பொதுவாக சேகரிப்பில் ஆர்வம் உள்ளவர்கள் தபால்தலைகளையும், நாணயங்களையுமே முதன்மையாக சேகரிப்பார்கள். இதிலிருந்து வேறுபடும் சிலரே கைக்கடிகாரங்கள், ரேடியோ, கேமராக்கள், பழைய பத்திரிகைகள், கார்கள், சினிமா சார்ந்த தொகுப்புகள் என வித்தியாசம் காட்டுவார்கள்.

ஆனால், இதில் யாருமே தாங்கள் சேகரித்த பொருட்களை அருங்காட்சியகம் அமைத்து காட்சிப்படுத்துவதில்லை. இந்த இடத்தில்தான் முற்றிலும் மாறுபட்டு நிற்கிறார் ஜி.ஆர்.மகாதேவன். பழம் பொருட்கள் சேகரிப்பாளரான இவர், தன்னுடைய சேகரிப்புகளை ஓர் அருமையான அருங்காட்சியகமாக மாற்றி மக்களின் பார்வைக்குக் கொண்டு வந்துள்ளார். 

‘‘நான் பிறந்து வளர்ந்ததெல்லாம் காரைக்குடியில். இப்போ, பிரபல டூவீலர் நிறுவனத்தின் டீலராக இருக்கேன். மூன்று ஷோரூம்கள் வச்சு நடத்திட்டு வர்றேன். இருந்தும் இந்தப் பழம் பொருட்கள் சேகரிப்புதான் என்னை உயிர்ப்புடன் வச்சிருக்கு...’’ என உற்சாகமாகப் பேசுகிறார் ஜி.ஆர்.மகாதேவன்.

 ‘‘எனக்கு வாழ்க்கையில் ஏதாவது வித்தியாசமாக பண்ணணும்னு ஆசை. மகாகவி பாரதியார்தான் எனக்கு குரு. அவரின், ‘தேடிச் சோறுநிதந் தின்று - பல சின்னஞ் சிறுகதைகள் பேசி... வேடிக்கை மனிதரைப் போலே - நான் வீழ்வேனென்று நினைத் தாயோ?’ என்ற பாடல் வரிகள் என் மனதில் ஆழமாகப் பதிந்திடுச்சு.

பிறகு நூறு ரூபாய், ஐம்பது ரூபாய்னு பழைய நோட்டுகளைச் சேகரிக்கத் தொடங்கினேன். தொடர்ந்து பல்வேறு பழம் பொருட்களையும் சேகரிக்க ஆரம்பிச்சேன். என் வீடு முழுவதும் பழம் பொருட்களாக குவிய ஆரம்பிச்சது. பலரும் பொம்மைக்காரர் வீடுனு சொல்ல ஆரம்பிச்சாங்க. என் நண்பர்கள் ‘பொம்மைக் காதலன்’னு எனக்குப் பெயர் வச்சாங்க.

 வீடு முழுவதும் சேகரிப்புகளாக குவிஞ்சதும் ஒருகட்டத்துல என் மனைவி ப்ரியதர்ஷினி, ‘நீங்களே சேகரிச்சு... நீங்களே ரசிக்கிறீங்க. அதை மற்றவங்களும் ரசிக்கிற மாதிரி ஓர் அருங்காட்சியகம் அமைக்கலாமே’னு சொன்னாங்க. அந்நேரம் என்னிடம் ஒரு லட்சம் பழம் பொருட்கள் இருந்துச்சு. 

இங்க பள்ளி, கல்லூரி மாணவர்களை இலவசமாக பார்வையிட அனுமதிக்கிறோம். மற்றவர்களுக்கு ஒரு குறைந்தபட்ச கட்டணம் வசூலிக்கிறோம். இதுவும் அருங்காட்சியகப் பராமரிப்பிற்காகவே வாங்குறோம். இந்த இரண்டு அருங்காட்சியகத்திலும் தலா 2500க்கும் மேற்பட்ட வெரைட்டியில் தலா 20 ஆயிரம் பழம் பொருட்கள் இருக்குது.

அப்புறம் விதவிதமான பழைய கேமராக்கள், டைப் ரைட்டிங் மிஷின்கள், ரேடியோக்கள், ஸ்கூட்டர்கள், லாந்தர் விளக்குகள், விதவிதமான ஜாடிகள், டின் டாய்ஸ்கள், கிராமபோன்கள், கை ரிக்‌ஷாக்கள், நாணயங்கள், வெளிநாட்டுக் கரன்சிகள், கைக்கடிகாரங்கள், தையல் மிஷின்கள், சூட்கேஸ்கள்னு எல்லாம் வச்சிருக்கேன்.இதுதவிர எழுத்திலும், நூல் வாசிப்பதிலும் எனக்கு ஆர்வம் அதிகம். அப்படியாக என் சேகரிப்பில் 5 ஆயிரம் நூல்களும் இருக்கு. இதில் முதல்முதலாக வெளிவந்த ‘ஆனந்த விகடன்’, ‘குமுதம்’, ‘குங்குமம்’, ‘சாவி’ வார இதழ்கள் இருக்குது.

ஆரம்பத்துல இதை மாணவர்கள் ரசிப்பாங்களானு எனக்குள் ஒரு கேள்வியும் இருந்தது. ஆனா, அவங்கதான் ரொம்ப ஆர்வமாக வந்து பார்வையிடுறாங்க. பழைய ஹார்லிக்ஸ் பாட்டில்கள், போர்ன்விட்டா டின்கள், சைக்கிள்கள், குழந்தைகளின் மூணுசக்கர வண்டிகள், பிளாஸ்க்குகள் எல்லாம் பார்த்து பரவசப்படுறாங்க.

எனக்கும் பள்ளிக் குழந்தைகள்ல இருந்து கல்லூரி மாணவர்கள் வரை வந்து பார்க்கிறது மனசுக்கு ரொம்ப சந்தோஷமா இருக்கு. இவர்களுடன் நிறைய விவிஐபிக்களும் வந்து பார்வையிடுறாங்க. இப்போ, நிறைய வெளிநாட்டுக்காரர்களும் கூகுள் மேப் பார்த்து வர்றாங்க...’’ என்கிற மகாதேவன் மலேசியாவில் திறக்கவுள்ள அருங்காட்சியகம் பற்றி பேசினார்.