கடந்த 2023ம் ஆண்டு மிக உயரமான எவரெஸ்ட் சிகரத்தை தொட்டு முத்தமிட்டு தன் சிகரம் தொடும் பயணத்தை தொடங்கிய முத்தமிழ்ச்செல்வி இந்த இரண்டு ஆண்டுகளில் 7 கண்டங்களில் உள்ள 7 உயரமான மலை சிகரங்களை ஏறி சாதனைப் படைத்துள்ளார். 

உலகின் மிக உயரமான சிகரங்களைத் தொட்ட முதல் தமிழ்ப்பெண் என்ற பெருமையும் பெற்றுள்ளார். விருதுநகர் மாவட்டம், ஜோகில்பட்டியை சேர்ந்த இவர், ஜப்பானிய மொழிப்பெயர்ப்பாளராகவும் ஆசிரியராகவும் பணியாற்றுகிறார். மலையேறும் சாகசங்களில் ஆர்வம் கொண்டதால் தொடர்ந்து சாதனைகளை செய்து, தன் வெற்றிப் பட்டியலில் சேர்த்துக்கொண்டே செல்கிறார்.

2024ம் ஆண்டின் இறுதியில் டிசம்பர் மாதத்தில், அண்டார்ட்டிகா கண்டத்தில் உள்ள 4,892 மீட்டர் உயரம் கொண்ட வின்சன் மலையினை ஏறி முடித்தபோது தன் இலக்கினை முடிக்கும் காலத்தை நெருங்கிக்கொண்டிருந்தார். 

இதுவரையில் ஆறு கண்டங்களில் உள்ள உலகிலேயே ஆறு உயரமான மலைகளை ஏறியதை தொடர்ந்து, சமீபமாக கடந்த மாதம் ஜூன் 16ம் தேதியன்று வட அமெரிக்க கண்டத்தில் உள்ள மெக்கின்லி மலை எனப்படும் 6,190 மீட்டர் உயரம் கொண்ட டெனாலி மலைச் சிகரத்தைத் தொட்டு தன் இலக்கை  அடைந்துள்ளார் முத்தமிழ்ச்செல்வி. 

தற்போது உலகின் 7 கண்டங்களில் உள்ள மிக உயரமான 7 மலைச் சிகரங்களை ஏறி சாதனைப் புரிந்த முதல் தமிழ்ப்பெண் என இவருக்கு பாராட்டுகள் குவிந்து வருகின்றன.

பொதுவாகவே மலையேற்றத்தின் போது பல்வேறு சிரமங்களை சந்திக்க நேரிடும். இவரின் டெனாலி மலையேற்றப் பயணத்தின்  போது  80  கிலோ எடையுள்ள பையினை சுமந்து கொண்டு மலையேறியுள்ளார். 

அதிகமான எடையை சுமந்ததுடன் பலத்த காற்று வீசியதால், கூடாரம் ஏதும் அமைக்காமலேயே தொடர்ந்து 16 மணி நேரம் உறைபனி குளிரிலேயே உறங்க வேண்டியிருந்ததாக குறிப்பிட்டிருந்தார். 

உறைபனிக் காற்றில் உறங்கியதால் கடும் தலைவலியினால் அவதிப்பட்டது மட்டுமில்லாமல், மறுநாள் கண் விழிப்போமா என்றபயத்தில் இருந்துள்ளார். அதிர்ஷ்டவசமாக தான் உயிருடன் மறுநாள் கண்விழித்ததாக கூறியுள்ளார்.

இவருடன் ஷேக் ஹசன் கான் என்பவரும் பயணம் செய்துள்ளார். அவர் கேரளாவின் தலைமைச் செயலகத்தில் வேலை பார்த்து வருகிறார். உறைபனியில் மாட்டிக்கொண்டவுடன் ஷேக் ஹசன் உடனடியாக கேரள அரசினை தன் சாட்டிலைட் போனினால் தொடர்பு கொண்டுள்ளார். 

உடனே கேரள முதலமைச்சர் பினராயி விஜயன் பிரதமர் மோடியிடம் இது குறித்து தெரிவிக்க, உடனே இந்திய தூதரகம் இவர்களுக்காக பேஸ்கேம்பில் மருத்துவ உதவி செய்துள்ளனர். பேஸ்கேம்பினை அடைய இவர்கள் இருவரும் 18 மணி நேரம் நடந்து வந்துள்ளனர்.