சிரபுஞ்சி என்றதும் மழைதான் நம் எல்லோர் மனங்களிலும் நிழலாடும். ஏனெனில், இந்தியாவில் அதிக மழை பெய்யும் ஊர் அது. ஆனால், இப்போது ஒரு உணவகத்தால் சிரபுஞ்சி கவனம் பெற்றுள்ளது.ஆம். அதன்பெயர், ‘சொஹ்ரா 1885’. ‘சொஹ்ரா’ என்பது சிரபுஞ்சியின் தற்போதைய அதிகாரபூர்வ பெயர். 

2007ம் ஆண்டு இந்தப் பெயர் மாற்றம் நடந்தது. அது தனிக்கதை. சரி, அதென்ன 1885? இதுதான் இந்தக் கஃபேயின் வரலாற்றைச் சொல்லும் முக்கியமான அம்சம். இந்தக் கஃபே இருக்கும் கட்டடம் 1885ம் ஆண்டு நிறுவப்பட்டது. 

அப்போதைய ஆங்கிலேயர் ஆட்சியில் உருவான இந்தக் கட்டடம் ஒரு பயங்கரமான தடுப்புக் காவல் மையமாக செயல்பட்டுள்ளது. இங்கே குற்றவாளிகள் சிறை வைக்கப்பட்டு கடுமையாக நடத்தப்பட்டுள்ளனர்.

பின்னர் இந்தக் கட்டடம் போலீஸ் ஸ்டேஷனாக மாறியது. இப்போது கஃபேயாக காட்சியளிக்கிறது. 140 ஆண்டுகள்பழமை வாய்ந்த இந்தக் கட்டடம் மேகாலயா மாநிலத்திலேயே மிகவும் பழமையான ஒன்று. இந்தக் கஃபே, சிறைச்சாலைக்குள் சாப்பிடும் அனுபவத்தைத் தருவதாகச் சொல்கின்றனர் சொஹ்ரா மக்கள். 

ஆனால், பரிமாறப்படும் உணவுகள் சிறைச்சாலையில் தரப்படும் உணவைப் போலல்ல என வேடிக்கையாகக் குறிப்பிடுகின்றனர்! இந்தப் பழமையான கட்டடத்தை ஒரு கஃபேயாக மாற்றும் முயற்சியை மேற்கொண்டது மாவட்ட காவல்துறைதான். அங்குள்ள கிழக்கு காசி ஹில்ஸ் மாவட்டத்தின் காவல் கண்காணிப்பாளராக இருக்கும் விவேக் சைம் என்பவர்தான் இதற்கான முதல் விதையைத் தூவியவர்.

அவரே பழமையான கட்டடத்தை அப்படியே விட்டுவிடாமல் அதில் கஃபே கொண்டு வரும் கருத்தை முன்மொழிந்தவர். அவர் இந்தப் பகுதியில் துணை கண்காணிப்பாளராக பணியாற்றிய போதே இந்த யோசனையை முன்வைத்துள்ளார். அப்போது மேகாலயா மாநில அரசு புதிய காவல் நிலையத்தை கட்ட முடிவு செய்தது. 

இந்நிலையில்தான் இந்தப் பழமையான கட்டடத்தை உணவகமாக மாற்றும் கருத்தை அவர் கூறியுள்ளார். ‘‘இதுபோன்ற பழமையான வரலாற்றைக் கொண்ட கட்டடங்கள் மேகாலயா மாநிலத்தில் அதிகளவில் இல்லை. அதனால், இந்தப் பாரம்பரிய காவல்நிலையத்தில் ஏதாவது செய்ய விரும்பினேன். அது உணவகமாக மாற்றும் எண்ணத்தை உருவாக்கியது...’’ என்கிறார் விவேக் சைம்.