முயற்சி திருவினையாக்கும் என்பதற்கு சிறந்த உதாரணமாக ஜொலிக்கிறார் ராஜேஸ்வரி. அரசு பழங்குடியினர் உண்டு உறைவிடப் பள்ளியில் படித்து சென்னை ஐஐடியில் இடம் கிடைத்துள்ள முதல் மாணவி இவர்.

ஐஐடி எனப்படும் இந்தியத் தொழில்நுட்பக் கழகத்தில் படிப்பது என்பது பல மாணவர்களின் கனவு. இந்தக் கல்வி நிறுவனத்தில் சேர்வதற்கு ஜேஇஇ மெயின்ஸ் மற்றும் ஜேஇஇ அட்வான்ஸ்டு என இரண்டு கட்டங்களாக நடக்கும் தேர்வில் வெற்றி பெறவேண்டும்.

முதல்கட்டமான ஜேஇஇ மெயின்ஸை கிளியர் செய்தால்தான் இரண்டு கட்டமான அட்வான்ஸ்டுக்குத் தகுதி பெறமுடியும். இவை இரண்டிலும் தேர்ச்சி பெறுவது அவ்வளவு சுலபமானதும் அல்ல. ஜேஇஇ மெயின்ஸை கிளியர் செய்யும் சிலர், அட்வான்ஸ்டு தேர்வில் தோல்வியடைவதும் உண்டு.

ஆனால், இவை இரண்டையும் கிளியர் செய்து வெற்றி வாகை சூடியிருக்கிறார் ராஜேஸ்வரி. அதுமட்டுமல்ல. இதற்கு என்சிஇஆர்டி வெளியிடும் பாடப்புத்தகங்களை ஆழ்ந்து படிக்க வேண்டும். இதனாலேயே பலரும் ஜேஇஇ நுழைவுத்தேர்வுக்காகத் தனியாக கோச்சிங் செல்வார்கள்.

இதில் ராஜேஸ்வரியோ தமிழக அரசின் பழங்குடி நலத்துறையினர் வழங்கிய ஆன்லைன் பயிற்சி வகுப்பின் மூலமே படித்து வெற்றியை தன்வசமாக்கி இருக்கிறார். இதற்கிடையே அவரின் தந்தை புற்றுநோயால் இறந்துவிட அந்தத் துயரத்திலிருந்து மீண்டு வந்து இந்தச் சாதனையைப் படைத்திருக்கிறார்.  

இதனால்தான் தமிழக முதல்வர் மு.க.ஸ்டாலின் தன்னுடைய எக்ஸ் தளத்தில், ‘தந்தையை இழந்தாலும் அவர் கனவைத் தன் நெஞ்சில் சுமந்து நனவாக்கியிருக்கும் ராஜேஸ்வரியின் சாதனைக்கு சல்யூட்’ எனக் குறிப்பிட்டு பாராட்டி இருக்கிறார். அத்துடன் அவரின் உயர்கல்விச் செலவு மொத்தத்தையும் தமிழக அரசே ஏற்கும் எனவும் தெரிவித்திருக்கிறார்.   

இரண்டாவது அண்ணன் ஸ்ரீகணேஷ். அவர் பி.எஸ்சி கணிதம் முடிச்சிட்டு டெய்லரிங் வேலை செய்றார். அடுத்தது என் தங்கை பரமேஸ்வரி. அவங்க கருமந்துறைப் பள்ளியில் 11ம் வகுப்பு படிக்கிறாங்க. அப்பா எட்டாம் வகுப்பு வரையே படிச்சிருந்தார். 

அவருக்கு நாங்க சிறப்பாகப் படிச்சு, நல்ல வேலைக்குப் போகணும்னு ரொம்ப ஆசை. ஆனா, அவர் கடந்த ஆண்டு புற்றுநோயால் இறந்திட்டார். அப்ப எல்லோருமே துவண்டு போயிட்டோம்.

