பாழடைந்த பள்ளி... மாணவர்களே இல்லாத ஸ்கூல்... உத்தரப்பிரதேச மாநில கிராமத்தின் தலையெழுத்தை மாற்றிய டீச்சர்!

உத்தரப்பிரதேசத்தில் உள்ள ரேபரேலி மாவட்டத்தில் அமைந்திருக்கும் ஒரு குக்கிராமம். பன்னிரெண்டு வருடங்களுக்கு முன்பு அந்தக் குக்கிராமத்தில் உள்ள ஒரு நடுநிலைப்பள்ளியில் ஆசிரியையாகப் பணிக்குச் சேர்ந்தார், சங்கீதா மௌரியா. சவால்கள் நிறைந்த ஆசிரியர் பணிக்கான தேர்வில் வெற்றியடைந்து, நல்ல வசதியான வகுப்பறை, படிப்பில் ஆர்வமுடைய மாணவர்கள் இருப்பார்கள் என்ற கற்பனையுடன் ஆசிரியைப் பணிக்குச் சேர்ந்தார். 

ஆனால், அவர் கற்பனைக்கு எதிர்மறையாக எல்லாமே இருந்தன. பணிக்குச் சேர்ந்த முதல் நாளே உடைந்து, அழ வேண்டிய சூழலுக்குத் தள்ளப்பட்டார், சங்கீதா.
ஆம்; சங்கீதா ஆசிரியையாகப் பணிபுரிவதற்கு நியமிக்கப்பட்ட பள்ளிக் கட்டடம் சிதிலமடைந்திருந்தது. மாணவர்கள் அமரும் இருக்கைகள் உடைந்து கிடந்தன. முக்கியமான வகுப்பறைகள் முழுவதும் தூசு படிந்து கிடந்தது. மாணவர்கள் யாரும் இல்லை. 

இங்கேதான் தனது ஆசிரியைப் பணி ஆரம்பிக்கப் போகிறதா என்று ஒருவித குழப்பத்துடனே பணியைத் தொடங்கினார். ஆனால், இன்று அந்தப் பள்ளியின் நிலையே வேறு. ‘‘நான் இந்தப் பள்ளியிலேயே தொடர்ந்து இருக்கவில்லை என்றால், ஆசிரியைப் பணிக்கான உண்மையான அர்த்தத்தைக் கற்றுக்கொண்டிருக்க மாட்டேன்...’’ என்கிற சங்கீதா, சமஸ்கிருதம், ஆங்கிலம், இந்திப் பாடங்களைக் கற்றுக்கொடுக்கிறார்.