கடந்த வாரம் தமிழகத்தில் பிளஸ் டூ பொதுத்தேர்வு முடிவுகள் வெளியாகின. இதில் மொத்தம் 95.03 சதவீதம் பேர் தேர்ச்சி பெற்றனர். இதில் சிறப்பு என்னவென்றால் கடந்த சில ஆண்டுகளாகவே தமிழகத்தின் பிளஸ் டூ தேர்ச்சி விகிதம் அதிகரித்து வருவதுதான்.

குறிப்பாக கடந்த நான்கு ஆண்டுகளில் தேர்ச்சி விகிதம் முறையே 2022ல் 93.76 சதவீதமாகவும், 2023ல் 94.03 சதவீதமாகவும், 2024ல் 94.56 சதவீதமாகவும் இருந்தது. இந்தாண்டு 95.03 சதவீதமாக அதிகரித்துள்ளது.

அதுமட்டுமல்ல. இந்தாண்டு 436 அரசு மேல்நிலைப் பள்ளிகள் நூறு சதவீதம் தேர்ச்சி பெற்றுள்ளன. கடந்த ஆண்டு நூறு சதவீதம் தேர்ச்சி பெற்ற அரசு மேல்நிலைப் பள்ளிகளின் எண்ணிக்கை 397 ஆக இருந்தது.

இதேபோல், நூறு சதவீதம் தேர்ச்சி பெற்ற மொத்த மேல்நிலைப் பள்ளிகளின் எண்ணிக்கை கடந்த ஆண்டு 2,478. இந்தாண்டு 2,638. இப்படி ஆண்டுக்கு ஆண்டு தேர்ச்சி விகிதத்தில் தமிழகம் சிறப்பான உயர்வைக் கண்டு வருகிறது. இதற்கான காரணங்கள் குறித்து பேசும் கல்வியாளர் டாக்டர் ஆர்.ராஜராஜன், முதலாவதாக தமிழ்நாடு அரசின் முன்னெடுப்பைக் குறிப்பிடுகிறார்.

‘‘முதல் விஷயம் ‘நான் முதல்வன்’ திட்டத்தைச் சொல்ல வேண்டும். ஏனெனில், முன்பு அரசுப் பள்ளி மாணவர்களுக்கு ஐஐடி, என்டிஏ பற்றியெல்லாம் தெரியாது. சமீபத்தில் நான் மாதிரி பள்ளி ஒன்றுக்கு பேசப் போயிருந்தேன். அங்கே அவர்களுக்கு நிறைய விவரங்கள் தெரிய வந்திருப்பதைப் பார்த்து மகிழ்ச்சி அடைந்தேன்.

இதற்கு ‘நான் முதல்வன்’ திட்டமே காரணம். இதன்வழியே உயர்கல்விக்கான வழிகாட்டுதல்கள் மாணவர்களுக்கு சிறப்பாக வழங்கப்பட்டு வருகின்றன. இந்தத் திட்டம் மாணவர்களின் படிப்பிற்கு ஒரு வினைஊக்கி போல் செயல்படுகிறது. பிளஸ் டூ முடித்து உயர்கல்விக்குப் போக வேண்டும் என்கிற எண்ணத்தை உண்டாக்குகிறது.  

இரண்டாவதாக ஊடகங்களைக் குறிப்பிட வேண்டும். அச்சு மற்றும் காட்சி ஊடகங்கள் பலதரப்பட்ட கல்வியாளர்களை அழைத்து பேசுகின்றன. நிறைய கோர்ஸ்கள் பற்றி விவரிக்கின்றன.

மூன்றாவதாக தமிழ்நாடு அரசின் சலுகைகள், உதவிகள் உள்ளிட்டவற்றைச் சொல்ல வேண்டும். ஏனெனில் பள்ளி மாணவர்களின் இடைநிற்றலை குறைக்க சிறப்பு ஊக்கத்தொகை, உயர்கல்வி உதவித்தொகை உள்ளிட்டவை மாணவர்களுக்கு வழங்குகிறது. இது மாணவர்களிடையே நம்பிக்கையை ஏற்படுத்தி இருக்கிறது.  

