இந்த 2026ம் ஆண்டு உலகம் எப்படியிருக்கும், உங்கள் வாழ்க்கை எப்படி மாறும் என்றெல்லாம் ஜோதிடக் கணிப்புகள் பரபரக்கின்றன.ஆனால், இந்தக் கணிப்புகளை எல்லாம்விட இந்த 2026ம் ஆண்டு உலகின் ஒட்டுமொத்த 16 வயதுக்குட்ட சிறுவர்களும் மன உளைச்சலுக்கு ஆளாகப் போவதாகச் சொல்கின்றனர் தொழில்நுட்ப வல்லுநர்கள். 

காரணம், சமூக ஊடகங்களைப் பல்வேறு நாடுகளும் தடைசெய்யப் போகின்றன என்பதுதான். இதற்கு முத்தாய்ப்பாக சமீபத்தில் உலகில் முதல்முறையாக ஆஸ்திரேலியாவில் 16 வயதுக்கு உட்பட்டவர்கள் சமூக ஊடகங்களைப் பயன்படுத்தத் தடை விதிக்கப்பட்டுள்ளது. 

மலேசியா, இந்த 2026ம் ஆண்டு முதல் 16 வயதுக்கு உட்பட்டவர்கள் சமூக ஊடகங்கள் பயன்படுத்தத் தடை செய்வதாக அறிவித்துள்ளது. இதேபோல் ஃபிரான்ஸ் நாட்டில் 15 வயதுக்கு உட்பட்டவர்கள் சமூக ஊடகங்களைப் பயன்படுத்தத் தடையும், 15 டூ 18 வயதுக்கு உட்பட்டவர்கள் இரவு பத்து மணி முதல் மறுநாள் காலை 8 மணி வரை பயன்படுத்தத் தடை பற்றியும் பரிசீலித்து வருகிறது. 

ஏற்கனவே ஃபிரான்ஸ் கடந்த 2023ம் ஆண்டு பெற்றோரின் சம்மதம் இல்லாமல் 15 வயதுக்கு உட்பட்டவர்கள் சமூக ஊடகங்களில் கணக்கைத் தொடங்க முடியாது என்றது. ஆனால், அது அமலாக்கப்படவில்லை. இப்போது தீவிரமாக யோசித்து வருகிறது. 

இதிலிருந்து முற்றிலும் மாறுபட்டு ஜப்பானின் டோயோகே நகர மேயர் மசாஃபுமி கோகி, கடந்த அக்டோபரில் அனைத்து வயதினரும் ஒருநாளில் இரண்டு மணிநேரம் மட்டுமே ஸ்மார்ட்போன், டேப்லெட், கம்ப்யூட்டர் பயன்படுத்த வேண்டும் என உத்தரவு பிறப்பித்தார். பெரியவர்கள் இதனை பின்பற்றவில்லை என்றால் குழந்தைகளும் விதிகளை மதிக்கமாட்டார்கள் என்றார் கோகி. 

இதுகுறித்து, ‘சமூக ஊடக வரலாறு’ என்ற நூலை எழுதியிருக்கும் எழுத்தாளர் சைபர் சிம்மனிடம் பேசினோம். அவர், ‘தடையைவிட சமூக ஊடகக் கல்வியறிவே இப்போதைய தேவை’ என்கிறார். ‘‘பொதுவாக தடை என்பது எந்த ஒரு பிரச்னைக்கும் தீர்வல்ல. தடை விதிப்பது அதன் நோக்கத்தை நிறைவேற்றுவதைவிட, புதிய பிரச்னைகளையும், சிக்கல்களையுமே கொண்டு வரும். 

சமூக ஊடகத் தடையை செயல்படுத்துவதில் தொழில்நுட்ப நோக்கிலான சிக்கல்கள் இருப்பதோடு, வயதை நிரூபிக்க தகவல்களை சமர்ப்பிப்பதும், தரவுகள் சேகரிக்கப்படுவதும் புதிய கவலைகளை உண்டாக்கும். 

மேலும், எல்லா வகையான சமூக ஊடக பயன்பாடும் பாதகமானதல்ல. சமூக ஊடக பயன்பாடு பல நல்ல பலன்களையும் ஏற்படுத்தக்கூடியது. எனவே சமூக ஊடகத் தடை, குழந்தைகள் சமூக ஊடகம் மூலம் பெறக்கூடிய டிஜிட்டல் திறன் கல்வியறிவை பாதிக்கலாம்.

ஆனால், இந்தக் காலத்து குழந்தைகள் தொழில்நுட்பத் திறனில் சிறந்து விளங்கினாலும், சிந்தித்து பயன்படுத்துவது மற்றும் உணர்வு நோக்கில் அணுகுவது ஆகிய திறன்களில் போதாமையை கொண்டுள்ளனர்.

இந்த இடத்தில்தான் பெற்றோர் மற்றும் ஆசிரியர்களின் வழிகாட்டுதல் அவசியமாகிறது. பெற்றோர், பிள்ளைகளுக்கு சமூக ஊடக சேவைகளின் தன்மையை எடுத்துக்கூறி, அவற்றை பயன்படுத்த வழிகாட்ட வேண்டும். சமூக ஊடக சேவைகளின் இரு பக்கங்களையும் எடுத்துக்கூற வேண்டும்.

இதில் பெற்றோர் மட்டுமல்ல, சமூகத்தின் மற்ற பிரிவினருக்கும் பொறுப்பு இருக்கிறது. சமூக ஊடகம் தொடர்பான ஆரோக்கியமான விவாதத்தை உருவாக்கி, ஆக்கபூர்வமான பயன்பாட்டை ஊக்குவிக்க வேண்டும்.பிழைத்தகவல்கள், வெறுப்பு சார்ந்த கருத்துக்களுக்கு மாறாக நல்ல உள்ளடக்கத்தை உருவாக்குவதில் கவனம் செலுத்த வேண்டும். 

முக்கியமாக குழந்தைகள் டிஜிட்டல் திரையில் செயல்படும் நேரத்தைக் குறைக்க வேண்டும். அதற்கேற்ப நிஜ உலக தொடர்புகளையும், ஈடுபாட்டையும் அதிகரிக்க வேண்டும். இதனைவிடுத்து சமூக ஊடகங்களையே தடை செய்வது என்பது ஒரு தீர்வாக இருக்காது...’’ என்கிறார் சைபர் சிம்மன்.