ஐ.ஐ.டியில் படிக்க தேர்வாகி இருக்கும் அரசுப் பள்ளி மாணவிகள்!

விருதுநகர் மாவட்டத்தில் சாத்தூர் சிறு நகருக்கு அருகிலுள்ள கிராமம்தான் படந்தால். இங்குள்ள அரசு உயர் நிலைப் பள்ளியில் ‘பிளஸ் டூ’ தேர்ச்சிப் பெற்ற யோகேஸ்வரி, மும்பை ஐ.ஐ.டி.யில் ‘விண்வெளிப் பொறியியல்’ பட்டப்படிப்பிற்காக சேர்க்கை பெற்றுள்ளார். ஐ.ஐ.டியில் ஆண்டிற்கு பல மாணவர்கள் தேர்ச்சிப் பெறுகிறார்கள். இதில் இவர் தேர்ச்சிப் பெறுவதில் என்ன ஆச்சரியப்பட இருக்கிறது என்ற கேள்வி நம்முடைய மனதில் எழும்.

ஒவ்வொரு ஆண்டும் இந்தியாவில் உள்ள ஐ.ஐ.டிகளில் பல நூறு பேர்கள் பலவித பாடங்களில் பொறியியல் படிப்பிற்காக சேர்கிறார்கள், படிக்கிறார்கள். அதில் ஒரு மாணவிதான் யோகேஸ்வரி என்று நினைத்தால் அதுதான் இல்லை. காரணம், இவர் ஒரு மாற்றுத்திறனாளி (உயரம் குறைவானவர்). சாதாரண கிராமத்தில் பிறந்த இவருக்கு விண்வெளிப் பொறியியல் மேல் ஆர்வம் ஏற்பட காரணம் அந்தப் படிப்பில் தேர்ச்சிப்பெற அதற்கு இவர் எடுத்துக் கொண்ட சிரத்தைப் பற்றி பகிர்ந்தார்.

‘‘சின்ன வயசில் இருந்தே அகன்று விரிந்த வானம் மேல் எனக்கு தனிப்பட்ட ஈர்ப்பு இருந்தது. நீல நிறத்தில் போர்வை போர்த்தியது ேபால் இருந்தாலும், தினமும் இதன் தோற்றம் புதுசாகத்தான் இருக்கும். மேலும், அந்த வானத்திற்கு பின் ஒளிந்திருக்கும் அதிசயங்களைப் பற்றி தெரிந்துகொள்ள வேண்டும் என்ற ஆர்வமும் எனக்குள் இருந்தது.

பள்ளியில் படிக்கும் போது ‘நான் முதல்வன்’ திட்டம் குறித்த சுற்றறிக்கையை விருதுநகர் ஆட்சியர் எங்களின் பள்ளிக்கு அனுப்பி வைத்திருந்தார். நான் நன்றாக படிப்பேன் என்பதால், தலைமை ஆசிரியர் அந்த திட்டத்தில் இணைய என்னுடைய பெயர் மற்றுமொரு மாணவனின் பெயரையும் பரிந்துரைத்தார். அதன் அடிப்படையில் அந்த திட்டத்தில் சேர்ந்து பயிற்சி பெற நான்  தேர்வானேன்.