நீங்கள் சென்னையில் இருப்பவராக இருந்தால் அதிகபட்சம் 4 மணிநேரம். தமிழகத்தின் வேறு பகுதியாக இருந்தால் அதற்கேற்ற நேரத்தை கால்குலேட் செய்துகொள்ளுங்கள்.எப்படிப் பார்த்தாலும் இன்றிரவு கிளம்பினால் நாளை காலைக்குள் அடைந்துவிடலாம் புதுச்சேரியை.

எம்ஜிஆரின் ‘இதயக்கனி’ கிளைமாக்ஸ் சண்டைக்காட்சி, ‘காதலே நிம்மதி’ படத்தில் இடம்பெற்ற ‘கங்கை கங்கை நதியே...’ பாடல், ‘துப்பறிவாளன்’ படத்தில் விஷால் - வினய் மோதிக்கொள்ளும் த்ரில்லிங்கான சேசிங் காட்சி என பல புகழ்பெற்ற காட்சிகள் இங்கு படமாக்கப்பட்டிருக்கின்றன.

உலகின் இரண்டாவது பெரிய சதுப்புநிலக்காடு என்ற புகழையும் பெற்றிருக்கும் இந்த பிச்சாவரத்திற்கே டஃப் கொடுத்துக் கொண்டிருக்கிறது புதுச்சேரியின் மாங்குரோவ் போட்டிங்.அதிலும் பழங்காலத்தில் ரோமானியர்களுடன் நேரடி வர்த்தகத்தில் ஈடுபட்ட அரிக்கமேடு அகழாய்வுத் தளத்தைக் கண்டு ரசிக்கும் வகையில் இந்த படகு சவாரி அமைந்திருப்பதுதான் வெரி ஹைலைட்!

ஆமாம். கடலூர் - புதுச்சேரி தேசிய நெடுஞ்சாலையின் குறுக்காக ஏராளமான ஆறுகள் பாய்ந்து செல்கின்றன. தமிழகத்தில் உற்பத்தியாகும் சங்கராபரணி, மலட்டாறு என பல ஆறுகள் புதுச்சேரி பகுதியில் கடலில் சங்கமிக்கின்றன.

அத்தகைய ஓர் ஆறுதான் அரியாங்குப்பம் ஆறு. உப்பனாறு என அழைக்கப்படும் இந்த ஆறு புதுவை அரியாங்குப்பம் - முருங்கப்பாக்கம் பகுதிகளுக்கு இடையே பயணித்து தேங்காய்த்திட்டு பகுதியில் கடலில் கலப்பதால் அரியாங்குப்பம் ஆறு என்றும் முருங்கப்பாக்கம் ஆறு என்றும் இதை அழைக்கிறார்கள்.

கிழக்கு மேற்காக பாய்ந்து வரும் இந்த ஆறு கடலூர் நெடுஞ்சாலையைக் கடந்து சிறிது தூரம் பயணித்து வடக்குப்புறமாக வளைந்து செல்லும். இந்த வளைவுப்பகுதியின் கரைதான் அரிக்கமேடு.

சாதாரண நாட்களில் ஆட்கள் வர கொஞ்சம் தாமதம் ஆகும். சனி, ஞாயிறு மற்றும் விடுமுறை நாட்கள் என்றால் உடனுக்குடன் படகு நிறையும்.படகு நிறைந்தால் குஷியோடு ஆரம்பித்துவிடும் நமது படகுப்பயணம். 

ஆற்றின் இருபுறமும் வளர்ந்து நிற்கும் தென்னை உள்ளிட்ட நெடுமரங்கள் நாம் கேரளாவிலோ அல்லது தாய்லாந்து போன்ற வேறு ஒரு நாட்டிலோ பயணிக்கிறோம் என்ற உணர்வை நமக்கு நிச்சயம் கடத்தும். அந்த உணர்வோடு ஏறக்குறைய 20 நிமிடப் பயணத்தில் அரிக்கமேடு படகுத்துறைக்கு சென்றுவிடலாம்.

நெடுஞ்சாலையில் 10 நிமிடம் பஸ் நிற்கும் என்பது போல நமக்கு படகோட்டி ஒரு அறிவிப்பைத் தருவார். இங்குள்ள படகோட்டிகள் டூரிஸ்ட் கைடுகளாகவும் செயல்படுவார்கள். சுற்றுலா வருபவர்களில் பெரும்பான்மையானவர்கள் தமிழ் தெரியாதவர்கள் என்பதால் ஆங்கிலத்தில் அறிவிப்பைத் தருவார்.

அரிக்கமேடு குறித்த அரிய தகவல்களை நமக்கு பகிர்ந்துகொண்டே சில இடங்களைச் சுற்றிக் காட்டுவார். அரிக்கமேடு குறித்து ஏற்கனவே அறிந்து வரும் சுற்றுலாப் பயணிகள் அந்த நிலத்தின் எஞ்சிய அடையாளங்களோடு வாஞ்சையாக நின்று புகைப்படம் எடுத்து மகிழ்வதில் அலாதி ஆனந்தம் பெறுகிறார்கள்.

அரிக்கமேடு சைட் சீயிங் முடித்துவிட்டு, ஆற்றின் கரையில் நிறுத்தி வைக்கப்பட்டிருக்கும் தங்கள் படகுகளைக் கண்டுபிடித்து ஏறுவதே கொஞ்சம் சவாலான டாஸ்க்காக இருக்கும். அந்தளவுக்கு ஏராளமான படகுகள் அங்கு நிறுத்தி வைக்கப்பட்டிருக்கும். சுற்றுலாப் பயணிகளும் வரிசை கட்டி தங்கள் படகில் ஏறி இடம் பிடிப்பார்கள்.

ரோமுக்கு மணிகளுடன் சென்ற பழங்கால கப்பல் பிரயாணக் கற்பனையோடு ஆரம்பிக்கும் நமது பயணம் பிச்சாவரம் போலவே அலையாத்திக் காடுகள் நெருக்கமாக இருக்கும் பகுதிக்குச் சென்று வட்டமடித்து மீண்டும் திரும்பி வரும்.இதுவரை குஷி மற்றும் கொண்டாட்டப் பயணம். அடுத்ததாக ஆரம்பிப்பது த்ரில்லிங் பயணம்.

‘‘எங்களை நம்பி பயணிகள் வருகிறார்கள். அவர்களுக்கு த்ரில்லிங்கான அனுபவத்தைத் தரும் அதேவேளையில் பாதுகாப்புக்கும் உறுதுணையாக இருக்கிறோம்.குழந்தைகள் முதல் பெரியவர்கள் வரை அனைவருக்கும் லைஃப் ஜாக்கெட் வழங்குகிறோம். படகில் ஏறியவுடன் அதை நிச்சயம் அணிய வேண்டும்.

அரிக்கமேட்டின் சிறப்புகள் குறித்து வெளியூர்க்காரர்களுக்கு தெரிவிக்கும் நாங்கள் சுற்றுச்சூழலைப் பாதுகாப்பது குறித்தும் வலியுறுத்துகிறோம். பிளாஸ்டிக் உள்ளிட்ட பொருட்களை உள்ளே கொண்டு செல்லக்கூடாது என்பதை ஸ்ட்ரிக்டாக சொல்லிவிடுகிறோம்...’’ என்கிறார் படகு உரிமையாளரான குபேந்திரன்.

சுமார் 10 ஆண்டுகளுக்கு முன்பு கலை மற்றும் கைவினை கிராமம் அமைக்க திட்டமிட்டபோது அரியாங்குப்பம் ஆற்றில் படகு இயக்கலாம் என்ற எண்ணம் உருவானது.