இரண்டு வருடங்களில் - 2023 மற்றும் 2024ம் ஆண்டுகளில் இந்தியாவில் எழுதப் படிக்கத் தெரிந்தவர்கள் 80.9 சதவீதம் என்ற அண்மைய புள்ளிவிபரம் இந்தியர்கள் எல்லோரையும் பெருமை கொள்ள வைத்திருக்கிறது. ஆனால், ஆண் / பெண், நகரம் / கிராமம், மாநிலங்கள் என்று கணக்கிட்டால் பெரிய பாதாளமே தெரிவதாக புள்ளிவிபரத்தை ஆராய்பவர்கள் சுட்டிக் காட்டுகிறார்கள்.

இது இந்தியாவின் கல்விக்கான திட்டமிடலில் பெரிய தோல்வியை எடுத்துக் காண்பிக்கிறது என்கிறார்கள் கல்வி நிபுணர்கள்.ஒன்றிய அரசின் தேசிய மாதிரி சர்வே அலுவலகம் வருடந்தோறும் இந்தியா குறித்து பல்வேறு சர்வேக்களை செய்து பொதுவெளியில் வெளியிடுகிறது.

ஆனால், பிரதேசம், பாலினம் மற்றும் மாநிலங்களுக்கு இடையே இந்தக் கணக்கீட்டை பிரித்து மேய்ந்தால் இந்தியாவின் கல்வித் தரத்தில் ஒரு சமமின்மையைப் பார்க்கமுடியும் என்று சொல்கிறது அந்த அறிக்கை. 

இந்தியாவின் கல்வியறிவு (லிட்டரசி) 80.9 சதவீதம் என்றாலும் மிசோரம்தான் இதில் டாப் ஒன்னாக இருக்கிறது. அங்கே இது 98.2 சதவிகிதம். இரண்டாம் இடம் லட்சத்தீவு. அங்கே 97.3 சதவிகிதம். கேரளாவில் 95.3 சதவிகிதம்.

ராஜஸ்தானில் கல்வியறிவு உடைய ஆண்கள் 83.6 சதவிகிதம் என்றால் பெண்கள் 61.8 சதவிகிதம்தான். இதிலும் மத்தியப் பிரதேசத்தில் பெண்கள் கல்வியறிவு வெறும் 62.6 சதவிகிதம்தான்.

மோசமான பள்ளிக் கட்டடம், ஆசிரியர் பற்றாக்குறை, பள்ளிகளுக்கான அரசுகளின் குறைந்த முதலீடு, அத்தோடு வயதுக்கு வந்த பெண்களை திருமணம் செய்து வைத்தல்... உள்ளிட்டவை எல்லாம் பெண் கல்வியில் வடமாநிலங்களில் மண்ணை அள்ளிப் போட்டு வருகின்றன. எல்லா நாடுகளிலுமே கல்வி என்பது அடிப்படை உரிமையாக பார்க்கப்படுகிறது. 

அதற்கேற்ப அரசுகளும் திட்டங்கள் தீட்டுகின்றன. ஆனால், இந்தியாவில்தான் இதுபோன்ற பலவித பிரிவினைகளால் கல்வி பலதரப்புக்கும் போய்ச் சேராமல் இருக்கிறது. கல்வி இல்லா நாடு பாழ் என்பதை வடநாட்டுக் கல்வியாளர்கள் உணரும் காலம் விரைவில் வரும் என்று நம்புவோம்.