இந்தியாவின் முக்கிய விமான போக்குவரத்து நிறுவனங்களில் ஒன்று இண்டிகோ நிறுவனம். நாள் ஒன்றுக்கு இந்தியாவில் 2200க்கும் மேற்பட்ட விமானங்களை இந்நிறுவனம் இயக்கி வருகிறது. 

குறிப்பாகச் சொல்வதென்றால் இந்தியாவுக்குள் பயணிக்க, இண்டிகோ விமானங்களையே பயன்படுத்த வேண்டும் என்ற சூழல் நிலவுகிறது.இந்நிலையில்தான் அடிக்கடி விமானம் வருவதில் தாமதம், திடீரென விமானப் பயணம் ரத்து என இண்டிகோவின் போக்கு பயணிகளை டென்ஷன்படுத்தி வருகிறது.  

கடந்த நவம்பர் மாதம் மட்டுமே 1,232 இண்டிகோ விமானங்கள் ரத்து செய்யப்பட்டன. விமானத்தை நம்பி தங்கள் வேலையை, அப்பாயின்ட் மென்ட்டை, திருமணம் உள்ளிட்ட வீட்டு விசேஷங்களை திட்டமிட்ட மக்கள் நிலைகுலைந்தார்கள்.

இவற்றுக்கெல்லாம் சிகரமாக கடந்த டிசம்பர் 2ம் தேதி அன்று 1400 இண்டிகோ விமானங்கள் தாமதமாகப் புறப்பட்டன. மறுநாள், டிசம்பர் 3 அன்று பிற்பகல் தில்லி, மும்பை, பெங்களூரு, ஹைதராபாத் விமான நிலையங்களில் 200க்கும் மேற்பட்ட இண்டிகோ விமானங்கள் கூட்டாக ரத்து செய்யப்பட்டன. 

சிறிய தொழில்நுட்பக் கோளாறுகள்,  குளிர்காலத்துடன் தொடர்புடைய அட்டவணை மாற்றங்கள், பாதகமான வானிலை,  திருத்தப்பட்ட விமான கடமை நேர வரம்பு விதிமுறைகளைச் செயல்படுத்துதல்  உள்ளிட்ட பல எதிர்பாராத செயல்பாட்டுச் சவால்கள், எங்கள் செயல்பாடுகளில்  எதிர்மறையான தாக்கத்தை ஏற்படுத்தின.

இடையூறுகளைக் கட்டுப்படுத்தவும்,  நிலைத்தன்மையை மீட்டெடுக்கவும் தேவையான நடவடிக்கைகளை நாங்கள்  தொடங்கியுள்ளோம். வாடிக்கையாளர்களின் அசௌகரியத்தைக் குறைக்கவும்,  செயல்பாடுகள் விரைவாக நிலைபெறுவதை உறுதி செய்யவும் எங்கள் குழுக்கள் 24 மணி  நேரமும் உழைத்து வருகின்றன...’ என்றெல்லாம் இண்டிகோ நிறுவனம் இதற்கு விளக்கம் அளித்தாலும் மக்கள் இதை ஏற்கத் தயாராக இல்லை.

ஒன்றிய பாஜக அரசின் போக்குதான் இதற்குக் காரணம் என அரசியல் பார்வையாளர்கள் ஆணித்தரமாகச் சொல்கிறார்கள்.  கடந்த ஜூலை மாதம் அகமதாபாத் விமான விபத்து இந்தியாவையே உலுக்கியது. இதனையடுத்து சிவில் விமானப் போக்குவரத்து இயக்குநரகம் (DGCA) கடந்த மாதம் திருத்தப்பட்ட விமான கடமை நேர வரம்பு விதிமுறைகளை அறிமுகப்படுத்தியது.

அதேபோல் கட்டாய ஓய்வு நேரங்களையும் அதிகரித்துள்ளது. விமானிகள் மற்றும் கேபின் குழு உறுப்பினர்கள் ஒவ்வொருவரும் விமான நேரத்தின் இரு மடங்கு ஓய்வு நேரத்தைப் பெறவேண்டும். எந்தவொரு 24 மணி நேர பயணத்திலும் குறைந்தபட்சம் 10 மணி நேர ஓய்வு இருக்க வேண்டும்.

விமானிகள் மற்றும் கேபின் குழுவினர் போதுமான ஓய்வு பெறுவதை உறுதி செய்வதற்கும், பயணிகளின் பாதுகாப்பில் எந்த சமரசமும் இருக்கக்கூடாது என்பதற்கும் DGCA கொண்டு வந்துள்ள புதிய விதிகளுக்கு ஏற்றபடி இண்டிகோ நிறுவனம் தனது நெட்வொர்க்கை மறுசீரமைக்கத் தடுமாறி வருவதாக ஒரு தரப்பினர் சொல்கிறார்கள்.

முறையாகத் திட்டமிடாத கார்ப்பரேட் நிறுவனத்தின் மீது கடும் நடவடிக்கை எடுத்திருக்க வேண்டும். ஆனால், மோடி அரசு பயணிகளின் பாதுகாப்பை விட கார்ப்பரேட் லாபமே முக்கியம் என இண்டிகோவிற்கு மட்டும் இப்பொழுது புதிய விதிகளிலிருந்து பிப்ரவரி வரை விலக்கு அளித்துச் சரணடைந்துள்ளது.

விமானிகள் சோர்வடையாமல் இருக்கக் கொண்டுவரப்பட்ட விதியை, ஒரு நிறுவனம் அமல்படுத்த மறுக்கிறது என்பதற்காக அரசே தளர்த்துவது எவ்வளவு பெரிய அவலம்..? என மறுதரப்பு சரமாரியாக வினாக்களைத் தொடுக்கிறது.விமான நிலையத்தில் பாதிக்கப்பட்ட பயணிகளும் இதே கேள்விகளை எழுப்புகிறார்கள். இவை ஒன்றிய அரசின் செவியில் விழுமா?