இது கதையல்ல... நிஜம்!

டப்பிங் தியேட்டரில் வேலை முடித்து டாக்ஸியில் பயணம் செய்துகொண்டிருந்த போது, பைகுலா பகுதியில் சாலையோர குப்பைத்தொட்டியில் வீசப்பட்டிருந்த ஒரு குழந்தையின் அழுகை சத்தத்தை கேட்டார் சல்மா. இந்தச் சம்பவம் நடந்தபோது இவர் பெயர் அனுபமா. இந்தித் திரையுலகின் நடிகை.காரை நிறுத்தச் சொல்லி இறங்கினார். அழுகை வந்த இடத்துக்குச் சென்று பார்த்தபோது அதிர்ந்தார்.அப்பொழுதுதான் பிறந்த பச்சிளம் குழந்தை. பிரசவநேர ரத்தம் கூட இன்னும் சுத்திகரிக்கப்படவில்லை. 

பதறிப் போய் சுற்றிலும் பார்த்தார். சலனமே இல்லாமல் மக்கள் சென்று கொண்டிருந்தார்கள்.யோசிக்கவேயில்லை. அப்படியே அக்குழந்தையை தன் கையில் அள்ளினார். காரில் ஏறினார். வீட்டுக்கு வந்தார்.அனுபமாவை வரவேற்ற அவரது கணவர், தன் மனைவியின் கரங்களில் இருந்த பச்சிளங் குழந்தையைப் பார்த்தார்.‘‘சல்மா... யார் குழந்தை இது..? நீ ஏன் நம் வீட்டுக்கு கொண்டு வந்திருக்கிறாய்?இன்னும் ரத்தம் கூட துடைக்கப்படவில்லையா?’’ மனைவியைப் பார்த்துக் கேட்டார்.

‘‘அதுதான் சலீம் செய்தியே...’’ என்ற அனுபமா, நடந்த விவரங்களை அப்படியே சொன்னார்.கேட்ட சலீமுக்கு திகைப்பும், அதிர்ச்சியும் ஒருசேர எழுந்தது. எண்ணற்ற இந்தித் திரைப்படங்களுக்கு சலீம் கதை, திரைக்கதை எழுதியிருக்கிறார். சொல்லப்போனால் பாலிவுட்டின் மோஸ்ட் வாண்டட் ஸ்கிரிப்ட் ரைட்டர் அவர்தான்.மிகையில்லை. இந்தியாவையே அதிர வைத்த ‘ஷோலே’ படத்துக்கு திரைக்கதை அமைத்த சலீம் - ஜாவேத் இரட்டையர்களில் ஒருவரான சலீம்தான் இவர்.

‘‘குழந்தையை பத்திரமா கொண்டு வா சல்மா... ஆனால், சட்டப்படி நாமே இக்குழந்தையை வைத்துக்கொள்ள முடியாது. பெற்றோரிடம் குழந்தையை ஒப்படைக்க வேண்டும்...’’
‘‘பெற்றோர் யா ரென்றே தெரியவில்லையே சலீம்?’’

‘‘தேடுவோம் சல்மா...’’தேடினார்கள். அந்தப் பச்சிளங்குழந்தையின் பெற்றோரை கண்டுபிடித்தார்கள். குழந்தையுடன் அப்பெற்றோர் வசித்து வந்த குடிசைக்குச் சென்றார்கள். 
“பிறந்த குழந்தையை ஏன் குப்பையில் வீசினீர்கள்?’’ ஆற்றாமையுடன் சலீம் அப்பெற்றோரைப் பார்த்துக் கேட்டார்.
“வசதியில்லை. உணவுக்கு வழியில்லை...’’