நான்காவதாக, முன்பெல்லாம் நிறைய பேர் கோயில்களுக்கு பணத்தை செலவழிப்பார்கள். அன்னதானம் செய்தல் மாதிரி செய்வார்கள். ஆனால், இப்போது கல்விக்காக உதவத் தொடங்கியுள்ளனர்.

இப்படி மக்களிடையே தன்முனைப்பு வந்துள்ளதை பார்க்கிறேன். இது முன்பு அவ்வளவாக இல்லை. சமீப ஆண்டுகளாகவே வந்துள்ளது. ஆங்காங்கே இருக்கிறவர்கள் இந்தப் பிள்ளைகளை தத்தெடுத்து படிப்பிற்கு உதவி செய்கிறார்கள். சிலர், மற்றவர்களிடம் உதவி பெற்றுக்கூட கல்விக்கு உதவுகிறார்கள். இதை மாணவர்களும் உணர்ந்து பொறுப்புணர்வுடன் படிக்கின்றனர்.

இந்த உணர்வு பெற்றோருக்கும் வந்திருக்கிறது. பள்ளிக்கூடத்திற்கு அனுப்பினால் படிக்க வேண்டும் என்கிற எண்ணம் குழந்தைகளிடம் வளரும் என நினைக்கின்றனர். மாணவர்களும் படித்தால்தான் எதிர்காலம் என்ற நிலைமைக்கு வந்துள்ளனர். ஏழாவதாக, தோல்வியுற்றவர்களை உடனே கண்டறிந்து தனித்தேர்வு மூலம் வெற்றி பெறச் செய்து இந்தாண்டே அவர்களை உயர்கல்விக்கு அழைத்துச் செல்லும் பணியையும் அரசு செய்கிறது. 

ஏற்கனவே இது இருந்தாலும் இப்போது சிறப்பாக மாறியிருக்கிறது. தமிழக முதல்வரும் சாதித்த மாணவர்களுக்கு வாழ்த்துக்கள் சொல்வதோடு தேர்ச்சியடையாத மாணவர்களையும் ஊக்குவித்து நல்வழிபடுத்துகிறார்.

விழுப்புரம் மாவட்டம் செஞ்சி அரசு மகளிர் மேல்நிலைப் பள்ளியைச் சேர்ந்த முதுகலை ஆசிரியர் கே.கே.தேவதாஸ், ஆசிரியர்களின் பார்வையிலிருந்து சில விஷயங்களைக் குறிப்பிடுகிறார்.  

அப்புறம், மாணவர்களிடையே சில பிரச்னைகள் இருந்தாலும் ஊக்கத்துடனே படிக்கின்றனர். குறிப்பாக மாணவர்களைவிட மாணவிகள் படிப்பில் ஆர்வமாக உள்ளனர். காரணம், மாணவிகள் ஏதாவது சாதிக்க வேண்டும் என நினைக்கின்றனர். அதனால் மாணவிகளின் தேர்ச்சி விகிதம் உயர்ந்து வருகிறது.  

அடுத்து மற்றொரு முக்கிய காரணம் முன்பு கிராமப்புறங்களில் உள்ள பள்ளிகளில் காலிப்பணியிடங்கள் அதிகம் இருந்தது. இதில் அரசு எடுத்த முன்னெடுப்பு என்னவெனில், பள்ளி மேனேஜ்மெண்ட் கமிட்டி வழியே தற்காலிக முதுகலை ஆசிரியர்களை நியமித்தது. இதனால் இப்போது காலிப்பணியிடங்களே அவ்வளவாகக் கிடையாது. பாடங்களும் தொய்வில்லாமல் நடக்கின்றன. இதுவும் தேர்ச்சி விகிதம் உயரக் காரணம்.