கமலஹாசன், மணிரத்னம் கூட்டணி நீண்ட இடைவெளிக்குப் பிறகு இணைந்துள்ள படம் ‘தக் லைஃப்’. இருவரும் அவரவர் துறைகளில் சாதனையாளர்கள் என்பதால் படத்துக்கான எதிர்பார்ப்பு அதிகமாகியுள்ளது. அப்பா - மகன் கதை என்று சொல்லப்படும் இதில் அப்பாவாக கமலும், மகனாக சிம்புவும் நடித்திருப்பதாகச் சொல்லப்படுகிறது. 

த்ரிஷா, அபிராமி, சானியா மல்ஹோத்ரா உட்பட ஏராளமான நட்சத்திரங்கள் நடித்துள்ள இந்தப் படத்துக்கு பாலிவுட்டின் மோஸ்ட் வான்டட் கேமராமேன் ரவி கே.சந்திரன் ஒளிப்பதிவு செய்துள்ளார்.மணிரத்னம் இயக்கிய ‘கன்னத்தில் முத்தமிட்டால்’, ‘ஆய்த எழுத்து’, ‘யுவா’ போன்ற படங்களில் இணைந்து வேலை செய்தவர்.

எங்கள் ஊருக்குப் பக்கத்து ஊர் உத்திரமேரூர். 

அங்கிருந்துதான் இயக்குநர் ஸ்ரீதர் சார் வந்தார். அவர் அப்பாவும் என்னுடைய அப்பாவும் நண்பர்கள். ஸ்ரீதர் சார் ‘சிவந்த மண்’ படப்பிடிப்புக்காக ஃபாரீன் சென்றபோது அப்பாவுக்கு டிரான்சிஸ்டர் வாங்கி வந்தார். வால்வு ரேடியோ காலத்தில் டிரான்சிஸ்டர் கையில் இருப்பது பெருமையாக இருக்கும்.

மணிரத்னம் சார் ‘தக் லைஃப்’ ஆரம்பிக்கப் போகிறார்ன்னு தெரிஞ்சதும் ‘மெட்ராஸ் டாக்கீஸ்’ சிவா சாருக்கு போன் பண்ணி ‘கேமராமேன் ஃபிக்ஸ் பண்ணவில்லை என்றால் நான் ரெடியாக இருக்கிறேன். கமல் சாருடன் ‘மருதநாயகம்’ பண்ணினேன். அதன்பிறகு அவருடன் பண்ணவில்லை. 

கமல் சாரும் இடையே சில படங்களுக்குக் கூப்பிட்டபோது கால்ஷீட் இல்லாததால் மிஸ் பண்ணிட்டேன். ‘தக் லைஃப்’ல இரண்டு ஜாம்பவான்கள் இருக்கிறார்கள். யாரையும் கமிட் பண்ணவில்லைன்னா நான் ஒர்க் பண்ண ரெடி’ என்று நானே கைதூக்கினேன்.

கமல் சாருடன் ‘மருதநாயகம்’ படத்துக்காக ஒரு வருடம் டிராவல் பண்ணியிருக்கிறேன். அவருடன் எனக்கு நல்ல புரிதல் உண்டு. அவர் எதாவது புதுசா எக்யூப்மெண்ட் வாங்கிவந்தால் என்னிடம் காட்டுவார். என்னுடைய உதவியாளர்களுக்கு ‘விருமாண்டி’, ‘விஸ்வரூபம்’ போன்ற படங்கள் கொடுத்தவர். 

ரவிவர்மன், மனுஷ் நந்தன் போன்றவர்களுக்குப் படம் கொடுத்துள்ளார். என்னுடைய டீம் டெக்னிக்கலாக நாலெட்ஜ் உள்ளவர்கள் என்ற எண்ணம் அவருக்கு உண்டு. சமீபத்தில் ஒரு கேமரா வாங்கியிருந்தார். நானும் அதே கேமரா வாங்கியிருந்தேன். இருவரும் அந்த கேமராவைப் பற்றி அதிகம் பேசினோம். சினிமா உபகரணங்கள், புத்தகம் என்று எதைப் பற்றிப் பேசினாலும் அதை அவர் தெரிஞ்சு வெச்சிருப்பார். அவர் தேடலுக்கு முற்றுப்புள்ளியே கிடையாது.

ஒரு ஷாட் என்று வரும்போது கிரேன், டிராக் போடுவது, சஜஷன் ஷாட் எடுப்பது என்று சில நடைமுறை இருக்கும். அவர் படத்தில் அது இருக்காது.

‘கன்னத்தில் முத்தமிட்டால்’ படத்தில் ‘விடைகொடு...’ பாடலுக்கான சீக்வென்ஸை ஒரு வாரம் எடுப்பார் என்று நினைத்தேன். ஏனெனில், 2000 பேர் இடம் பெறும் காட்சி அது. 6 கேமரா வரவழைச்சு ஒரு நாளில் முடித்துவிட்டார். இந்த பிராசஸ் அவருடைய எல்லா படத்திலும் இருக்கும்.

சூரியன் உதிக்கும் முன் 3 ஷாட் எடுப்பார். அவர் இருக்கும்போது செட் எனர்ஜியா இருக்கும். நான் பார்த்த இளம் மணிரத்னம் அப்போது தொடங்கி இப்போது வரை மாறாமல் இருப்பது ஆச்சர்யமாக இருக்கிறது. 

மலையில் இறங்கிப் போவதாக இருந்தாலும் அவர்தான் முதலில் இறங்கிப் போவார். 69 வயதை நெருங்கியுள்ள அவரிடம் அந்தச் சுறுசுறுப்பு மாறவில்லை.

எந்த படமாக இருந்தாலும் படம் நல்லா வரணும்னு 100 சதவீத முயற்சியுடன் எடுக்கிறோம். காலையில் 4 மணிக்கு எழுந்து வேலை பார்க்கிறோம். மணி சார் காலையில் தினமும் 5 மணிக்கு படப்பிடிப்புக்கு வந்துவிடுவார். 

அவருடைய இரண்டாவது படமான ‘பகல் நிலவு’ படத்தில் என்னுடைய அண்ணன் ஒளிப்பதிவாளர். நான் உதவி ஒளிப்பதிவாளர். அப்போது பார்த்த அதே மணிரத்னத்தை இப்போதும் காம்ப்ரமைஸ் பண்ணாதவராகப் பார்க்கிறேன். தயாரிப்பு தரப்பில் பட்ஜெட் அதிகமாகும் என்று எந்த எக்யூப்மெண்டும் தரமாட்டேன்னு சொன்னதில்லை.

மாறாமல் இருந்தால் சினிமாவில் இருக்க முடியாது என்று நினைக்கிறேன். என்னை மாற்றிக்கொண்டதால் பெரிய படங்கள் ஒர்க் பண்ணுகிறேன். மாறாமல் இருந்தால் பின்தங்கி இருப்போம்.