பாகிஸ்தானின் வரலாற்றில் மிகவும் வலிமை வாய்ந்த இராணுவ அதிகாரி என்ற சிறப்பைத் தன்வசமாக்கியிருக்கிறார், ஃபீல்டு மார்ஷல் ஆசிம் முனீர். சமீபத்தில் பாகிஸ்தானின் நாடாளுமன்றத்தில் நிறைவேற்றப்பட்ட மசோதாவில், அந்நாட்டின் உச்சபட்ச அதிகாரங்கள் எல்லாம் ஆசிமிற்கு வழங்கப்பட்டிருக்கிறது. 

பிரதமர், ஜனாதிபதி, உச்ச நீதிமன்ற நீதிபதியைவிட அதிக அதிகாரங்களுடன் அசீம் இருப்பார். மட்டுமல்லாமல், தனது வாழ்நாள் முழுவதும் முப்படைகளின் தலைமைத் தளபதியாக ஆசிம் பொறுப்பு வகிப்பதோடு, கட்டளையிடும் அதிகாரமும் அவருக்கே உரியது. 

இவரது பெற்றோர் பஞ்சாப்பில் உள்ள ஜலந்தரைச் சேர்ந்தவர்கள். 

சுதந்திரத்துக்குப் பிறகான பிரிவினையின்போது டோபா டேக் சிங்கிற்கு இடம்பெயர்ந்த ஆசிமின் குடும்பம், பிறகு ராவல்பிண்டியில் குடியேறியது. ஆசிமின் தந்தை சயித் சர்வர் முனீர், எஃப்ஜி டெக்னிக்கல் ஹை ஸ்கூலில் பிரின்சிபலாக இருந்தார். தவிர, ஒரு மசூதியில் உயர் பொறுப்பையும் வகித்தார். 

மட்டுமல்ல, இஸ்லாமிய மதத்தின் மீது தீவிரமான பற்றுகொண்ட, பழமைவாதி, ஆசிம். இவரது குடும்பத்தை உள்ளூரில் இருப்பவர்கள் ‘ஹஃபீஸ்’ என்று அழைக்கின்றனர். குரான் முழுவதும் மனப்பாடம் செய்கின்றவரை ‘ஹஃபீஸ்’ என்று அழைக்கின்றனர். 

ஆசிமின் பெரும்பாலான குடும்ப உறுப்பினர்களுக்கு குரான் முழுவதும் மனப்பாடமாகத் தெரியும். பாகிஸ்தானின் வரலாற்றில் முழு குரானையும் மனப்பாடமாகத் தெரிந்த ஒரே இராணுவ அதிகாரி, ஆசிம்தான் என்பது குறிப்பிடத்தக்கது. மட்டுமல்ல, கிரிக்கெட்டிலும் ஆர்வமுடையவர் ஆசிம். இளம் வயதில் வேகப்பந்து வீச்சாளராக வலம் வந்தார். புத்தகம் வாசிப்பதில் அதீத ஆர்வமுடைய ஆசிம், அடிக்கடி பயணம் மேற்கொள்பவராகவும் இருக்கிறார். 

குறுகிய காலத்திலேயே பாகிஸ்தான் இராணுவத்தின் உயர் பதவிகளை எல்லாம் தன்வசமாக்கினார். இதற்கு அவரது இஸ்லாம் ரீதியான அறிவும், ஈடுபாடும் ஒரு காரணம் என்று சொல்கின்றனர்.  

கடந்த நவம்பர் 2022ல் நான்கு நட்சத்திர ஜெனரல் அந்தஸ்து வழங்கப்பட்டதோடு, பாகிஸ்தான் இராணுவத்தின் தலைமை அதிகாரியாகவும் ஆசிம் நியமிக்கப்பட்டார். நவம்பர் 27, 2022ல் ஆசிமின் பணிக்காலம் முடிவதாக இருந்தது. 

இராணுவத்தின் தலைமை அதிகாரியாக நியமிக் கப்படுவதற்கு முன்பே, ஓய்வு பெறப்போவதாக விண்ணப்பம் கொடுத்திருந்தார். அவரது ஓய்வு விண்ணப்பத்தை பாகிஸ்தானின் பாதுகாப்பு அமைச்சகம் நிராகரித்துவிட்டது. அத்துடன் அரசே அவரது பணிக்காலத்தை நீட்டித்து உத்தரவிட்டது.