பஞ்சு போன்ற இருக்கையில் அமர்ந்தபின்தான் உணர்ந்தேன்... இருக்கையில் என் உடலின் கால் பங்கு மட்டுமே பொருந்தியது. வயிற்றின் குறுக்கே ‘சீட் பெல்ட்’ பொருத்துமாறு அறிவிப்பு வந்தது.

‘7... 6... 5...’ சுற்றிலும் இருந்த காற்று வெப்ப முகமூடி அணிந்து சற்று பயமுறுத்தியது. இறுக்கமும் அதிகரித்தது. ‘4... 3...’ உறுமல் மேலும் அதிகரிக்க இருக்கைகள் அதிரத் துவங்கின. காதுகள் அடைப்பதைப் போன்ற சப்தம் எங்கிருந்தோ கீச்சிட்டது. ‘2... 1...’ இருக்கையின் அதிர்வுகளும், காற்றின் வெப்பமும், இறுக்கமும் உச்சத்தை அடைய, சீறி விண்வெளியில் பாய்ந்தது விண்கலம்.

‘செவ்வாய் கிரகத்தின் மேல் பறக்கலாம் வாங்க’ என நவீனமாக அழைத்தது ‘ஜர்னி டூ மார்ஸ்’ அரங்கம். 3-டி கண்ணாடிகள் அணிந்த ‘மினியன்’ பொம்மைகளாக நாம் அமர்ந்திருக்க... நம் கண்முன் முப்பது அடி உயர, 98 அடி அகல எல்.இ.டி திரை தன் அரைவட்ட வாய் திறந்து நிற்கிறது. ‘எவ்ளோ பெரிய திரை!’ என நாம் மிரள்வது நிச்சயம். 

நம் பாதுகாப்புக்கு சீட்பெல்ட்டும், ரோலர் கோஸ்டர் இயந்திரங்களில் காணப்படும் தடுப்புகளும் உள்ளன. நம் கால்களுக்கு கீழுள்ள தளம் முற்றிலும் விலகிச் சென்றுவிடுவதால், திரையில் தோன்றும் செவ்வாய் கிரகத்தின் மீது உண்மையாக பறப்பதைப் போன்ற பரவச உணர்வு ஏற்படுகிறது.

‘நிலவிற்கு மனிதன் முதன்முதலில் சென்றது இந்த ‘39ஏ’ ஏவுதளத்திலிருந்துதான். முதலாம் அப்பல்லோ மிஷன் தோல்வியடைந்து, ஏவுதல் ஒத்திகையின் போது மூன்று விஞ்ஞானிகள் இறந்ததும் இங்குதான்...’ என கைடு கூறியபோது, உண்மையாகவே மெய்சிலிர்த்தது. 

விண்கலத்தில் ஏதாவது கோளாறு ஏற்பட்டு விட்டால் உள்ளிருக்கும் விண்வெளி வீரர்கள் உடனடியாக வெளியேற, ‘ஜிப்லைன்’ எனப்படும் தொங்கியபடி இறங்குவதற்கான கயிறுகள் ஏவுதளத்தின் அருகே உள்ளன. வீரர்கள் விண்ணிற்கு செல்லும்முன் பத்து நாட்கள் மையத்தில் தனிமைப்படுத்தப் படுகின்றனர்.

ராக்கெட் ஏவுதலை நேரில் காண விரும்பும் பொதுமக்கள், முன்கட்டணம் செலுத்தி பார்வையாளர் அரங்கிலிருந்து காணலாம். இலவசமாக காண விரும்புபவர்கள் முதன்மை விஞ்ஞானியாக இருக்கலாம் அல்லது சுற்றியிருக்கும் குளங்களில்  முதலைகளாக இருக்கலாம்.ஏவுதளங்களை பார்வையிட்டதும் பேருந்துகள் நம்மை அப்பல்லோ வளாகத்தில் இறக்கி விடுகின்றன. 

விண்வெளி வீரர்கள் அணிந்த, நிலவின் தூசியைக் கொண்ட விண்வெளி உடைகள், நிலவுக் கற்கள், பத்து முறை வெற்றிகரமாக மனிதர்களை நிலவில் தரையிறக்கியபின், இப்போது தன் ஒய்யார ஓய்வுகாலத்தில் இருக்கும் சாட்டர்ன்5  விண்கலம் என பல்வேறு  அப்பல்லோ கண்காட்சிப் பொருட்கள் இங்கு உள்ளன.

விண்வெளியில் வீரர்கள் உட்கொள்ளும் உறைந்து உலர்த்தப்பட்ட பழங்களும், குளுகுளு கூழ் ரொட்டிகளும் விற்கப்படுகின்றன. விலை விண்ணிற்குச் செல்லாமல் தரையிலேயே இருந்தது மனதிற்கும், மணிபர்சிற்கும் சற்று இதமாக இருந்தது. 

நேரப் பற்றாக்குறையால் இங்கிருக்கும் ஐமேக்ஸ் திரையரங்கைப் பார்க்க இயலவில்லை. விஞ்ஞானியுடன் ஒரு கலந்துரையாடல், புவியீர்ப்பு விசை இல்லாமல் பறக்க பயிற்சி, செவ்வாய் கிரகத்தின் மேல் நடக்கும் சிம்முலேட்டர் என இன்னும் பல ‘வாவ்’ விஷயங்கள் உள்ளன. அதிக கட்டணத்திற்குதான்.