பொதுவாக நம்ம ஊரில் பேருந்து, இரண்டு சக்கர வாகனம், கார், ஆட்டோ, லோக்கல் மற்றும் மெட்ரோ ரயில், ஷேர் ஆட்டோ ஆகிய வாகனங்களைப் பயன்படுத்தி வேலை செய்யும் இடங்களுக்குச் செல்வார்கள். வீட்டுக்கும், அலுவலகத்துக்கும் இடையில் அதிகபட்சம் 10 அல்லது 20 கிலோ மீட்டர் தூரம்  இருப்பதாகப் பார்த்துக்கொள்வார்கள்.

இப்படி வெளியூரில் வேலை செய்வதற்காக தங்கும்போது, சொந்த ஊரையும், அங்கிருக்கும் வீட்டையும் தவறவிடுவோம். வீட்டையும், வேலையையும் சமநிலையில் வைத்திருக்க முடியாது.

‘‘எனக்கு இரண்டு குழந்தைகள். மூத்தவருக்கு வயது 12. இளைய மகளுக்கு வயது 11. இந்த வயதில் குழந்தைகளின் அருகில் அம்மா இருப்பது முக்கியம் என்று நினைத்தேன். குழந்தைகளுக்கும் அம்மாவின் தேவை அடிக்கடி இருக்கும். 

இதன் காரணமாகத்தான் தினமும் வீட்டுக்கு வந்துவிடுகிறேன். இரவில் கிடைக்கும் நேரத்தைக் குழந்தைகளுடன் செலவிடுகிறேன்...’’ என்கிற ரேச்சல், கோலாலம்பூரில் இருந்த ‘ஏர் ஆசியா’வின் அலுவலகத்துக்கு அருகிலேயே வாடகைக்கு வீடு எடுத்து தங்கியிருந்தார்.

அவரது வீட்டுக்கும், அலுவலகத்துக்கும் இடையிலான தூரம் சுமார் 350 கிலோ மீட்டர். ஆம்; தினமும் விமானம் மூலம் வேலைக்குச் சென்று வருகிறார் ரேச்சல். இந்த விமானப் பயணம் அவரது தனிப்பட்ட வாழ்க்கையையும், வேலையையும் சமநிலையில் வைத்துக்கொள்ள உதவுகிறது. அலுவலகத்துக்குச் செல்வதற்கான பயணமும், மீண்டும் வீட்டுக்குத் திரும்புவதற்கான பயணமுமே பெரிய வேலை.

 ஆம்; தினமும் அதிகாலை 4 மணிக்கே எழுந்துவிடுகிறார் ரேச்சல். 5 மணியளவில் வேலைக்குச் செல்ல தயாராகிவிடுகிறார். 5.55க் குள் விமான நிலையத்துக்குச் சென்று போர்டிங் வேலைகளை முடித்துவிட்டு, விமானம் ஏறி, 7.45க்குள் அலுவலகத்தை அடைந்துவிடுகிறார்.

ஆம்; அலுவலகத்துக்கு அருகிலிருந்த வீட்டுக்கான வாடகை; வீட்டிலிருந்து அலுவலகம் சில கிலோ மீட்டர் தூரம் இருந்தது; அதனால் அலுவலகம் செல்வதற்கான பயணச் செலவு, உணவு என செலவுகள் அதிகம். 

வீட்டிலிருந்தே வேலைக்குச் செல்வதால் ஒரு  குறிப்பிட்ட தொகையை மாதந்தோறும் சேமிப்பதாகவும் சொல்கிறார் ரேச்சல். அலுவலகத்துக்கு அருகில் தங்கியிருந்தபோது, மாதம் 42,000 ரூபாய் செலவானது. இப்போது மாதம் 28,000 ரூபாய்தான் செலவு செய்கிறார். இத்தனைக்கும் ரேச்சல் வேலை செய்யும் ‘ஏர் ஆசியா’வின் விமானத்தில்தான் பயணம் செய்கிறார். 

பயணச்சீட்டுக்கான தொகையில் நிறுவனம் எந்த சலுகையையும் தருவதில்லை. தவிர, ‘‘விமானப் பயணத்தின்போது தனக்கான நேரம் கிடைக்கிறது...’’ என்று உற்சாகமாகச் சொல்கிறார் ரேச்சல். விமானம் ஏறிய சில நிமிடங்களிலேயே தனக்கு விருப்பமான பாடல்களைக் கேட்க ஆரம்பித்துவிடுவார்.