கல்வித்துறையில் பல்வேறு புதிய திட்டங்களைச் செயல்படுத்தி இந்தியாவில் கல்வி முன்னேற்றத்தில் தலைசிறந்த மாநிலமாக விளங்கி வருகிறது தமிழகம். சமீபத்திய அறிக்கைகளும் பள்ளிக் கல்வி மற்றும் உயர் கல்விகளில் தமிழ்நாடு சிறந்து விளங்குவதாகத் தெரிவிக்கின்றன. 

இந்நிலையில் இந்த மார்ச் ஒன்றாம் தேதி 72வது வயதில் அடியெடுத்து வைக்கும் முதல்வர் மு.க.ஸ்டாலினின் பிறந்தநாளில் அவரின் திராவிட மாடல் அரசு கல்விக்காகக் கொண்டுவந்த திட்டங்களையும், செய்த பணிகளையும் கொஞ்சம் பார்ப்போம்.

காலையில் வீட்டில் உணவு உண்ணாமலேயே பள்ளிக்கு வருகின்றனர் என்பதைப் பள்ளி நிகழ்ச்சி ஒன்றில் குழந்தைகள் கூறக் கேட்டு அறிந்த முதல்வர் மு.க.ஸ்டாலின், உடனடியாக உருவாக்கிய திட்டம்தான் இது. கடந்த 2022ம் ஆண்டு மே மாதம் சட்டமன்றத்தில் இந்தத் திட்டத்தை முதல்வர் அறிவித்தார். 

தொடர்ந்து செப்டம்பர் மாதமே செயல்பாட்டுக்கு வந்தது. தற்போது இந்தக் காலை உணவுத் திட்டத்தின் கீழ் மாநகராட்சி, நகராட்சி, ஊரக மற்றும் மலைப் பகுதிகளில் ஒன்று முதல் 5ம் வகுப்பு வரை பயிலும் அனைத்து அரசுத் தொடக்கப் பள்ளிகளைச் சேர்ந்த 18.54 லட்சம் மாணவ, மாணவியர்களும்; அரசு உதவிபெறும் தொடக்கப் பள்ளிகளைச் சேர்ந்த 2.50 லட்சம் மாணவ - மாணவியர்களும் பயனடைந்து வருகின்றனர்.

இவ்விரு திட்டங்கள் மூலம் அரசுப் பள்ளிகளில் பயிலும் சுமார் 43 லட்சத்து 89 ஆயிரம் மாணவ - மாணவியர் பயனடைவார்கள் என்பது குறிப்பிடத்தக்கது. 

இதுமட்டுமில்லாமல் அனைத்து அரசுத் தொடக்க, நடுநிலை, உயர்நிலை மற்றும் மேல்நிலைப் பள்ளிகளில் அதிவேக இணைய வசதியையும் ஏற்படுத்தித் தந்துள்ளது தமிழக அரசு.

மாற்றுத்திறன் கொண்ட மாணவர்களின் கல்வி நலனில் ஆசிரியர்கள் மனிதாபிமானத்துடன் தனி கவனம் செலுத்த வேண்டும் என்ற வகையில், ஒன்று முதல் 5 ம் வகுப்பு வரை பயிலும் அறிவுசார் குறைபாடுள்ள மாற்றுத்திறன் மாணவர்களின் அடிப்படை எண்ணறிவு மற்றும் எழுத்தறிவு திறன்களை உறுதிசெய்யும் வகையில் எளிமைப்படுத்தப்பட்ட மாணவர் பயிற்சி நூல் மற்றும் ஆசிரியர் கையேடு போன்ற கற்றல், கற்பித்தல் உபகரணங்கள் வடிவமைக்கப்பட்டு வழங்கப்பட்டுள்ளன. 

இதனுடன் தற்போது அரசுப் பள்ளிகளில் பயிலும் மாற்றுத்திறன் கொண்ட மாணவர்களைச் சிறப்புப் பயிற்றுநர்கள் மூலம் அடையாளம் காணும் வகையில் ‘நலம் நாடி’ எனும் செயலியையும் உருவாக்கியுள்ளது தமிழக அரசு.

இந்தத் திட்டத்தின்கீழ் அரசு தொடக்க, நடுநிலை, உயர்நிலை, மேல்நிலைப் பள்ளிகளின் உள்கட்டமைப்புப் பணிகளுக்கென ரூ.1,887 கோடியே 76 லட்சம் ஒதுக்கீடு செய்யப்பட்டு பணிகள் நடைபெற்று வருகின்றன.

ஊராட்சி ஒன்றிய தொடக்க, நடுநிலைப் பள்ளிகளில் உள்கட்டமைப்பு வசதிகளை மேம்படுத்தும் வகையில் 3,374 வகுப்பறை கட்டடங்களும், உயர்நிலை மற்றும் மேல்நிலைப் பள்ளிகளில் கட்டப்பட்டுள்ள 227 வகுப்பறைக் கட்டடங்களும் முதலமைச்சரால் திறந்து வைக்கப்பட்டுள்ளன.