‘வேகம் விவேகமல்ல’... ‘ஸ்பீட் கில்ஸ்’... என எல்லா சாலைகளிலும் அரசு கொட்டை எழுத்துக்களில் போர்டு வைத்திருக்கும். ஆனால். அண்மையில் ஒன்றிய அரசு வெளியிட்டிருக்கும் 2023ம் ஆண்டுக்கான புள்ளிவிபரம், சாலை விபத்தில் இறப்பவர்களில் அதிகமானோர், ஓவர் ஸ்பீடால் மரணமடைவதாகச் சொல்கிறது. 

ஒன்றிய அரசின் குற்ற ஆவணக் காப்பகம் அண்மையில் ஓர் அறிக்கையை வெளியிட்டுள்ளது. இந்த அறிக்கை சாலை விபத்துக்கள் தொடர்பானது. அதிலும் 2023ம் ஆண்டில் நம் சாலைகளில் எத்தனை விபத்துக்கள், அதற்கான காரணம், இறந்தவர்கள், ஊனமுற்றவர்கள் என ஏகப்பட்ட புள்ளிவிபரத்தை அது வெளியிட்டிருக்கிறது. 

‘அந்த ஆண்டில் மட்டும் சுமார் 4 லட்சத்து 64 ஆயிரத்து 29 விபத்துக்கள் நிகழ்ந்துள்ளன. இதில் இறந்தவர்கள் ஒரு லட்சத்து 73 ஆயிரம் பேர். 2005ம் ஆண்டிலிருந்து சாலை விபத்துக்களின் எண்ணிக்கை வெறும் 10 சதவீதம்தான் உயர்ந்திருக்கிறது என்றாலும் விபத்தால் இறந்தவர்கள் எண்ணிக்கை 2022ம் ஆண்டை விட 1.6 சதவீதம் உயர்ந்திருக்கிறது. 

சாலை விபத்து மரணங்களுக்கு முதன்மைக் காரணம், வேகம். அதிலும் ஓவர் ஸ்பீட். இதற்கடுத்தே கவனக்குறைவு மற்றும் தவறான திசையில் செல்வது ஆகியவை வருகின்றன...’ என்று சொல்லும் அறிக்கை, மேலும் சில விவரங்களை விவரிக்கிறது.

இந்தியாவில் ஒரு சாலை எப்படி இருக்கவேண்டும் எனும் விதி ‘இண்டியன் ரோட்ஸ் காங்கிரஸ்’ எனும் அறிக்கையில் தெளிவாகக் குறிப்பிடப்பட்டுள்ளது. ஆனால், இன்று ஒரு நெடுஞ்சாலையை அமைப்பவர்கள் சாலைகளை வாகன ஓட்டிகளுக்காக மட்டுமே வடிவமைப்பு செய்கிறார்கள். 

வாகனங்கள் வேகமாகப் போகவேண்டும் எனும் ஒரே நோக்கத்துக்காக மட்டுமே நெடுஞ்சாலைகளை அமைக்கிறார்கள். ஆனால், ‘இண்டியன் ரோடு காங்கிரஸ்’ விதிப்படி ஒரு சாலை என்றால் பொதுமக்கள் இலகுவாகக் கடக்கவேண்டும், மக்கள் இலகுவாக இயங்கவேண்டும் என்பதற்காகவும் பல்வேறு முறைமைகளை வகுத்திருக்கிறது.