என்பது நடராஜப் பெருமானுக்கு உரிய அபிஷேக நாட்களைக் குறிக்கின்ற வெண்பா பாடல் ஆகும். ஒரு வருடத்தில் ஆறு நாட்கள் நடராஜப் பெருமானுக்கு விசேஷமான முறையில் அபிஷேகம் செய்ய வேண்டிய நாட்கள் என இந்த பாடல் சொல்கிறது.

சித்திரை மாதத்தில் வருகின்ற திருவோண நட்சத்திர நாள், ஆனி மாதத்தில் வருகின்ற உத்திர நட்சத்திர நாள், ஆவணி, புரட்டாசி, மாசி ஆகிய மூன்று மாதங்களிலும் வளர்பிறை சதுர்த்தசி நாட்கள் மற்றும் மார்கழி மாதத்தில் வருகின்ற திருவாதிரை நட்சத்திர நாள் ஆகியவை நடராஜருக்கு திருமஞ்சனம் என்று அழைக்கப்படுகின்ற அபிஷேகத்தைச் செய்ய வேண்டிய நாட்கள் ஆகும்.

சிதம்பரம் நடராஜப்பெருமான் ஆலயத்தில் வருடத்திற்கு இரண்டு முறை பிரம்மோற்சவம் நடக்கும். மார்கழி மாதத்தில் வரும் திருவாதிரை நட்சத்திரத்தை மையமாகக் கொண்டு ஆருத்ரா தரிசனப் பெருவிழாவும், ஆனி மாதத்தில் வரும் உத்திர நட்சத்திரத்தை மையமாகக் கொண்டு ஆனித் திருமஞ்சனத் திருவிழாவும் ஒவ்வொரு வருடமும் நடைபெறும்.

இவ்விரு நாட்களிலும் நடராஜப்பெருமானுக்கு ஆயிரங்கால் மண்டபத்தில் விசேஷ அபிஷேகங்கள் நடைபெற்று அங்கிருந்து ஆடிக்கொண்டே கனகசபைக்குள் எழுந்தருளும் தரிசனக் காட்சியினைக் காண பல்லாயிரக்கணக்கான மக்கள் கூடியிருப்பர்.ஆனித்திருமஞ்சன நாள் அன்று சூரியன் மிதுன ராசியிலும் சூரியனின் நட்சத்திரமான உத்திரத்தில் அதாவது கன்னி ராசியில் சந்திரனும் சஞ்சரிப்பர். பஞ்சாங்கத்தை

நிர்ணயிக்கின்ற இவ்விரு கோள்களும் மிதுனம், கன்னி ராசிகளில் சஞ்சரிக்கும் நேரமே ஆனித்திருமஞ்சன நாள். மிதுனம், கன்னி ஆகிய இரண்டு ராசிகளுமே புதன் கிரஹத்தின் ஆளுமை பெற்ற ராசிகள். கல்விக்கு அதிபதி புதன். அதிலும் வானவியல் அறிவியல் அறிவினைத் தருவது புதன்.

ஆனித்திருமஞ்சன நாளில் நடராஜப்பெருமானை தரிசிக்க வானவியல் ஆய்வாளர்கள் நிறைய பேர் வருவதை நாம் இன்றும் காண முடியும். ஆனி மாதத்தில் வானம் தெள்ளத் தெளிவாகக் காட்சியளிக்கும். இதன் காரணமாகவே சென்னையில் அமைந்துள்ள பிர்லா கோளரங்கம், வேலூர் மாவட்டம், திருப்பத்தூர் அருகில் உள்ள ஆலங்காயம் உள்பட அனைத்து வானவியல் ஆய்வு மையங்களிலும் இந்த ஆனி மாதத்தில் ஆராய்ச்சியாளர்கள் ஓய்வின்றி செயல்படுவர்.

?கடந்த மாதம் எனது தந்தையார் கொரோனா பாதிப்பால் உயிரிழந்தார். அவருடைய உடலைக் கூட எங்களால் பார்க்க இயலவில்லை. குடும்பத்தில் உள்ளோர் அனைவருக்கும் நோய்தொற்று இருந்ததால் எந்த ஒரு சடங்கையும் செய்ய முடியவில்லை. அவர் உயிரிழந்த நேரத்தில் நானும் மருத்துவமனையில் சிகிச்சை பெற்று வந்ததால் அந்திமச்சடங்கு செய்ய இயலாமல் போய்விட்டது.

குடும்பத்தினர் அனைவரும் பரிபூரணமாக குணமடைய இன்னும் இரண்டு மாதங்கள் ஆகும் போல் தெரிகிறது. இந்தச் சூழலில் நான் எனது தந்தைக்கு உரிய ஈமச்சடங்கினை செய்வது எப்படி? இதுபோன்ற பிரச்சினையால் நாடு முழுவதும் நூற்றுக்கணக்கானோர் அவதிப்படுவதாக அறிகிறேன். இதனால் பித்ருதோஷம் உண்டாகுமா? சாஸ்திர முறைப்படி இதற்கான தீர்வுதான் என்ன?

தந்தைக்கு சரியான நேரத்தில் ஈமச்சடங்கினை செய்ய இயலவில்லையே என்ற உங்களின் ஆதங்கம் புரிகிறது. நீங்கள் குறிப்பிட்டிருப்பது போல் இந்த நேரத்தில் பலரும் இதுபோன்ற சூழலில் செய்வதறியாது திகைத்துக் கொண்டிருக்கிறார்கள் என்பது உண்மையே. இந்நிலையில் நிச்சயமாக பித்ருதோஷம் என்பது உண்டாகாது.

