எத்தனையோ துறைகளில் நினைத்துப்பார்க்க முடியாத சாதனைகளைப் பெண்கள் நிகழ்த்தி வருகிறார்கள்.  ஆனாலும், இன்னமும் பெண்களுக்கு வசப்படாத சில துறைகளும் இருக்கத்தான் செய்கின்றன. 

அதில் ஆண்கள் மிகச் சாதாரணமாக செய்யும் சில செயல்பாடுகளும் அடக்கம். இதற்கு சிறந்த உதாரணம், உணவகங்களுக்குத் தனியாகச் சென்று உணவு அருந்துவது. ஒரு ஆண் மிகச் சுலபமாக, தனியாக அமர்ந்து சாப்பிடும் ஹோட்டல் மற்றும் ரெஸ்டாரண்டுகளில் பெண்களைத் தனியாகப் பார்த்துவிட முடியாது.

வைஷ்ணவி (கல்லூரி மாணவி): இதுவரையிலும் ஹோட்டலில்  தனியாக அமர்ந்து சாப்பிட்டதே கிடையாது. குறைந்தபட்சம் ஒரு ஃப்ரண்டையாவது கூட்டிட்டுப்போய்தான் சாப்பிடுவேன். 

என்னவோ தனியா உட்கார்ந்து சாப்பிட ஒரு மாதிரி இருக்கும். எல்லாரும் என்னையே பார்க்கற மாதிரி ஒரு உணர்வு. அப்படிப் பார்த்தா எப்படி சாப்பாடு இறங்கும். நான் வளர்ந்த சூழல் அப்படி. அதுவும் ஃப்ரெண்ட்ஸ் கூட சேர்ந்து போறது கூட குறைவுதான். ஹோட்டல் என்றாலே அப்பா, அம்மா கூட தான் போறதுண்டு.

இதோ இப்போ அடிக்கடி ஹோட்டலில் தனியா உட்கார்ந்து சாப்பிடுறேன். ஆனாலும் துவக்கத்தில் ஏற்பட்ட அந்த தயக்கத்தை இன்னமும் மறக்கவில்லை. உண்மையாகவே வெயிட்டர் கூட அவ்வளவு சுலபமா பக்கத்தில் வந்து ஆர்டர் எடுக்க மாட்டார். 

ஆனால், இப்போ அந்த தயக்கம் மாறிடுச்சு.ஆர்த்தி ( தனியார் நிறுவன ஊழியர்) : நானும் அக்காவும் தான் கம்பெனி. ஒண்ணு அக்கா என்னை கூப்பிடுவா, இல்லை நான் அவளைக் கூப்பிடுவேன். ரெண்டு பேரில் யார் ஒருவர் சொதப்பினாலும் அன்றைய பிளான் காலி. என்னமோ தனியா வந்து சாப்பிட பிடிக்காது.

முக்கியமா நாம இப்படி தனியா உக்காந்து சாப்பிடும்போது,  பையன் சாப்பிட்டானா, அவனுக்கு என்ன வாங்கிட்டு போவது, இருக்கிறவங்களுக்கு சாப்பிட என்ன செய்யறது. இப்படி நிறைய மனசுக்குள்ள ஓடிக்கிட்டு இருக்கும். நானும் அக்காவும் சேர்ந்து உட்கார்ந்து சாப்பிட்டால் கூட இரண்டு பேருடைய பேச்சும் இப்படித்தான் இருக்கும். 

வீட்ல இருக்கிறவங்களுக்கு என்ன சமைக்கிறது, இல்ல ஏதாவது வாங்கிட்டு போலாமா. இப்படித்தான் யோசிப்போம். எவ்வளவு பசியானாலும் கூட இன்னும் 15 நிமிஷம் ஆனா வீட்டுக்கு போயிடலாமே அப்படிங்கற நினைப்பிலேயே வீடு வந்து சேர்ந்திடுவேன்.

வைஷ்ணவி (தனியார் வங்கி பணியாளர்) : என்னுடைய பேங்க் வேலைகளுக்காகவே தனியா பயணிக்கிற சூழல் இருக்கும். ஆபீஸ் மீட்டிங், பேங்க் முகாம்கள், இப்படி நிறைய அவசிய தேவை இருக்கு. குடும்பத்தை விட்டு வெளியூரில்தான் வேலை செய்கிறேன். 

அப்படியான பயணத்தில் தனியா தான் சாப்பிட்டாகணும். ஆனால், தனியா உட்கார்ந்து சாப்பிடணும் என்கிறதுக்காகவே முதல்ல நல்ல ஹோட்டல் தேர்வு செய்யணும். அப்படி தேர்வு செய்து உட்கார்ந்தால்கூட அவ்வளவு சீக்கிரம் வெயிட்டர் வந்து ஆர்டர் எடுக்க மாட்டார்.

ஒருசிலர் ஏளனமாகவே பார்ப்பாங்க. போதாக் குறைக்கு இரண்டு மூன்று ஆண்களாக சேர்ந்து வந்து சரியா நம்ம டேபிள் பக்கத்துல உட்கார்ந்துகிட்டு, காதுபட கிசு கிசுப்பாங்க. இந்த தயக்கம், வித்தியாசமான பார்வை இதையெல்லாம் இப்போ கண்டுக்கறதே கிடையாது.பிரியா (பத்திரிகையாளர் , மதுரை ) : இதுக்கு காரணம் நம்ம மனநிலை இல்ல. சுற்றி இருக்கிற சூழல் கொடுக்கிற குறுகுறு பார்வைதான். 

ஏன், தியேட்டரில் உட்கார்ந்து தனியா படம் பார்க்க எவ்வளவு சங்கடமா இருக்கும் தெரியுமா. இதில் உள்ளே வரும்போது என்கூட யார் வராங்க அப்படின்னா முன்னாடி இருக்கிற கூட்டம், எனக்கு பின்னாடி வருகிற நபர் யார் என்று தேடும். ஹோட்டலுக்கு சென்றால் கூட மினி டிபன் ஆர்டர் பண்ணவே தயக்கம் இருந்துச்சு.