தமிழ்நாட்டில் தற்போது ரெண்டு ருக்குகள் மாஸ் டிரெண்டிங். ஒன்று ‘ரெட்ரோ’ படத்தின் ருக்மணி (பூஜா ஹெக்டே), அடுத்து நடிகை ருக்மணி வசந்த். தமிழில் இன்னும் அறிமுகமாகவே இல்லை. அதற்குள் இணையத்தின் தாரக மந்திரமாக மாறி இருக்கிறார் ருக்மணி வசந்த். இன்ஸ்டா ரீல்ஸ், ஷார்ட்ஸ் என அத்தனையிலும் இந்தப் பொண்ணுதான் வைரல். 

விஜய் சேதுபதி நடிப்பில் வெளியாக இருக்கும் திரைப்படம் ‘ஏஸ்’. இப்படத்தின் நாயகி ருக்மணிதான். அந்தப் படத்தின் ‘உருகுது உருகுது...’ பாடல் காட்சிகள்தான் தற்போது விதவிதமான எடிட்டிங் உடன் இளையராஜா பாடல்கள், ஏ.ஆர்.ரகுமான் பாடல்கள் மிக்சிங்கில் இணையத்தில் வைரல் ஆகி வருகிறது.

அந்தப் பாடலின் இயல்பான காட்சி அமைப்பு பலரையும் கவர்ந்த நிலையில் யார் இந்தப் பெண் என தேடத் துவங்கியிருக்கிறார்கள் இணைய இளசுகள்.விஜய் சேதுபதிக்கு மட்டுமல்ல... சிவகார்த்திகேயனுக்கும் இவர்தான் ஜோடி. ஏ.ஆர்.முருகதாஸ் இயக்கத்தில் சிவகார்த்திகேயன் நடிக்கும் ‘மதராசி’ திரைப்படத்தின் நாயகி ருக்மணி வசந்த்தான். 

மேலும் ஏற்கனவே இவர் கன்னடத்தின் ‘சப்த சாகரதாச்சே இல்லோ’ - சைட் ஏ மற்றும் சைட் பி படங்களின் நாயகியாக சினிமா ரசிகர்கள் மத்தியில் மிகப் பிரபலம்.ருக்மணி வசந்த் என கூகுளில் தட்டினால் அவருக்கு முன் வந்து விழுகிறது அவருடைய அப்பா அம்மாவின் வரலாறு.

சென்ற வருடம் ‘அப்புடோ இப்புடோ எப்புடோ’ படம் மூலம் தெலுங்கிலும் அறிமுகமாகிவிட்டார். இப்போது தமிழில் அறிமுகமாவதுதான் பேலன்ஸ். ஒரே நேரத்தில் விஜய் சேதுபதி மற்றும் சிவகார்த்திகேயன் என இருவருடனும் சேர்ந்து நடித்திருக்கிறார்; அந்தப் படங்களும் விரைவில் வெளியாக இருக்கின்றன.

மிக முக்கிய தகவல்- ‘கே.ஜி.எஃப்’ புகழ் பிரசாந்த் நீல் இயக்கத்தில் ஜூனியர் என்டிஆர் நடிக்கும் 31வது படத்தின் நாயகி இவர்தான். கௌதம் தின்னனுரி இயக்கத்தில் விஜய் தேவரகொண்டா நடிப்பில் உருவாகி வரும் ‘கிங்டம்’ படத்தின் இன்னொரு நாயகியும் ருக்மணிதான்.