பொதுவாக மோட்டார் ஸ்போர்ட்ஸ் என்பது ஆண்களே அதிகம் ஆதிக்கம் செலுத்தும் விளையாட்டாக இருந்து வருகிறது. ஆனால், தற்போது பெண்களும் நம்பிக்கையாக தங்கள் திறமையை பல்வேறு மோட்டார் ஸ்போர்ட்ஸ் போட்டிகளின் மூலம் நிரூபித்து வருகின்றனர்.

இதற்கு இந்தியாவில் சிறந்த உதாரணமாகத் திகழ்கிறார் மனிஷா கேல்கர். சமீபத்தில் இவர் துபாயில் நடந்த முதல் ஃபார்முலா வுமன் குளோபல் நேஷன்ஸ் கோப்பை தகுதிச் சுற்றுப் போட்டியில் வெற்றி பெற்று இறுதிப் போட்டிக்கு முன்னேறி இருக்கிறார்.

உலக அளவில் 25 நாடுகளைச் சேர்ந்த ஐம்பது பெண்கள் இந்தத் தகுதிச் சுற்றுப் போட்டியில் கலந்துகொண்டனர். இதிலிருந்து 38 பெண்கள் இறுதிப் போட்டிக்குத் தகுதிபெற்றனர். அதில் ஒருவராக மிளிர்கிறார் மனிஷா கேல்கர். 

வரும் மே மாதம் இதன் இறுதிப் போட்டி துபாயில் நடக்க இருக்கிறது. அதில் வெற்றி பெற மனிஷா கேல்கருக்கு தொடர்ந்து பாராட்டுகள் குவிந்தவண்ணம் இருக்கின்றன. கடந்த சில ஆண்டுகளாகவே மனிஷா கேல்கர், மோட்டார் ஸ்போர்ட்டில் சிறப்பாக செயல்பட்டு வருகிறார். குறிப்பாக ஃபார்முலா 4 கார் ரேஸில் கலக்குகிறார். இவர் பாலிவுட் நடிகை என்பதும் குறிப்பிடத்தக்கது.

மும்பையின் வொர்லி பகுதியில் பிறந்து வளர்ந்தவர் மனிஷா கேல்கர். தந்தை ராம் கேல்கர், திரைக்கதை ஆசிரியர். 1993ம் ஆண்டு இந்தியில் சூப்பர் டூப்பர் ஹிட் அடித்த, ‘கல்நாயக்’ படத்திற்கு திரைக்கதை எழுதியவர். அம்மா ஜீவன்கலா, நடிகை மற்றும் கதக் டான்ஸர். இந்தப் பின்புலம் அவரை சினிமா உலகிற்குள் கொண்டு சென்றது.  

ஆனால், சிறுவயதில் மனிஷாவுக்கு போர் விமானி ஆகவேண்டும் என்பதே ஆசை. இருந்தும் அப்போது பெண்களுக்கு இந்தப் பணி இருக்கவில்லை. அதனால், வேதனையுடன் அந்தக் கனவிலிருந்து வெளிவந்தவர் பள்ளி மற்றும் கல்லூரியில் படித்துக் கொண்டிருக்கும்போதே ரேஸிங்கில் ஈடுபடத் தொடங்கினார்.

‘‘ஆரம்பத்தில் நான் டிராக்கில் கார் ஓட்டுவதற்குமுன் ராஷ் டிரைவிங் எனும் அதிவேக ஓட்டுநராகவே இருந்தேன். ஆனால், ரேஸிங் டிராக்கில் நீங்கள் விதிகளைக் கடைப்பிடிக்கவில்லை என்றால் உங்களுக்கு அபராதம் விதிக்கப்படும். அதனால் என் வேகத்தைக் கட்டுப்படுத்தி அதனுள் என்னைப் பொருத்திக் கொண்டேன்...’’ என்கிறார். பின்னர் படிப்பு முடிந்ததும் சினிமாவிற்குள் நுழைந்தார். 

‘ஹயான்சா கஹி நேம் நஹி’ என்ற மராத்தி படத்தில் அறிமுகமானார். தொடர்ந்து மராத்தி படங்களிலேயே நடித்து வந்தார். இடையில், ‘லாட்டரி’ என்ற படம் மூலம் இந்தியில் அறிமுகமானார். ஆனால், இந்தப் படம் அட்டர் பிளாப் ஆனது.

‘‘நான் காரின் பின்இருக்கையில் இருந்தேன். சீட் பெல்ட் என்னை துளைத்தது. என் முதுகெலும்புகள் உடைந்தன. 13வது விலா எலும்பு உடைந்தது. எனக்கு உடனடியாக அறுவை சிகிச்சை செய்யப்பட்டது. அப்போது என் பெற்றோரோ அல்லது தெரிந்தவர்களோ யாரும் அருகில் இருக்கவில்லை. 

யார் மருத்துவமனை படிவங்களில் கையெழுத்திட்டனர் என்பதுகூட தெரியாது. நான் பல மாதங்களாக படுக்கையில் இருந்தேன். தசையை இழந்து முற்றிலும் பலவீனமானேன்...” என அந்த நாட்களை இப்போதும் திகிலுடனும் வேதனைகளுடனும் நினைவு கூர்கிறார் மனிஷா.

அப்போது இந்தியா முழுவதிலும் இருந்து சுமார் 900 பெண் ரேஸர்களிலிருந்து ஆறு பேர் தேர்ந்தெடுக்கப்பட்டனர். அதில் ஒருவராக மனிஷா கேல்கர் இருந்தார். அதாவது இந்தியாவின் முதல் முழு பெண் ஃபார்முலா எல்ஜிபி கார் பந்தய அணியில் ஒருவராக அவரும் இருந்தார்.

ஆனால், அடுத்த ஆண்டு அவரால் இந்த அணியில் இடம்பெற முடியவில்லை. இதன்பிறகு தொடர்ந்து பயிற்சியெடுத்தவர், லண்டனில் நடந்த தனது முதல் சர்வதேச பந்தயத்தில் பங்கேற்றார். அடுத்தடுத்த போட்டிகளில் நம்பிக்கையாகக் கலந்துகொண்டு தன்னை நிரூபித்தபடி இருந்தார்.

இந்நிலையில்தான் ஃபார்முலா வுமன் குளோபல் நேஷனஸ் கோப்பையின் தகுதிச் சுற்றில் வென்று இறுதிப் போட்டிக்கு அவர் முன்னேறியுள்ளார். இந்தப் போட்டி துபாயில் மே மாதம் நடக்கும்போது அங்கே 40 டிகிரி செல்சியஸ் இருக்கும் எனக் கணிக்கப்பட்டுள்ளது. இது பெண்ணான மனிஷாவிற்கு பெரிய சவாலாக இருக்கும் எனச் சொல்லப்படுகிறது.