சமீபத்தில் நாடு முழுவதும்  வெளியான பத்திரிகைகள் மற்றும் சமூக வலைத்தளங்களில் இடம்பிடித்த ஒரு பெயர், லட்சுமி பாய். தனது வாழ்க்கை முழுவதும் சேகரித்த, 3.4 கோடி ரூபாயை எய்ம்ஸ் மருத்துவமனைக்குக் கொடையாக வழங்கியிருக்கிறார் லட்சுமி. 

அதுவும் தனது 100வது பிறந்த நாளில் வழங்கியிருக்கிறார். இந்த தன்னலமற்ற செயலால்தான் நாடு முழுவதும் போற்றும் ஒரு பெண்மணியாகப் புகழடைந்திருக்கிறார், லட்சுமி.யார் இந்த லட்சுமி பாய்?

சரியாக 100 வருடங்களுக்கு முன்பு, ஒடிசாவில் உள்ள கஞ்சம் மாவட்டத்தில் அமைந்திருக்கும் பெர்ஹாம்பூரில் பிறந்தார், லட்சுமி. பெண்களுக்குக் கல்வி என்பது எட்டாக்கனியாக இருந்த காலம் அது. ஆனால், சிறுமி லட்சிமியோ மருத்துவராகி, சமூகத்துக்குச் சேவை செய்ய வேண்டும் என்ற கனவுடன் இருந்தார். 

அவரது கனவுக்குக் குடும்பமும் ஆதரவு தந்தது. ஒரு பக்கம் இந்தியா சுதந்திரத்துக்காக ஆங்கிலேயரிடம் போராடிக் கொண்டிருந்தது. வீட்டைவிட்டு வெளியில் கூட வரமுடியாத நிலையில் பெண்களின் சூழல் இருந்தது. இன்னொரு பக்கம் தனது கல்வி உரிமைக்காகப் போராடிக் கொண்டிருந்தார் லட்சுமி. 

மருத்துவப் பயிற்சிகளுக்காகப் பல ஊர்களுக்குச் சென்றார். அப்போதே லட்சுமிக்கு அமெரிக்காவில் உள்ள உலகத் தரம் வாய்ந்த ஜான்ஸ் ஹாப்கின்ஸ் மருத்துவமனையில் எம்பிஹெச் (Master of Public Health) பயில ஒரு வருட உதவித்தொகை கிடைத்தது. 

பல நாடுகளில் மருத்துவப் பணி செய்வதற்கான அழைப்புகளும் வந்தன. தவிர, நாட்டிலேயே முக்கியமான மருத்துவர்களில் ஒருவராக உயர்ந்த பிறகும் கூட, சொந்த ஊர் மக்களுக்கும், குறிப்பாக பொருளாதார வசதியற்ற பெண்களுக்காகவும்தான் மருத்துவம் பார்த்தார் லட்சுமி. 

கடந்த 1950ம் வருடம் ஒடிசாவில் உள்ள சுந்தர்கரில் அமைந்துள்ள அரசு மருத்துவமனையில் தனது மருத்துவப் பணியை ஆரம்பித்தார் லட்சுமி. பிறகு ஒடிசாவின் எம்கேசிஜி மருத்துவக் கல்லூரியின் மகப்பேறு மருத்துவம் மற்றும் மகளிர் நலவியல் துறையின் தலைவராகவும், பேராசிரியராகவும் பணியாற்றி, ஓய்வு பெற்றார்.