அதிலும் ஆவது நடக்கிறதோ இல்லையோ அழிவது மிக நன்றாகவே நடக்கிறது.

 MMS வீடியோக்களில் துவங்கிய பிரச்னை இப்போது பலவிதமான பூதங்களாக மாறி பயமுறுத்திக் கொண்டிருக்கிறது. இதில் ஆன்லைன் அடிமையாக்கும் விளையாட்டுக்கள், மிரட்டல்கள், ஸ்காண்டல் வீடியோ, போலி ஷாப்பிங் தளங்கள், டிரேடிங், லோன் செயலிகள் என விதவிதமாக ஆன்லைனில் பணம் பறிக்கும் கும்பல்கள். 

இதோ இப்போது இன்னொரு பூதமாக சப்ஸ்கிரிப்ஷன் என்கிற பெயரில் தலைவிரித்து ஆடுகிறது. ‘காசு கட்டுங்க லைவ் ஸ்ட்ரீமில் என்னுடன் இணையுங்கள்...’ இதுதான் இந்த ஏமாற்றுக்காரர்களின் தாரக மந்திரம். 

எந்தப் படிப்பும் தேவையில்லை, பெரிய அளவில் அறிவு, முதலீடு, பொருட்செலவுகள் எதுவும் தேவையில்லை. சொந்தமாக ஒரு youtube சேனல் மற்றும் சமூக வலைதள பக்கங்கள்... அவ்வளவுதான். தினமும் காலையில் எழுந்தவுடன் முதல் கடமையாக லைவ் சேனலில் ‘‘ஹலோ ஃபிரெண்ட்ஸ்...’’ என கவர்ச்சியாக உடை அணிந்து கொண்டு மயக்கும் விதத்தில் பேசத் துவங்குவார்கள். 

‘‘தொடர்ந்து இந்த மாதிரி இன்னும் ப்ரீமியம் லைவ் ஸ்ட்ரீமில் என்னுடன் பேச வேண்டுமா... சப்ஸ்கிரைப் எடுத்துக்கோங்க. சில்வர், பிளாட்டினம், கோல்ட், டைமண்ட் வரை என்னிடம் சப்ஸ்கிரிப்ஷன் வசதிகள் உள்ளன...’’ என ஆரம்பித்து ‘‘இங்கே பேச முடியாத பல விஷயங்களை அங்கே பேசலாம்...’’ என்பார்கள். 

இந்த வலையில் வீழ்த்தப்படும் ஆண்கள் சப்ஸ்கிரைப் எடுத்துக் கொண்டு அங்கே சென்றால் முதலில் பார்த்த இலவச லைவ் வீடியோவை விட அதில் இன்னும் ஆடை குறைவாக இருக்கும். இன்னும் அடுத்தடுத்த ப்ரீமியம் சப்ஸ்கிரைப் எடுத்தால் இதைவிட அதிக சலுகைகள் கிடைக்கும் என்பர். 

அதாவது சப்ஸ்கிரிப்ஷன் பணம் அதிகரிக்க அதிகரிக்க ஆடை குறையும். பேச்சுகளும் கவர்ச்சியான நிலையில் இருந்து கொஞ்சம் கொஞ்சமாக அதிகரித்து ஆபாச நிலைக்கு செல்லும். 

இன்னொரு வகையில் ஒரு சில கல்லூரி மாணவிகள் ‘கல்லூரிக்கு பணம் கட்ட காசு இல்லை, ரூம் வாடகை கொடுக்க பணம் இல்லை, சாப்பாட்டிற்கே வழி இல்லை’ என சுகர் பேபிகளாக மாறி 40 வயதுக்கு மேல் உள்ள சுகர் டாடிகளை டார்கெட் செய்வார்கள். 

இதில் ஆச்சரியம் என்னவென்றால் திருமணமான சில தம்பதியரே இதைக் கூட்டாக சேர்ந்து செய்கிறார்கள் என்பதுதான். இவர்கள் திருமணம் செய்து கொண்டதே அல்லது சேர்ந்து வாழ்வதே இப்படியாக பணம் பறிப்பதற்காகதான் என்று சொன்னால் அதிர்ச்சியில் ஹார்ட் அட்டாக் வரும்.

