கல்வி அறிவை ஸ்மார்ட் போன்கள் அதிகரித்திருக்கிறதா?

நாள் முழுக்க இணையத்தில் உலவும் நாம் அதிலேயே மின்சாரம், போன் பில் என சகலமும் கட்டுகிறோம்; ஸ்மார்ட் போனிலேயே ‘தினகரன்’  நாளிதழை வாசிப்பதோடு படத்தையும் கூட பார்க்கிறோம். இதற்கு காரணம் வாங்கும் சக்தியா அல்லது கல்வியறிவா? இந்த வசதிகள் தங்கள்  ஆட்சியில் மக்களுக்குக் கிடைத்த கல்வியறிவால் சாத்தியமானது என அரசியல் கட்சிகள் சொன்னாலும் உண்மை அதுவல்ல என்பதை சைபர் மீடியா  ஆராய்ச்சி உடைத்து சொல்லியுள்ளது.

நம் தாத்தா, பாட்டி தலைமுறையினர் பலருக்கும் ஸ்மார்ட் போன்களை ஆன் செய்யவும், அழைப்பு வந்தால் பட்டன் அழுத்தி பேசவும், ஆஃப் செய்து  வைக்கவும் மட்டுமே தெரியும். மேலதிகமாக போன்களை பயன்படுத்தத் தெரியாவிட்டாலும் அவர்கள் போன்களை பயன்படுத்துகிறார்கள். இதனை  கல்வி அறிவென ஒப்புக் கொள்ளலாமா? ஒரே விஷயத்தை திரும்பத் திரும்ப செய்யும் பழக்கத்தால் அது இயல்பாக நம் மனதில் பதிவதை இதற்கு  காரணமாகக் கொள்ளலாம். இந்தியாவில் கேரளா, குஜராத், மகராஷ்டிரா, இமாச்சலப் பிரதேசம் ஆகியவை அதிக கல்வியறிவு கொண்ட மாநிலங்களாக  உள்ளன.

அதேசமயம் இங்கு ஸ்மார்ட் போன்களின் பரவலும் அதிகம். படிப்பில் 94 சதவிகித தேர்ச்சி காட்டும் கேரளாவில் போன்களின் வளர்ச்சி 62%. அதே  சமயம் 79 சதவிகித கல்வி விகிதம் கொண்ட குஜராத்தில் போன்களின் பரவல் விகிதம் 56%. தேசிய ஸ்மார்ட் போன்களின் பரவல் விகிதம் 42% என்ற  நிலையில் கல்வியில் முந்தும் மாநிலங்களான இமாச்சலப் பிரதேசம், மகாராஷ்டிரா ஆகிய மாநிலங்களில் ஸ்மார்ட் போன்களின் பரவல் விகிதம் 52%.  இம்மாநிலங்களில் கல்வி அறிவு என்பதை விட மக்களின் வாங்கும் சக்தியே ஸ்மார்ட் போன்களின் அதிகரிப்புக்குக் காரணம் எனலாம்.

கல்வி அறிவு குறைந்த மாநிலங்கள் பட்டியலில் இடம் பெற்றுள்ள பீகாரில் (61.8%), 27 சதவிகித ஸ்மார்ட் போன்கள் மட்டுமே செயல்பாட்டில் உள்ளன.  தேசிய கல்வி சராசரியை விட, மேற்கு வங்கம், கல்வி அறிவில் முந்தி 36 மாநிலங்களில் 20வது இடத்தைப் பிடித்துள்ளது. சாதாரண  போன்களிலிருந்து ஸ்மார்ட் போன்கள் வாங்க முக்கியக் காரணம், செல்போன் நிறுவனங்களின் மலிவு விலை இணைய பிளான்களும், வாங்கும்  பட்ஜெட்டில் கிடைக்கும் பல்வேறு வசதிகளைக் கொண்ட போன்களும்தான். ‘‘வேலைவாய்ப்புக்காக பல்வேறு மாநிலங்களுக்கு இடம்பெயர்ந்து வாழும்  மக்கள் உள்ள மாநிலங்களில் ஸ்மார்ட் போன் பரவல் குறைவாக உள்ளது.

இதில் மக்களின் வாங்கும் சக்தி யும் முக்கியக்காரணி...’’ என்கிறார் சைபர்மீடியா ஆராய்ச்சி நிறுவனத்தின் ஃபைஸல் கவூசா. இந்தியாவின் வடகிழக்குப்  பகுதிகளில் இன்றும் ஸ்மார்ட் போன்களின் விற்பனை, வளர்ச்சி குறைவாக உள்ளது. இப்போது இதனை அடையாளம் கண்டுகொண்ட போன் தயாரிப்பு  நிறுவனங்கள், அங்கு கவனம் குவித்துள்ளன. எனவே, ஸ்மார்ட் போன்களின் விற்பனையை வைத்து கல்வி அறிவில் நம் மாநிலம் அல்லது நம் நாடு  முன்னேறிவிட்டதாகக் கருத வேண்டாம்! இந்த இலக்கை எட்ட இன்னும் நாம் அதிக தொலைவு  பயணிக்க வேண்டும்.