முடியாட்சிக்கு முடிவெழுதிய பெண்கள் போராட்டம்

சர்வதேச மகளிர் தினம் பெண்களுக்கான வாழ்த்துச் செய்தி மட்டுமல்ல. அது பெண்களின் போராட்டம் நிறைந்த ஒரு வரலாறு.

பெண்களுக்கான அனைத்து உரிமைகளும் நிறைந்த தாய்வழிச் சமூகம் நம்முடையது. நில உடமை சமூக அமைப்பு உருவானபோது ஆண்களுக்கும் பெண்களுக்கும் இடையே பணிப் பிரிவினை உருவானது. பெண்கள் சமூகம், வாரிசுகளுக்காகவும், குடும்ப அமைப்புக்காகவும் என்ற தோற்றம் மெல்ல மெல்ல உருவாகி பெண்கள் ஒடுக்கப்பட்ட நிலையில், 18ம் நூற்றாண்டின் தொடக்கத்தில் ஆயிரக் கணக்கான பெண்கள் ரஷ்யா, இத்தாலி, போலந்து போன்ற நாடுகளில் இருந்து, பணிக்கென நியூயார்க்கில் குடிபெயர்ந்து வாழும் சூழல் உருவானது. இடம் பெயர்ந்த பெண்கள் தொழிற்சாலை, அலுவலகம் உள்ளிட்ட இடங்களில் கால் பதிக்கத் தொடங்கினர். ஆண்களுக்கு நிகராக பெண்கள் பணியில் கால் பதித்தாலும் அவர்களுக்கான ஊதியத்தில் பாகுபாடு காட்டப்பட்டு, அநீதியும் இழைக்கப்பட்டது.

மணிக்கணக்கில் வேலை, குறைந்த ஊதியம், தையலுக்காகப் பயன்படுத்தும் ஊசி, நூல், உட்காரும் நாற்காலியில் தொடங்கி அனைத்துக்கும் வரி கட்ட வேண்டும் என ஆரம்பித்து, கழிவறையை அதிக நேரம் பயன்படுத்துவதற்கெல்லாம் அபராதம் விதிக்கத் தொடங்கிய அவலநிலையும் தொடர்ந்தது. தொழிலாளர் போராட்டம் என்பது ஆண்களை மையப்படுத்தியே இருந்த காலகட்டத்தில், பெண்கள் தங்கள் உரிமைக்காக தாங்களே களம்காண முடிவு செய்தனர்.

முதன் முதலில் நியூ இங்கிலாந்து பகுதியில், தையல் நிறுவனப் பெண்கள் இணைந்து வேலைநிறுத்தப் போராட்டத்தில் குதித்தனர். அதன் பிறகு பெண்கள் போராட்டம் பல இடங்களிலும் விரிவடையத் தொடங்கியது. இதன் பின்னணியில் உழைக்கும் பெண்கள் சங்கம் உருவானது. குறைந்த வேலை நேரம், உழைப்புக்கேற்ற கூலி, வாக்குரிமை போன்ற அடிப்படையான கோரிக்கைகளை முன்வைத்து 15 ஆயிரம் பெண்கள் அணி திரண்டு நியூயார்க் நகரத்தை ஸ்தம்பிக்க செய்தனர். இதில் உந்தப்பட்ட நடுத்தர மற்றும் மேல்தட்டு வர்க்கப் பெண்களும் தங்களை போராட்டத்தில் இணைத்துக்கொண்டனர்.