இதில் முன்பு டாப் நடிகர்களுடன் நடித்த மூன்றெழுத்து நடிகையும் அடக்கம் என பகீர் கிளப்புகிறார்கள் கோலிவுட்டில் பழம் தின்று கொட்டை போட்டவர்கள். ‘‘நான் வாழ பணம் தேவை. அதற்காக யாரையும் ஏமாற்றவில்லை. 

அவர்களாக என்னைத் தேடி வருகிறார்கள். அதனால் நான் என் உடலைக் காட்டி சம்பாதிக்கிறேன்...’’இப்படி நேரடியாகவே ஒரு பேட்டியில் அந்த மூன்றெழுத்து நடிகையும் சொல்லியிருக்கிறார். இவர் மட்டுமல்ல, வாய்ப்பிழந்த சில நடிகைகள், பழம்பெரும் கவர்ச்சி மாடல்கள், வடநாட்டில் இருக்கும் பல புறநகர் கிராமத்துப் பெண்கள், பாலியல் தொழில் செய்பவர்கள், திருநங்கைகள்... என சகலரும் இப்படி சம்பாதித்துக் கொண்டிருக்கிறார்கள். 

யார் கிடைப்பார்கள் என அலையும் ஆண்களும், முன்பு ஆபாச தளங்களில் வீடியோக்கள் பார்த்துக் கொண்டிருந்த ஆண்களும்தான் இப்போது இன்னும் சுவாரசியமாக என்ன செய்யலாம் என யோசித்து எங்களிடம் சப்ஸ்கிரைப் செய்துகொண்டு வீடியோக்களைப் பார்க்கிறார்கள்...’’ என்கிறார்கள்.இந்தப் பெண்கள் அல்லது இந்தத் தம்பதிகள் தங்களை ஊருக்குள் மரியாதையான குடும்பமாக காட்டிக்கொள்ள அல்லது கௌரவமான நபராக தெரியப்படுத்த ஏதாவது ஒரு சிறிய பொட்டிக் பிசினஸ் ஆரம்பித்து நடத்திக் கொண்டிருப்பார்கள். 

இதற்கு மயங்கி கடை திறப்பு, சமூக விழாக்கள், நிகழ்ச்சிகள் என இவர்களை சிறப்பு விருந்தினர்களாக அல்லது போட்டிகளில் நீதிபதிகளாக அழைத்து மரியாதை செலுத்துபவர்களும் இருக்கிறார்கள்.

அவ்வளவு ஏன்... கல்லூரி விழாக்களுக்கு இவர்களை சிறப்பு விருந்தினர்களாக அழைத்து கெளரவிக்கும் கொடுமைகளும் அரங்கேறுகிறது.இப்படியான விருதுகளும், சிறப்பு விருந்தினர் அந்தஸ்தும்தான் இவர்களுக்கு பெரிய முதலீடு. இந்த நிகழ்வுகளில் இவர்கள் கலந்துகொள்ள வேண்டுமானால் அதற்கும் ஏகப்பட்ட கட்டுப்பாடுகளை விதிக்கிறார்கள். 

பொதுவாக இவர்கள் அதிகம் திறந்து வைப்பது சலூன் மற்றும் பியூட்டி பார்லர்கள்தான். இதற்காக வருடம்தோறும் அவர்களுக்கு சலூன் சேவைகள் முதற்கொண்டு இலவசமாக வழங்கப்படும். 

இது கூட தெரியாமல் ‘சூப்பர் பேபி’, ‘வாவ் பேபி’ என ரசிக்கிறார்கள். இப்படி ஏமாறுபவர்கள் பெரும்பாலும் 35 - 65 வயதுக்குள் இருக்கும் ஆண்கள்தான். இதில் ஏமாறும் பெண்கள் மிகக் குறைவு. அதேபோல் 15 வயது முதல் 50 வயது வரையிலும் கூட பெண்கள் இதில் சம்பாதிக்கிறார்கள் என்பது புனைவல்ல; எதார்த்தம்.