சமீபமாக இ20 எனும் எத்தனால் கலப்புப் பெட்ரோலினால் கார்களில் மைலேஜ் குறைவதாக வாடிக்கையாளர்கள் பலரும் புலம்புவதைப் பார்க்க முடிகிறது. அதுமட்டுமில்லாமல், இ20 பெட்ரோல் வண்டிகளில் சிக்கல்களை உருவாக்கிச் செலவு வைப்பதாகவும் சொல்கின்றனர். 

இந்நிலையில் ஒன்றிய சாலை போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி, இந்த ஆகஸ்ட் மாத இறுதிக்குள் பெட்ரோலில் 27 சதவீதம் எத்தனால் கலப்பதற்கான, அதாவது இ27 பெட்ரோலுக்கான வழிகாட்டுதல்களை இந்திய அரசு அறிமுகப்படுத்தும் எனத் தெரிவித்துள்ளார்.

எத்தில் ஆல்கஹால் அல்லது எத்தனால் என்பது ஓர் உயிரி எரிபொருள். ஆங்கிலத்தில் இதனை பயோஃப்யூவல் என்பார்கள். எரிதன்மை கொண்ட இந்த எத்தனால் இயற்கையாகவே கரும்பு, சோளம் மற்றும் சில உணவு தானியங்களிலிருந்து கிடைக்கின்றது. 

இதனை பெட்ரோலுடன் கலப்பதே எத்தனால் கலப்பு பெட்ரோல்.பெட்ரோல், டீசல் போன்ற எரிபொருட்களின் விலை நாளுக்கு நாள் உயர்ந்து வருவதுடன் சுற்றுச்சூழலுக்கும் அதிக பாதிப்பை உண்டாக்குகிறது. தவிர, கச்சா எண்ணெயின் ஆதாரங்கள் குறைந்து வருவதாலும், சர்வதேச சந்தை நிலவரமும் பெட்ரோல், டீசல் விலையின் உயர்வுக்குக் காரணமாக உள்ளன.

பின்னர் 2023ம் ஆண்டு 20 சதவீத எத்தனால் பெட்ரோல் திட்டம் அறிமுகப்படுத்தப்பட்டு 2030ம் ஆண்டு இந்த இலக்கை எட்டும்படி முடிவெடுத்தது. ஆனால், இந்த 2025ம் ஆண்டே அதனை எட்டிவிட்டது. இதனால், 27 சதவீத கலப்பை நோக்கி பயணிக்கத் தொடங்கியுள்ளது. கூடவே, நூறு சதவீதம் எத்தனால் எரிபொருள் என்பதை இலக்காகக் கொண்டு செயலாற்றி வருகிறது அரசு. 

மேலும் குறைந்த செலவில் பெட்ரோலுக்கு சமமான செயல்திறனையும் வழங்குகிறது. இதனாலும் எத்தனாலை நோக்கி நகர்கிறது ஒன்றிய அரசு. ஆனால், வாகனங்களில் மைலேஜைக் குறைக்கிறது என வேதனை தெரிவிக்கின்றனர் வாடிக்கையாளர்கள். 

சமீபத்தில் ஒரு வாடிக்கையாளர், தன்னுடைய காரில் முன்பு இ10 பெட்ரோல் ஆயிரம் ரூபாய்க்கு நிரப்பினால் 145 முதல் 148 கிமீ வரை மைலேஜ் கொடுத்தது என்றும், இப்போது இதே பணத்திற்கு இ20 பெட்ரோல் நிரப்பும்போது 118 கிமீ வரையே மைலேஜ் கிடைக்கிறது என்றும் சமூக வலைத்தளத்தில் பதிவிட்டுள்ளார்.

கூடுதலாக 200 ரூபாய்க்கு பெட்ரோல் நிரப்பினால்தான் 148 கிமீ தூரத்தை அடையமுடிகிறது. தற்போது தனக்கு 200 ரூபாய் பெட்ரோல் செலவு கூடுவதாகச் சொல்லியிருக்கிறார். அவர் என்றில்லை, பலரும் இந்தக் காரணத்தை முதன்மையாகக் குறிப்பிட்டுள்ளனர். இதுகுறித்து பேசும் சென்னையைச் சேர்ந்த கார் டீலர் முனிவேல், மைலேஜ் குறைவது உண்மைதான் என்கிறார்.

‘‘நான் 1998ம் மாடல் மாருதி 800 வைத்திருக்கிறேன். அப்புறம் 2012 மாடல் ஆக்டிவா டூவீலரும் வைத்திருந்தேன். இந்த இரண்டிலும் சமீபமாக சில புகார்கள் வந்தன. இதனால் கடந்த இரண்டுஆண்டுகளில் இதில் இரண்டு முறை உள்ளிருக்கும் கேஸ்கட்டை மாற்றியிருக்கிறேன். இந்தப் பிரச்னையால் என்னுடைய ஆக்டிவாவை விற்றேவிட்டேன்.

ஆனால், ஒன்றிய அரசு 2015ல் இருந்து 2025க்குள் இ10, இ15, இ20 என மூன்றுவிதமான எத்தனால் கலப்பு பெட்ரோலைக் கொண்டு வந்துவிட்டது. இதனால், கடந்த பத்தாண்டுகளுக்குள் கார் வாங்கியவர்கள் பாதிக்கப்படுகின்றனர். இந்த மாதத்தில் இ27 பெட்ரோலாக மாற்றப்போகிறோம் எனச் சொல்லியிருக்கின்றனர். 

இப்போதுதான் பலரும் இ20 பெட்ரோல் கார்களையும், பைக்குகளையும் வாங்கியுள்ளனர். ஆக, இதுவும் அடுத்து பாதிக்கப்பட வாய்ப்பிருக்கிறது. இதுக்காக ஒவ்வொருவரும் வண்டியை விற்றுக் கொண்டும், புதியதாக வாங்கிக் கொண்டும் இருக்கமுடியாது.

இந்த எத்தனால் பெட்ரோலுக்கு கார்பன் மாசு ரொம்பக் குறைவுதான். அதில் மாற்றுக் கருத்து இல்லை. ஆனால், இது பழைய வண்டிகளுக்கு பொருந்துவதில்லை. மைலேஜ் என்று பார்க்கும்போதும் கொஞ்சம் குறைவாகவே தருகிறது. 

சரி, பழைய வண்டியில் ஏதாவது மாற்றம் செய்து அரிப்பை தடுப்பதற்கான நடவடிக்கைகள் மேற்கொள்ளலாம் என்றால் அதற்கு கூடுதல் செலவாகும். அதை செய்யவும் முடியாது. ஆக, இந்தப் பிரச்னையை வாகன உற்பத்தியாளர்கள்தான் சரி செய்ய வேண்டும். அல்லது ஒன்றிய அரசு குறைந்தபட்சம் எரிெபாருளை அடிக்கடி மாற்றாமலாவது இருக்கவேண்டும்...’’ என்கிறார் ஜெயசிங் சத்யராஜ்.