நாமும் காதலும்

-ராஜா சந்திரசேகர்

நான் மூங்கில்
நீ தொடு
புல்லாங்குழலாகிறேன்.

மனதில்
தோட்டம் இருக்கிறது
மெளனம் பறிக்கலாம் வா.

ஒரு முறை
உன்னைப் பார்த்துவிட்டுப்
போக வேண்டும் என்று
காத்திருக்கிறேன்
நீயோ
நான் போனபின்தான்
வரவேண்டும் என்று
காத்திருக்கிறாய்.

மின்னல் வெட்டிய நேரத்தில்
அணைத்துக்கொண்டோம்
நமக்குள் இருந்த மின்னல்களைக்
கண்டுகொண்டோம்.

குறைவான சொற்களை
வைத்துக்கொண்டு
நெடுங்கவிதை
எழுத முடியாது
என்கிறேன் நான்
நெடும் பயணம்
போக முடியும்
என்கிறாய் நீ.

உன் உள்ளிருக்கும்
கண்ணீரில்
கரைய விரும்புகிறது
என் பிரார்த்தனை.

சந்திப்பும்
வலிதான்
பிரிவும்
வலிதான்
வலிகளைப்
பழகலாம் வா.

நம்மை அழைத்துச் செல்லும்
பாதைகளா இவைகள்
கேட்கிறாய் நீ
நம் கேள்விகளுக்கான
பதில்களும்தான்
சொல்கிறேன் நான்.

ரூமியின்
கவிதை போல
புன்னகைக்கிறாய்
எளிமையின்
கனவு போல
பார்க்கிறேன்.