படிப்பு என்னும் பெயரில் பளு தூக்கும் போட்டி நடத்தும் நடைமுறைக்கு முப்பருவத் தேர்வு முறைதான் முற்றுப்புள்ளி. ‘புத்தகங்களே... கவனமாய் இருங்கள். குழந்தைகளைக் கிழித்து விடாதீர்கள்!’ என்ற கவலைக் கவிதைகளுக்கு இனி அவசியம் இருக்காது!

ஒழுங்கீனங்களின் உறைவிடமாகவும் நூறு சதவீதம் வியாபாரமாகவும் மாறிவிட்ட ஐ.பி.எல் போட்டிகள் நிச்சயம் சாபமே! தயக்கமின்றி தடை செய்ய வேண்டியது அவசரமான அவசியம்!

செல்போனில் நயம்பட பேசாத நான்சென்ஸ் பார்ட்டிகளை நார்நாராகக் கிழித்துவிட்டார் ஆல்தோட்ட பூபதி. அப்படியே, தொள்ளாயிரம் ரூபா செல்போனுக்கு தோல் பவுச் வச்சுக்கிட்டு திரியிறவங்களை டார்கெட் பண்ணுப்பா பூபதி!

‘மாட்டு வண்டி பூட்டிக்கிட்டு’... பத்து கிராமங்களின் பாசப் பயணத்தை கண்முன் காட்டி, பழமையின் இனிமையை மீண்டும் உணர வைத்து விட்டீர்கள். பாராட்டுக்கள்!

நரிக்குறவர் இனத்தில் பிறந்து, அச்சமூகத்தின் முதல் பொறியியல் பட்டதாரியான ரஜினி, ஒரு நிஜ உலக சூப்பர் ஸ்டார்தான். நரிக் குறவர் குழந்தைகளுக்கான கல்வி மையம் தொடங்கும் அவரது திட்டம் நல்லபடியாக நிறைவேறட்டும்!
- வி.சி.நிவேதா, செங்கை.

‘குற்றங்கள் நடக்கும்போது தண்டிப்பதுதான் முக்கியமே ஒழிய, ஒரு விஷயத்தையே குற்றமாக்குவது வேடிக்கை’ என்ற மனுஷ்யபுத்திரனின் வைர வரிகள், எங்கள் சிந்தனைக்கு சிறகுகள் சேர்த்தன.

‘டெங்கு’ காய்ச்சல் என்றதும் மரணக்கணக்கு மட்டும் போட்டு பீதியைக் கிளப்பாமல், அதன் அறிகுறிகள், வராமல் தடுக்க என்ன செய்ய வேண்டும்... போன்ற ‘உஷார் டிப்ஸ்’களைத் தந்து உங்கள் பொறுப்புணர்ச்சியைக் காட்டிவிட்டீர்கள். நன்றி!

என்னது... தாய்லாந்து நாட்டில் கடலில் மிதக்கும் தியேட்டரா..? அங்க அப்படி ஒண்ணுதானே இருக்கு... நம்ம கிராமத்துப் பக்கமெல்லாம் எல்லா தியேட்டர்களுமே ‘தண்ணி’யிலதான் மிதக்குது!

‘கல்வி என்னைக் கரை மட்டும் சேர்க்கவில்லை, நிலவு வரை சென்று சேர்த்துள்ளது’ என்ற மயில்சாமி அண்ணாதுரையின் வாக்குமூலம், அவரைப் போல் எளிய குடும்பத்தில் பிறந்த இளைஞர்கள் எல்லோருக்கும் வைட்டமின் டானிக்!

பேசாத கரடி பொம்மைகளும்... பெண்களின் உளவியலும்... இதை உணர்த்தி வந்த ‘வலைப்பேச்சு’ டாப் டக்கர். ஆண்கள்தான் பெண்களை எவ்வளவு நுட்பமாக கவனிக்கிறார்கள்!