சாஸ்திரத்தில் இதற்கான விதிவிலக்கு என்பது உண்டு. கடும்வறட்சி, பஞ்சம், கடும்புயல், மழை, வெள்ளம் முதலான இயற்கை சீற்றங்கள், கொள்ளை நோய்கள் பரவுகின்ற காலம், அரசாங்க கட்டுப்பாடுகளினால் வெளியே செல்ல இயலாத நிலை போன்ற அசாதாரணமான சூழ்நிலையில் இறந்தவருக்கு உரிய இறுதிச்சடங்குகளை செய்வதற்கு சாஸ்திரமே விதிவிலக்கு அளிக்கிறது.

தற்போது நடந்துகொண்டிருப்பது என்பது கொரோனா என்னும் கொடிய நோய்த்தொற்று அதாவது கொள்ளைநோய் பரவுகின்ற காலமாக இருப்பதால் இந்த காலக்கட்டத்தில் இறப்பவர்களுக்கு நிதானமாகவே கர்மாவினைச் செய்து முடிக்கலாம். அதனால் எந்தவிதமான தோஷமும் வந்து சேராது. அதற்காக நீண்ட காலதாமதமும் கூடாது. நமது உடல்நிலையும் கால சூழலும் சாதகமாக இருக்கும் பட்சத்தில் தாமதிக்காது உடனடியாக அவர்களுக்கு செய்ய வேண்டிய சடங்குகளைச் செய்து முடித்துவிட வேண்டும்.

உங்கள் விவகாரத்தில் தந்தையின் உடலைக்கூட குடும்பத்தினர் யாரும் காண இயலவில்லை என்று எழுதியுள்ளீர்கள். குடும்பத்தில் உள்ள அனைவரும் குணமடைவதற்கு இன்னமும் இரண்டு மாதங்கள் ஆகும் என்றும் குறிப்பிட்டுள்ளீர்கள். எல்லோரும் பூரணமாக குணமடைந்ததும் காலதாமதம் செய்யாமல் உடனடியாக குடும்ப சாஸ்திரிகளிடம் தகவலைச் சொல்லி ஈமச்சடங்குகளை செய்ய வேண்டும்.

சம்ஸ்காரம் செய்வதில் துவங்கி இறுதி வரை அத்தனை சடங்குகளையும் செய்ய வேண்டும். அதாவது இறந்தவுடன் உடலுக்குச் செய்ய வேண்டிய அத்தனை சடங்குகளையும் அவசியம் செய்ய வேண்டும். உடல்தான் தற்போது இல்லையே என்ற ஐயம் வேண்டாம். தர்ப்பைப்புல்லில் கூர்ச்சம் கட்டி அதில் இறந்தவரை ஆவாஹனம் செய்வார்கள்.

அதற்குரிய அக்னி காரியங்களைச் செய்து அந்த கூர்ச்சத்தினை சவமாகக் கருதி அதனை நெருப்பில் இடுவார்கள். இதற்கு தர்ப்பை சம்ஸ்காரம் என்று பெயர். அதனைத் தொடர்ந்து எரிக்கப்பட்ட சாம்பலை நீர்நிலையில் கரைக்க வேண்டும். அஸ்தி கரைப்பது போல இந்த நிகழ்வு நடத்தப்படும். அதனைத் தொடர்ந்து கரும காரியங்கள் அத்தனையையும் முறைப்படி செய்து முடிக்க வேண்டும்.

மூன்று மாதங்கள் கழித்துச் செய்கிறோமே, இதனால் ஏதேனும் தோஷம் வந்து தாக்கிவிடுமோ என்ற அச்சம் தேவையில்லை. வேறு வழியின்றி காலதாமதம் ஆவதனால் எந்த தோஷமும் உண்டாகாது. அதே நேரத்தில் வேண்டுமென்றே காலதாமதம் செய்தால் நிச்சயமாக தோஷம் ஏற்படும் என்பதையும் நினைவில் கொள்ள வேண்டும். இந்த விதிமுறைகள் உங்களுக்கு மாத்திரமல்ல, உங்களைப் போல் கர்மாவினை உரிய நேரத்தில் செய்ய இயலாமல் தவிக்கும் அனைவருக்கும் பொருந்தும்.

ஒருவேளை தாய் அல்லது தந்தை இந்தியாவில் இறந்துபோய் கர்மாவினைச் செய்ய வேண்டிய மகன் வெளிநாட்டில் வசிப்பவராக இருந்து இங்கே வர இயலாமல் போயிருந்தால் அவர் வசிக்கும் நாட்டிலேயே தனது பெற்றோருக்குச் செய்ய வேண்டிய சடங்குகளை செய்யலாம். அவர் வசிக்கும் நாட்டிலேயே அதற்குரிய வசதி வாய்ப்புகள் இருந்தால் காலதாமதம் செய்யாமல் அந்த பகுதியில் வசிக்கும் புரோஹிதரை தொடர்பு கொண்டு அவரது ஆலோசனையின்படி சடங்குகளை முறையாகச் செய்து முடித்துவிட வேண்டும்.