சமீபத்தில் பஹ்ரைனில் நடந்த 3வது ஆசிய இளையோர் விளையாட்டுப் போட்டியில் பளுதூக்குதலில் இரண்டு வெள்ளிப் பதக்கங்களை வென்று இந்தியாவுக்கும், தமிழகத்துக்கும் பெருமை சேர்த்துள்ளார் மகாராஜன்.

தமிழக முதல்வர் மு.க.ஸ்டாலின் உட்பட பலரும் அவரைப் பாராட்ட, துணை முதல்வர் உதயநிதி ஸ்டாலின் 25 லட்சம் ரூபாய் ஊக்கத்தொகை வழங்கி வாழ்த்துகளைத் தெரிவித்தார். 

இந்நிலையில் வெற்றி வாகைசூடி வந்த கையுடன் பஞ்சாப்பின் பாட்டியாலாவிற்கு பயிற்சிக்குச் சென்றுவிட்ட மகாராஜனை போனில் பிடித்தோம். 

‘‘நான் பிறந்து வளர்ந்ததெல்லாம் கோவில்பட்டியில் உள்ள சங்கரலிங்கபுரம். அப்பா ஆறுமுகபாண்டியன் எலக்ட்ரீசியனாக வெளிநாட்டில் வேலை செய்றார். அம்மா முருகலட்சுமி, தீப்பெட்டி கம்பெனியில் வேலை செய்றாங்க. 

ரெண்டு அக்காக்கள் இருக்காங்க. கஷ்டமான பின்புலத்தில் இருந்துதான் வளர்ந்தேன். பளுதூக்குதலில் எட்டாம் வகுப்பு படிக்கும்போது ஆர்வம் வந்தது. ஆரம்பத்துல நண்பர்களுடன் உடலை வலுவேற்ற அருகிலுள்ள பிச்சையா உடற்பயிற்சிக் கழகத்திற்குச் சென்றேன். அப்படியே ஆர்வமாகி பளுதூக்குதல் பயிற்சியில் ஈடுபட்டேன். 

அங்க என் பெரியப்பா சுடலைமுத்து இருந்தாங்க. அவங்கதான் என் முதல் பயிற்சியாளர். எப்படி பளுதூக்குதல் செய்யணும், அதில் எப்படி கம்பியைப் பிடிக்கணும்னும் எல்லா நுணுக்கங்களையும் சொல்லித் தந்தாங்க. 

அங்க இரண்டு ஆண்டுகள் பயிற்சி செய்தேன். பிறகு ஹைதராபாத்தில் உள்ள ராணுவத்தின் பாய்ஸ் ஸ்போர்ட்ஸ் கம்பெனி தேர்வில் செலக்ட்டானேன். அப்புறம் அங்கிருந்து என் 15 வயதில் புனேயில் உள்ள ஏஎஸ்ஐனு சொல்லப்படும் ஆர்மி ஸ்போர்ட்ஸ் இன்ஸ்டிடியூட்டில் சேர்ந்தேன். 

ஏஎஸ்ஐயில் ஓராண்டு பயிற்சி செய்தேன். தொடர்ந்து அருணாசலபிரதேசத்தில் தேசிய அளவிலான அண்டர் 18 யூத் விளையாட்டுப் போட்டி நடந்தது. அதில் 55 கிலோ எடைப் பிரிவில் கலந்துக்கிட்டு நான்காவதாக வந்தேன். 

அப்புறம், தமிழ்நாட்டில் கேலோ இந்தியா போட்டிகள் நடந்தது. அதிலும் நான்காவதாகவே வரமுடிஞ்சது. இதன்பிறகு தீவிரமாகப் பயிற்சி செய்ய புனேவில் இருந்து பாட்டியாலாவில் என்சிஓஇனு சொல்லப்படுகிற தேசிய சிறப்பு மையத்திற்கு வந்தேன்...’’ என்கிற மகாராஜன் இதனையடுத்தே  பதக்கங்கள் வெல்ல ஆரம்பித்துள்ளார்.   

‘‘2024ம் ஆண்டு பெரு நாட்டின் லிமா நகரில் உலக இளையோர் பளுதூக்குதல் சாம்பியன்ஷிப் போட்டி நடந்தது. அங்கே நான்காவதாக வந்தேன். ஆனாலும் நம்பிக்கையை இழக்கல. அப்புறம் காமன்வெல்த் சாம்பியன்ஷிப் போட்டி ஃபிஜியில் நடந்தது. இதில் இளையோர் மற்றும் ஜூனியர் பிரிவுகளில் தங்கப்பதக்கம் வென்றேன். சீனியர் பிரிவில் வெள்ளிப் பதக்கம் ஜெயிச்சேன். 

ஆனா, ஜிம்மிற்குப் போறான்னு தெரியாது. எனக்கு ரெண்டு பசங்க இருக்காங்க. மூணு பேருமாக சேர்ந்துதான் போவாங்க. ஒருநாள் ஜிம் பயிற்சியாளர், ‘மகாராஜன், ஒருநாள்கூட லீவு போடாமல் தொடர்ச்சியாக வந்திட்டு இருக்கான். அவனுக்கு ஆர்வம் நிறைய இருக்கு. நீ சப்போர்ட் பண்ணு. சிறப்பாக வருவான்’னு சொன்னார். அதன்பிறகே நாங்க சப்போர்ட் செய்தோம்.