The Biology Of Belief

மனம் பேசும் நூல் 8

Bruce Lipton என்ற உயிரியல் ஆய்வாளர் எழுதிய புத்தகம் இது. மனித எண்ணங்களை வைத்து, ஆய்வாளர் ஒருவர் எழுதிய புத்தகம் இதுவென சொன்னால் உங்களால் நம்ப முடிகிறதா? ஆனால், இதுதான் உண்மை. நோய்கள் ஏற்பட காரணமாய் இருக்கும் அடிப்படை விஷயங்களை தன் புத்தகத்தில் இவர் கேள்விக்கு உட்படுத்தியுள்ளார்.மேலும், இந்தப் புத்தகத்தின் வழியாக அவர் சொல்வது, நம் எண்ணங்களின் வழியாக நோய்களையும் சரி செய்ய முடியும் என்பதே. 

“எண்ணம் போல் வாழ்க்கை” என்ற அடிப்படையில், மனிதர்கள் வாழ்வியலில் நடக்கும் சம்பவங்களை பார்க்கும்போது அல்லது மனிதர்கள் அவர்களின் அனுபவங்களைக் கூறும்போது, மேலிருக்கும் வரிகள் அவர்கள் வாழ்வில் சம்பந்தமில்லாமல் இருக்கிறதே என நமக்குத் தோன்றும். மனிதர்களின் எண்ணங்கள் நல்லதாய் இருந்தாலும், ஏன் நல்லவை நடப்பதில்லை என்கிற கேள்வியை எதிர்கொள்வதுதான், எண்ணங்கள் மீதே மனிதர்களுக்கு சந்தேகம் வரக் காரணமாக இருக்கிறது.

மருத்துவ அறிவியலின்படி, மனிதன் தன் குடும்ப உறுப்பினர்களின் உடலமைப்பிலும், குணாதிசயங்களிலும், உணர்வுகளிலும் ஒத்துப்போவது போல் இருப்பதை பார்த்திருப்போம். டார்வின் தியரிபடி உயிரினங்கள் இனப்பெருக்கம் செய்து, தனது குணாதிசயத்தில் சிலவற்றை அடுத்த தலைமுறைக்கு கடத்தும் முக்கிய பங்கை வகிக்கின்றன என்பதே.உளவியல் ரீதியாய் மனிதர்கள், இரண்டு விதங்களில் தங்களின் தாக்கத்தை பிரதிபலிக்கின்றனர். 

முதலாவது மரபணு ரீதியாய் ஒரு நபரின் உடல் அமைப்பிலும், குணாதிசயத்திலும், தங்கள் முன்னோர் செயல்களை வெளிப்படுத்துகின்றனர். இரண்டாவதாக, காலம் காலமாய் கடத்தப்படுகிற தகவல்கள் வழி, தாங்கள் நம்புவதை அப்படியே அடுத்த தலைமுறையினரிடம் கடத்துகின்றனர். உதாரணத்திற்கு, ஆண் மற்றும் பெண் குழந்தைகள் குறிப்பிட்ட கலாச்சாரம் மற்றும் பண்பாட்டின் வரையறைக்குள் வாழ வேண்டுமெனக் காலம் காலமாக கூறுவதைச் சொல்லலாம்.