தென் தமிழகம் சென்று நீதியரசர் யார் என்று கேட்டுப் பாருங்கள். தாமதிக்காமல் சப்புரத்தடி ஸ்ரீ கருப்பண்ணசாமியை கைகாட்டுவார்கள்; கரம் குவிப்பார்கள்.

பொதுவாகவே மற்ற தெய்வங்களிடம் பொய் சொல்லலாம். கூறும் பொய்யால் யாருக்கும் எந்தப் பிரச்னையும் இல்லை என்றால் அந்த தெய்வம், புன்னகையுடன் நாம் சொல்லும் பொய்யை நம்புவது போல் ஏற்கும்.

ஆனால், யாருக்கும் எந்தச் சிக்கலும் வராது என்றாலும்... பொய்மையும் வாய்மையிடத்து என்ற மூதுரை மக்கள் மத்தியில் புழங்கிவந்தாலும், ஒருபோதும் மக்கள் ஒரேயொரு தெய்வத்திடம்  மட்டும் பொய் சொல்ல மாட்டார்கள்.அந்த தெய்வம் சாட்சாத் நம் கருப்பண்ணசாமிதான். 

அதுவும் சப்புரத்தடி ஸ்ரீகருப்பண்ணசாமியின் முன்னால் ஏமாற்றுவது, பொய் உரைப்பது, தீய எண்ணத்துடன் வருவது  போன்றவை ஆகவே ஆகாது. அப்படி உண்மையை மறைத்து வேடமிட்டு போலியாக வருபவர்களுக்குத் தகுந்த பாடத்தை சப்புரத்தடி ஸ்ரீ கருப்பண்ணசாமி கற்பிப்பார். 

இதற்கு வாய் மொழிக் கதைகளில் ஆரம்பித்து நடைமுறை நிகழ்வுகள் வரை எண்ணற்ற உதாரணங்கள் உண்டு.கிராம தெய்வங்களுக்கு புகழ்பெற்ற இடம் மதுரை. மக்களையும் மண்ணையும் காக்கத் துணிந்த பலரும் தெய்வமாக நிற்கும் இந்த பூமியில் கருப்பருக்கு ஏகப்பட்ட ஆலயங்கள் உள்ளன.

சோழமலை பூசாரியின் கனவில் கருப்பண்ணசாமியே தோன்றி, ‘இனி என்னை அரூபமாக அல்ல... உருவமாகவே மக்கள் வந்து பார்த்து செல்லட்டும். என் மீது நீ கொண்ட நம்பிக்கையும் பக்தியும் என்னை மெய்சிலிர்க்க வைக்கிறது. எனவே, உருவத்துடன் இனி நான் இங்கு காட்சி தரப்போவது உன் வழியாக, உன் முயற்சியால் அரங்கேறட்டும்...’ என்று சொல்லி ஆசி வழங்கினார்.

அப்படித்தான் அரூபமாக இருந்த சப்புரத்தடி ஸ்ரீ கருப்பண்ணசாமி, இன்றிருக்கும் உருவத்தைப் பெற்றார்.கள்ளழகர் எதிர்சேவையின் போது இந்தக் கோயிலில் மக்கள் கூட்டம் அலைமோதும். வெள்ளிக்கிழமைகளிலும், ஆடி அமாவாசை, மகா சிவராத்திரி காலங்களிலும் பக்தர்கள் குவிவார்கள். 

கள்ளழகர் பூப்பல்லக்கின்போது இந்தக் கோயிலில் வைத்துதான் அலங்காரம் செய்யப்படும். இந்த சம்பிரதாயம் காலங்காலமாக நடந்து வருகிறது.இந்தக் கோயிலின் மூலவராக முன்பு இருந்தவர் முத்து கருப்பண்ணசாமி. இவர் சப்புரத்தடி ஸ்ரீ கருப்பண்ணசாமியின் அண்ணனாகக் கருதப்படுகிறார்.