‘இம்சை அரசன் 23ம் புலிகேசி’ படத்தில் வடிவேலுவுக்கு இரண்டு கேரக்டர்கள். அதில் ஒன்றான புலிகேசிக்கு அவ்வப்போது புதுப் பெயர்களை சூட்டிக்கொண்டே இருப்பார்கள். 

புலிகேசியும் இந்தப் பட்டப் பெயர்களைக் கேட்ட மாத்திரத்தில் எல்லையில்லா மகிழ்ச்சி யடைந்துகொண்டிருப்பார். அப்படித்தான் அமெரிக்காவின் ஒரு புலிகேசிக்கும் புதுப் பெயர்களை உலகம் சூட்டி எள்ளல் செய்துகொண்டிருக்கிறது. அந்த புலிகேசி அமெரிக்க அதிபர் டிரம்ப்.

அப்படி லேட்டஸ்ட் ஆக அவருக்கு சூட்டப்பட்டிருக்கும் பெயர், ‘வரி நாயகன்’. நாளொரு மேனியும் பொழுதொரு வண்ணமுமாக டிரம்ப் வரி விதித்து வரும் நிலையில், அண்மையில் ஒரு குண்டை வீசி யிருக்கிறார்.

‘வெளிநாட்டில் தயாரிக்கப்படும் படங்களுக்கு 100 சதவீத வரி...’ என்பதுதான் அந்த ஏவுகணை. இதுதொடர்பான பேட்டியில் ட்ரம்ப், ஹாலிவுட் படங்கள் பல வெளிநாட்டில் தயாரிக்கப்படுவதாகவும், அப்படி தயாரிக்கப்பட்டால் அமெரிக்காவுக்கு அது பொருளாதார ரீதியாக பாதகமாக  இருக்கும் என்றும் குறிப்பிட்டிருந்தார்.

ஹாலிவுட் படங்களின் வீழ்ச்சியை அடிப்படையாக வைத்து டிரம்ப் அப்படிச் சொன்னாலும் ஹாலிவுட் தவிர்த்து வெளிநாடுகளில் இருந்து தயாரிக்கப்பட்டு அமெரிக்காவில் திரையிடப்படும் உலகப் படங்களுக்கும் இந்த 100 சதவிகித வரி விரிவாக்கப்படலாம் என்பதால் பல நாடுகள் இந்த வரிவிதிப்பால் கலக்கம் கொண்டிருக்கின்றன.

ஹாலிவுட் படங்கள் முன்பு மாதிரி வசூலிப்பதில்லை என்பது நிஜம். உண்மையில் ஹாலிவுட் படங்கள் என்றாலே மசாலா வணிகப் படங்களைத்தான் சொல்வார்கள். ஹாலிவுட் படங்கள் என்றாலே நிஜத்துக்கு தொடர்பில்லாத சினிமாக்கள் என்றே பிரபல திரைத்துறை  விமர்சகர்கள் சொல்லி வந்தார்கள்.

உதாரணமாக அமெரிக்கா, வியட்நாமில் தோற்றாலும் மீசையில் மண் ஒட்டவில்லை என்று ‘ராம்போ’ சீரிஸ் படங்களை எடுத்துத் தள்ளியது பலருக்கு நினைவிருக்கலாம். இதுமாதிரி ஆயிரக்கணக்கான படங்களை பட்டியலிடலாம் என்கிறார்கள். ஹாலிவுட் போலவே ஐரோப்பிய திரைப்படங்கள் என ஒன்று இருந்தது. இதை கலைப் படங்கள் என்று சொல்வார்கள். அல்லது உலகப் படங்கள் என்று அழைப்பார்கள். 

ஒருகாலத்தில் உலகளவில் சக்கைப்போடுபோட்ட ஹாலிவுட் மசாலாப் படங்கள், ஐரோப்பிய நாடுகளில் போய் குட்டையைக் குழப்பியது.

அமெரிக்கா மட்டுமல்லாது பல வெளிநாடுகளில் இந்தியப் படங்கள் வெளியாகின்றன. ஆனால், அந்தந்த மொழியில் இருக்கும் பெரிய ஹீரோக்களின் படங்கள்தான் பெரும்பாலும் ரிலீஸ் ஆகின்றன. எனவே ‘வரி நாயகன்’ டிரம்பின் 100 சதவீத தடை இந்தியப் படத்தை பாதிக்காது என்றே தமிழ் சினிமாத் தயாரிப்பாளரான தனஞ்செயன் கூறுகிறார்.

உதாரணமாக நானியின் ‘ஹிட்’ படம் ஒரு மில்லியன் டாலருக்கு - அதாவது இந்திய மதிப்பில் ரூ.8 ½ கோடியை சம்பாதித்திருக்கிறது. 

ஒருவேளை டிரம்ப் அமெரிக்காவில் ரிலீசாகும் எல்லா வெளிநாட்டு படங்களுக்கும் 100 சதவீத வரி விதிப்பதாகச் சொன்னால் இதனால் இந்தியப் படங்களில் - குறிப்பாக தெலுங்குப் படங்களுக்குத்தான் பெரிய பாதிப்பு ஏற்படும்.

காரணம் இந்திப் படங்களின் வருமானம் இந்தி பெல்ட்டை அடிப்படையாகக் கொண்டது. ஆனால், பிராந்தியப் படமான தெலுங்கு போன்ற படங்கள் உள்ளூரிலும் அமெரிக்காவிலும் வசூலிக்கின்றன. 

1990களில் இந்தியாவில் தாராளமயமாக்கம் அறிமுகப்படுத்தப்பட்டது ஒரு காரணம் என்றால்... கணினி துறை இதே காலத்தில் பெரும் வளர்ச்சி அடைந்தது மற்றொரு காரணம். இதனால் இந்தியாவிலே ஆந்திரப் பகுதியில் இருந்துதான் எண்ணற்ற இளைஞர்கள் அமெரிக்காவுக்கு வேலை தேடிச் சென்றார்கள். அங்கேயே இன்று குடும்பத்துடன் செட்டில் ஆகிவிட்டார்கள்.