உணவு சாப்பிடும் போது திகட்டாமல் இருக்கணும். அதே போல்தான் நாம் அணியும் நகைகளும் போர் அடிக்காமல் எல்லா விழாக்களுக்கும் அணியக்கூடியதாகவும் பாரம்பரியம் மாறாமல் இருக்க வேண்டும். அப்படிப்பட்ட நகைகளை கடந்த முப்பது ஆண்டுகளுக்கு மேலாக வடிவமைத்து விற்பனை செய்து வருகிறார் மீனு. 

தன் தந்தையுடன் இணைந்து இந்தத் தொழிலை துவங்கியதால் மீனு சுப்பையா என்று தன் பெயருடன் தந்தையின் பெயரையும் இணைத்து அதனை ஒரு பிராண்டாக அமைத்துள்ளார். சென்னை தி.நகரில் பல பிரபல நகைக்கடைகளுக்கு மத்தியில் இவரின் கடை அமைந்திருந்தாலும், இவரின் தனிப்பட்ட டிசைன் மற்றும் வடிவமைப்பிற்கு என வாடிக்கையாளர்கள் வட்டத்தினை சம்பாதித்துள்ளார். 

‘‘ஏழு வயசில் நகைக்கான மோகம் ஆரம்பமானது தான்னு சொல்லணும்’’ என்று பேச ஆரம்பித்தார் மீனு சுப்பையா. ‘‘எந்த ஒரு விழாவுக்கு போனாலும் நான் முதலில் பார்ப்பது அங்கு வந்திருப்பவர்கள் கழுத்தில், காதில் அணிந்திருக்கும் நகைகளைதான். எனக்கு நகைகளை அணிந்து கொள்ள வேண்டும் என்ற ஆசை எல்லாம் கிடையாது. 

அவர்கள் போட்டிருக்கும் டிசைன்களில் என்ன மாற்றம் செய்தால் அதை மேலும் மெருகேற்றலாம்னு சிந்திப்பேன். நான் யோசித்ததை கிரேயான் கொண்டு வரைந்தும் பார்ப்பேன். நான் வரைவதைப் பார்த்த என் பெற்றோர் ரொம்பவே ஆச்சரியப்பட்டாங்க. ஆனால், அப்பாதான் அதில் மறைந்திருந்த என் திறமையை கவனித்தார். 

‘‘என் மாமா அமெரிக்காவில் இருந்ததால், அங்குள்ள பல்கலைக்கழகத்தில் நகை வடிவமைப்பு குறித்து படித்தேன். அதைத் தொடர்ந்து வைரங்கள் குறித்தும் முழுமையாக கற்றுக் கொண்டேன். படிப்பு முடிச்ச கையோடு பிசினஸ் துவங்க முடிவு செய்தேன். நானும் அப்பாவும் இணைந்து ‘மீனு சுப்பையா’ பிராண்டினை அறிமுகம் செய்தோம். வீட்டில் சிறிய அளவில்தான் துவங்கினோம். 

நாங்க முழுக்க முழுக்க வைர நகைகள் விற்பனை செய்து வந்தோம். அப்போது, தங்க நகைகளைதான் மக்கள் வாங்கி வந்தார்கள். வைரம் தோஷம் என்று கருதி அதனை வாங்க மாட்டார்கள். நகைக் கடைகளிலும் வைர நகைகள் அதிகமாக இருக்காது. வைரம் குறித்த புரிதல் மக்கள் மத்தியில் இல்லை. நான் வரைம் குறித்து படிச்சிருந்ததால் நான் விற்பனை செய்யும் வைரங்களுக்கு நிறம் மற்றும் தெளிவு குறித்து சான்றிதழ் கொடுத்தேன்.  

சொல்லப்போனால் டிசைனர்கள் இல்லாத காலத்திலேயே நான் நகைகளை வடிவமைக்க ஆரம்பித்தேன். திருமணத்திற்குப் பிறகு என் கணவரும் என்னுடைய தொழிலில் இணைந்தார். அதன் பிறகு பிசினஸை விரிவுப்படுத்தினோம். நகைக் கடைகளுக்கு சான்றிதழுடன் வைரங்களை விற்பனை செய்தோம். 

காரைக்குடி, கோவையில் கிளைகளை துவங்கினோம். வெளிநாடுகளில் நடைபெறும் நகைக் கண்காட்சிகளில் பங்கு பெற ஆரம்பித்தோம். முப்பது வருடங்களுக்கு முன்பு வைரங்களை எப்படி வாங்கணும்னு பலருக்கு தெரியாது. அதற்கான ஆலோசனையும் வழங்கினோம்’’ என்றவர், தான் அணியும் நகைகள் எப்போதும் திகட்டாமல் காலத்திற்கும் நிலைத்திருக்கும் டிசைனாக இருக்க வேண்டும் என்பதில் இன்று வரை உறுதியாக இருந்து வருகிறார். 

‘‘பெட்டகம்... இது என்னுடைய டிரீம் பிராஜக்ட். முழுக்க முழுக்க செட்டிநாடு நகைகள் குறித்து ஆய்வுகள் செய்து அதை ஒரு அருங்காட்சியகமாக அமைத்திருக்கிறேன். நான் சின்ன வயசில் அப்பத்தா, அம்மா, அத்தை எல்லோரும் நகைகள் போட்டு பார்த்திருக்கேன். அந்த நகைகள் எல்லாம் தொய்வா இருக்கும். 

ஒட்டியாணம் கூட துணி போல் லேசாக இருக்கும். அவங்க திருமாங்கல்யம் வித்தியாசமா இருக்கும். அதை கழுத்துருன்னு சொல்வாங்க. அதில் 34 உருப்படிகள் இருக்கும். ஒவ்வொரு உருப்படிக்கும் ஒரு அர்த்தம் உண்டு. அதில் கை மாதிரி இருக்கும். முதலில் தாலி என்பதால் இருவரின் கையை இணைப்பது என்று நினைத்தேன். 

என்னைப் பொறுத்தவரை ஒரு நகையாக இருந்தாலும் அது காலத்துக்கும் நிலைத்திருக்கணும். அதில் நான் உறுதியாக இருக்கிறேன். அதனால்தான் பாரம்பரியம் மாறாமல் அதே சமயம் எல்லா காலங்களிலும் அணியக்கூடிய நகைகளை வடிவமைத்து தருகிறேன். என் மகளும் இந்த துறைக்குள் நுழைந்துள்ளார். 

அவரும் தனிப்பட்ட பிராண்ட் ஒன்றை அறிமுகம் செய்துள்ளார். வம்சம், விலாசம், மெனயாவினை சர்வதேச அளவில் கொண்டு செல்ல வேண்டும். இதில் மேலும் பல பாரம்பரிய நகைகளை அறிமுகம் செய்ய வேண்டும்’’ என்றார் மீனு சுப்பையா.