குறைந்த கட்டணத்தில் நிறைந்த பயிற்சி அளிக்க வேண்டும்!

கைவினைப் பொருட்கள் செய்ய தெரிந்திருந்தால் போதும்... அதையே ஒருதொழிலாக மாற்றி தொழில்முனைவோராக வலம் வரலாம். பொதுவாக பெண்களுக்கு இதுபோன்ற தொழில் மிகவும் வசதியானது மட்டுமில்லை, வீட்டில் இருந்தபடியே தங்களுக்கான ஒரு அடையாளத்தினை ஏற்படுத்திக் கொள்ள முடியும். அதைத்தான் சோஃபியா செய்துள்ளார். இவர் தனக்கு தெரிந்த அனைத்து கைவினைக் கலைகளையும் கொண்டு தொழில்முனைவோராக மாறியது மட்டுமில்லாமல் அதற்கான பயிற்சியும் அளித்து வருகிறார். 

‘‘எனக்கு சின்ன வயசில் இருந்தே கைவினைப் பொருட்கள் செய்வதில் அதிக ஈடுபாடு உண்டு. ஆனால், அதையே பிசினஸாக செய்யலாம் என்று கல்லூரியில் படிக்கும் போதுதான் எனக்கு அந்த எண்ணம் ஏற்பட்டது. கல்லூரியில் புடவை கட்டிக் கொண்டு போவது வழக்கம். ஆனால், அதற்கேற்ப ஒவ்வொரு உடைக்கும் அணிகலன்களை வாங்க முடியாது. அதனால் நானே என்னுடைய புடவைக்கான அணிகலன்களை டிசைன் செய்ய ஆரம்பித்தேன். 

அதைப் பார்த்து என் கல்லூரித் தோழிகள் கேட்க அவர்களுக்கும் செய்து கொடுத்தேன். முதலில் நட்பு அடிப்படையில் இலவசமாகத்தான் செய்து தந்தேன். ஆனால், தொடர்ந்து ஆர்டர் கொடுத்த போது அதற்கான விலையும் தருவதாக கூறினார்கள். டெரக்கோட்டா முதல் பட்டு நூல் என அனைத்திலும் அணிகலன்களை அவர்களின் உடையின் நிறத்திற்கு ஏற்ப டிசைன் செய்து கொடுத்து வந்தேன். அதன் பிறகு அதிகமாக ஆர்டர் கொடுத்த போது அதற்கான கட்டணத்தையும் கொடுத்தார்கள்.