு சொல்லியாக வேண்டும்.  சமீபத்தில் செய்தியொன்றைப் படித்தேன். கேரளாவில் மஞ்சள் காமாலை முற்றி ஒருத்தருடைய கல்லீரல் கடுமையாகப் பாதிக்கப்பட்டு விட்டது. அவர் குடிப்பழக்கம் கொண்டவரா என மருத்துவர்கள் விசாரித்திருக்கிறார்கள்.

அப்படி எதுவும் இல்லை. கடைசியில் அவர் இதுபோலத் தயாரிக்கப்பட்ட ஆயுர்வேத மருந்தொன்றினை தினமும் குடித்ததே கல்லீரல் கெட்டுப் போனதற்குக் காரணம் எனக் கண்டறிந்திருக்கிறார்கள்.