குழந்தை நட்சத்திரமாக அறிமுகமானவர் அனிகா சுரேந்தி ரன். ‘விஸ்வாசம்’ படத்தில் அஜித் மகளாக நடித்தபிறகு தமிழர்களின் செல்ல மகளாக மாறினார். இப்போது ஸ்டைலான பருவ மங்கையாக வளர்ந்து நிற்கிறார். 

தனுஷ் இயக்கியுள்ள ‘நிலவுக்கு என்மேல் என்னடி கோபம்’ படத்தின் மூலம் தமிழில் கதாநாயகியாக அறிமுகமாகியுள்ளார். கதாநாயகி அனுபவம், 2 கே கிட்ஸ்களின் மனநிலை, விமர்சனங்கள் குறித்து அனிகா மனம் திறந்து பேசினார்.

கதாநாயகியாக என்னுடைய முதல் படம் இது. தனுஷ் சார் டைரக்‌ஷனில் நடிச்சதை ரொம்பவே சந்தோஷமாகப் பார்க்கிறேன். இப்போது வரை என்னால் நம்பவே முடியவில்லை. நல்ல டீமுடன் வேலை பார்த்தது பெரிய சந்தோஷம். அவர் டைரக்‌ஷனில் நடிச்சேன் என்பதைவிட சினிமாவை கற்றுக்கொண்டேன் என்று சொல்லலாம்.தனுஷ் சாரின் டைரக்‌ஷன் ஸ்டைலை பற்றி சொல்வதாக இருந்தால் முதலில் நம்முடைய ஸ்டைலில் பண்ணச் சொல்லுவார். 

மாற்றம் தேவைப்படுவதாக இருந்தாலோ அல்லது அவர் எதிர்பார்க்கிற மாதிரி வேண்டும் என்றாலோ நடிச்சுக்காட்டி, அதை அப்படியே  பண்ணச் சொல்வார். அதுல நம்முடைய ஸ்டைல், இம்ப்ரவைஸ் என்று எதையாவது சேர்க்கச்சொல்வார்.

படம் பார்த்து பலரும் பாராட்டினார்கள். என்னதான் நான் நல்லா நடிச்சிருந்தாலும் அதோட அடித்தளம் என்பது அவர் அமைச்சுக்கொடுத்தது.படத்துல நடிச்ச பவிஷ், பிரியா வாரியர், மாத்யூ தாமஸ் உட்பட எல்லோருமே நியூ கம்மர்ஸ். 

எங்களை சகஜநிலைக்கு கொண்டுவர அவர் சைட்ல இருந்து சாஃப்ட் அப்ரோச் இருந்துகொண்டே இருக்கும். ஒருமுறை எங்களை உற்சாகப்படுத்துவதற்காக, ‘நான் நடிக்க வந்தபோது என்னை உடனே கேமரா முன்னாடி நிக்க வெச்சு நடிக்கச் சொன்னாங்க.

வழிகாட்டுதல் இல்லை. அந்த சமயத்துல எனக்கு அது கஷ்டமா இருந்துச்சு. உங்களை நான் அப்படி பண்ணச்சொல்லமாட்டேன். நார்மலா நீங்க எப்படி பிஹேவ் பண்ணுவீங்களோ அது மாதிரி பண்ணுங்க’ன்னு சொல்லி எங்களுடைய உடல்மொழியை புரிஞ்சு அதுக்கேத்த மாதிரி கேரக்டருக்கான பெர்பாமன்ஸை வாங்கினார்.

படம் கமிட்டான முதல் நாளிலிருந்து எனக்கான ஃப்ரீடம் கொடுத்தார். எந்த இடத்திலும் அழுத்தம் கொடுத்ததில்லை. படப்பிடிப்பு துவங்குவதற்கு முன்  ஒர்க் ஷாப் நடந்துச்சு. அது யூஸ்ஃபுல்லா இருந்துச்சு.

கடின உழைப்பு, பொறுமை அவரிடமிருந்து கத்துக்க வேண்டிய இன்னொரு விஷயம். படப்பிடிப்பு, கம்போஸிங், அவர் நடிக்கும் பட வேலைகள் என   சோர்வு இல்லாம வேலை செய்தது பெரிய உத்வேகத்தைக் கொடுத்துச்சு. 

தூக்கம் இல்லன்னாலும் அப்புறம் தூங்கிக்கலாம்னு சொல்வார். எந்த இடத்திலும் அவர் டென்ஷனாகி பார்த்ததே இல்லை. சின்சியரா வேலை பார்த்தாலும் ஜாலியாவும் பழகுவார். கொஞ்சம் இறுக்கமா இருந்தாலும் அவரே அதை உடைச்சு ஜாலியா இருங்கப்பான்னு சகஜ நிலைக்கு கொண்டுவருவார்.

ப்ரொமோஷனுக்காக பல இடங்களுக்குச் செல்லும்போது ‘அஜித் சாரின் மகளா நீங்கள்’ என்று கேட்டிருக்கிறார்கள். அஜித் சார் எப்போதும் தன்னை உச்ச நட்சத்திரமாக வெளிப்படுத்தவே மாட்டார். மிகவும் எளிமையாகப் பழகுவார். இனிமையாகப் பேசுவார்.

பெரும்பாலும் நான் கமெண் ட்ஸ் படிப்பதில்லை. என்னை அறியாதவர்களின் வெற்று வார்த்தைகளை நான் ஏன் கவனிக்க வேண்டும்? பகிர்வதற்கு நல்ல விஷயம் இருந்தாலோ அல்லது நாலு பேருக்கு யூஸாகும் என்று இருந்தாலோ விமர்சனம் பண்ணலாம். இல்லைன்னா பேசாம இருப்பது மேல். 

ஆக்கபூர்வமான விமர்சனம் எப்போதும் ஆரோக்யமானது. ஆனால், ஒருவரை கீழே தள்ளி ரசிப்பதுதான் பலரின் விருப்பமாக இருக்கிறது. அப்படி இருக்கக்கூடாது. ஆக்கபூர்வமான விமர்சனம் வரும்போதுதான் பலருடைய திறமை வெளி உலகத்துக்குத் தெரியவரும்.