பிறகு அம்மாவும், அண்ணனும் நல்லா படிக்கணும்னு ஊக்கப்படுத்தினாங்க. நான் மேல்நிலையில் மேத்ஸ், பயாலஜி எடுத்து படிச்சேன். 11ம் வகுப்பு சேர்ந்ததுமே எஞ்சினியரிங் எடுத்து படிச்சால் நல்லா இருக்கும்னு ஆசிரியர்கள் சொன்னாங்க. 

அவங்க ஐஐடி மாதிரி பல உயர்கல்வி நிறுவனங்களைச் சுட்டிக்காட்டினாங்க. அப்படியாக எனக்கு ஐஐடியில் படிக்க ஆசை வந்தது. இதுக்காக பள்ளியில் நடத்தப்படும் ஆன்லைன் வகுப்பில் சேர்ந்து பயிற்சி எடுத்தேன். இது அரசின் பழங்குடி நலத்துறையினர் சார்பில் நடத்தப்படும் பயிற்சி.

11ம் வகுப்புல இருந்தே ஆன்லைன் வகுப்புகள் ஆரம்பமாகிடும். பிளஸ் டூ பாடங்களுடன் ஆன்லைன் வகுப்புகளிலும் கவனமாக ஊன்றி படிக்கத் தொடங்கினேன். இந்த ஆன்லைன் வகுப்புகள் தினமும் காலை, மாலைனு ஒரு மணிநேரம் நடக்கும். தமிழ், ஆங்கிலம்னு ரெண்டிலும் சொல்லித் தருவாங்க. 

சந்தேகம் வந்தால் எங்க பள்ளி ஆசிரியரிடம் கேட்டுத் தெரிஞ்சுப்போம். அதனால், படிப்பதற்கு எளிதாக இருந்தது.  அப்படியாக தொடர்ந்து படிச்சு கடந்த ஜனவரி மாசம் ஜேஇஇ மெயின்ஸ் தேர்வை கிளியர் பண்ணினேன். மெயின்ஸிற்கு மாநில அரசு புத்தகங்களே போதுமானதாக இருந்தது.

அடுத்து அட்வான்ஸ்டு தேர்வுக்குத் தயாராகணும். இதுக்காக என்சிஇஆர்டி புத்தகங்கள் எல்லாம் படிக்க ஆரம்பிச்சேன். ஆசிரியர்கள் தொடர்ந்து உதவினாங்க. இதுக்கிடையில் பிளஸ் டூ தேர்வில் 600க்கு 521 மார்க் வாங்கினேன்.பிறகு ஈரோடு பெருந்துறையில் உள்ள அரசு உண்டு உறைவிடப் பள்ளிக்குப் போய் அட்வான்ஸ்டு தேர்வுக்குப் பயிற்சி எடுத்தேன். 

இதில் கிளியர் செய்து அகில இந்திய அளவில் பழங்குடியினர் பிரிவில் 417 ரேங்க் வாங்கினேன். இப்ப சென்னை ஐஐடியில் படிக்க இடம் கிடைச்சிருப்பது ரொம்ப சந்தோஷமா இருக்கு.

இப்ப குமிழி பள்ளியில் நான் திறன் மேம்பாட்டு பயிற்சியை எடுத்திட்டு இருக்கேன். அடுத்து சென்னை ஐஐடியில் விண்வெளி பொறியியல் துறை எடுத்து படிக்க ஆசைப்படுறேன்...’’ என நம்பிக்கையுடன் நெகிழ்வாகச் சொல்கிறார் ராஜேஸ்வரி. 

 இதுகுறித்து குமிழியிலுள்ள ஏகலைவா மாதிரி உண்டு உறைவிடப் பள்ளி தலைமையாசிரியர் வெங்கடேஸ்வரனிடம் பேசினோம். ‘‘இங்க நீட், கிளாட், ஜேஇஇ, நிஃப்ட், ஐஎம்யூ, ஐசிஏஆர்னு பல உயர்கல்வி நிறுவனங்களில் சேர்வதற்கு பயிற்சிகள் வழங்கப்பட்டு வருது.