‘தோல்வியே வெற்றியின் முதல் படி’ என்பதற்கு மயில்சாமி அண்ணாதுரையின் வாழ்வே ஆதாரம். மாணவ, மாணவிகள் சின்னச் சின்ன தோல்விகளுக்காக துவளும் இந்தத் தருணத்தில் அவரின் திருப்புமுனை செம டைமிங்!

‘பெட்ரோல் மழை பெய்ய மனுஷப்பயலுக்கும் தவளைக்கும் கல்யாணம் செய்து வைக்கலாம்’ என்று ஆல்தோட்ட பூபதி சொல்லியிருப்பது ரொம்ப கரெக்ட். அதனால பெட்ரோல் மழை பெய்யுதோ இல்லையோ... அடிக்கடி அவுட்டிங் போகணும், வாரா வாரம் ஷாப்பிங் போகணும்னெல்லாம் தவளை கேக்காது. பெட்ரோலும் செலவாகாது!

‘கமலோவியர்’ ஸ்ரீதரின் கை வண்ணம் அசர வைக்கிறது. கமல்ஹாசனின் அத்தனை கெட்டப்களையும் ஒரு சேர குரூப் போட்டோவில் பார்த்ததும் ஆச்சரியத்தில் ஆடிப் போனேன். கமலே பாராட்டுகிறார் என்றால் சும்மாவா?

‘செயற்கை இதயம் ரெடி’ கட்டுரை, அற்புதம். வருங்காலத்தில் மனிதனுக்கும் ஸ்பேர் பார்ட்ஸ் கடை வரலாம் போலிருக்கிறது. அது சரி, இந்த செயற்கை இதயத்திலாவது கருணை, பாசம் இதெல்லாம் இருக்குமா? இல்லை, இந்தக் கால இயற்கை இதயம் மாதிரிதானா?

பெட்ரோல் விலை உயர்வு எதனால் என்று எல்லோரும் பேசிக் கொண்டிருக்கும்போது ‘எத்தனால்’ பெட்ரோலைப் பற்றி பேச்செடுத்திருக்கும் உங்களுக்கு ஒரு சபாஷ். ஆனால், இந்தியப் பொருளாதாரத்தில் பாதியை வாயில் போட்டுக் கொள்ளும் ஆயில் நிறுவனங்களை மீறி எத்தனால் பயன்பாட்டுக்கு வருவது சந்தேகமே!

எழுத்தாளனின் மனம் விசாலமானதாக இருக்க வேண்டும், மனதில் பட்டதை பட்டென போட்டு உடைக்க வேண்டும்... அந்த வகையில் எழுத்தாளர் ஜெயமோகன், ஜெயகாந்தனுக்குப் பிறகு முன்னணியில் இருப்பது வரவேற்கத்தக்கது!

‘நிழல்கள் நடந்த பாதை’யில் இந்த வாரக் கவிதை நின்று, நிதானித்து ரசிக்கச் செய்தது. கட்டுரையில் வெளியாகிருந்த ஒவ்வொரு வரிகளும் உறுதியான நிஜம்!

பன்னிரண்டாம் வகுப்புத் தேர்வில் வெற்றி வாகை சூடியவர்கள், வாழ்விலும் வெல்ல பயனுள்ள கல்வி வழிகாட்டியாக அமைந்தது தங்களின் இரு வாரத் தொடர்.