அபிராமியைக் காணோம்!

மின்னுவதெல்லாம் பொன்தான்-8

1980களிலும் பெரும்பாலும் பாட்டும், சண்டையும், கொண்டாட்டமுமாக இருந்தது தமிழ் சினிமா.90களின் தொடக்கத்தில் தன்னைப் புதுப்பித்துக் கொண்டு புதிய முயற்சிகளை முன்னெடுத்தது.அதுநாள்வரை வசூல்ராஜாக்களாக இருந்த ஹீரோக்கள் தங்கள் இமேஜை தூக்கிக் கடாசி விட்டு கேரக்டர்களுக்கு முக்கியத்துவம் கொடுத்து நடிக்க ஆரம்பித்தார்கள்.

கமல்ஹாசன் தன்னுடைய தொடக்கக் காலத்திலிருந்தே இந்தப் பண்புகளோடு இருந்தவர்தான். ஆணழகரான அவர் ‘16 வயதினிலே’ படத்தில் ஏற்று நடித்த சப்பாணி கதாபாத்திரமே இதற்கு நல்ல உதாரணம்.‘அபூர்வ சகோதரர்கள்’, ‘மைக்கேல் மதனகாமராஜன்’ என்று பெரும் கமர்ஷியல் வெற்றிகளை குவித்த நிலையில் மீண்டும் அவர் தன்னை மீள்பரிசோதனை செய்துகொண்ட படம் ‘குணா’.