சென்னை வாழ்க்கையில் கணவன் மனைவி இருவரும் வேலைக்கு போனால்தான் குடும்பத்தை நடத்த முடியும். அப்படித்தான் பலரும் நகர வாழ்க்கையைக் கடந்து வருகிறார்கள்.

மனைவி நிறுவனத்‌தின்‌ அட்மினிஸ்ட்ரேஷன்‌ பார்த்துக்‌கொள்ள கணவர்‌ ராஜா விவசாயம்‌ மற்றும்‌ விற்பனையை பார்த்‌துக்‌ கொள்வதால்‌ நொடிந்த நிலையில்‌ இருந்த நிறுவனத்தை இருவராலும் ஒரு நல்ல நிலைக்கு கொண்டு வர முடிந்துள்ளது. 

“பொறியியல்‌ படிப்பு... அதன்‌பிறகு எம்‌பிஏ முடிச்ச கையோடு ஐடி துறையில்‌ வேலைக்கு சேர்ந்தேன்‌. பிசினஸ்‌ என்னுடைய தளம்‌ கிடையாது. அது எப்படி செய்யணும்னு கூட எனக்கு தெரியாது.

நான்‌ இந்தத் துறைக்கு வர என்‌ மாமனாரும் மனைவி ஜெனியும்தான்‌ காரணம்‌. என்‌ மாமனார்‌ கோழிப்‌பண்ணை ஒன்றை நடத்தி வந்தார்‌. அதனால்‌ அவருக்கு பிசினசை எவ்வாறு நடத்த வேண்டும்ன்னு தெரியும். அதில் நல்ல அனுபவசாலியும் கூட. 

என் மனைவி சின்ன வயசில் இருந்தே தன் அப்பா பிசினஸ் செய்வதைப் பார்த்து வளர்ந்தவர். என் மனைவியும் பொறியியல் மற்றும் எம்பிஏ படித்துள்ளார். அவர் நிர்வாகத் துறை சார்ந்த வேலையில் இருந்தார். அதனால் அந்தத் துறையில் நல்ல அனுபவம் அவருக்கு இருந்தது.

அவர் படிக்கும் காலத்தில் இருந்தே தன் தந்தையின் பிசினசில் உதவி செய்து வந்துள்ளார். திருமணத்திற்கு முன்பு வரை நான் ஒரு தனியார் நிறுவனத்தில்தான் வேலை பார்த்து வந்தேன். அதன் பிறகு என் மாமனார் என்னிடம் ‘வேறு ஒருவரிடம் கை கட்டி வேலை பார்ப்பதற்கு நீங்க ஏன் ஒரு நிறுவனத்தை நிர்வகிக்கக் கூடாது’ன்னு கேட்டார். 

ஆரம்பத்தில் எனக்குத் தயக்கமாகத்தான் இருந்தது. பிசினஸ் பற்றி எதுவும் தெரியாமல் எப்படி அதில் கால் பதிப்பது என கொஞ்சம் பயந்தேன். ஆனால், என் மனைவியும் மாமனாரும் எனக்கு முழு ஒத்துழைப்பு தர முன்வந்ததால், பார்த்து வந்த வேலையை ராஜினாமா செய்தேன்.

ஒருவரிடம்‌ கைகட்டி மாச சம்பளம் வாங்குவதற்கு பதில்‌ நமக்காக வேலை பார்ப்பவர்களுடன்‌ சேர்ந்து நாமும் வேலை செய்ய முடிவு செய்தேன். உடனே சொந்த ஊரான கம்பத்திற்கு வந்தேன்...’’ புன்னகைக்கும் ராஜா, தனக்கு விவசாயம் குறித்த அரிச்சுவடி கூடத் தெரியாது என்கிறார். ‘‘கம்பம் முழுக்க விவசாயம்‌ சார்ந்த இடம்‌. 

எனக்கோ விவசாயம்‌ தெரியாது. அதனால்‌ ஆக்ரோ சார்ந்த தொழில்‌ செய்ய முடிவு செய்தேன்‌. அந்த சமயத்தில்‌ ஏற்‌கனவே பழச்சாறுகள்‌ மற்றும்‌ ஸ்க்வாஷ்‌ போன்ற பானங்களை தயாரித்து வந்த நிறுவனம்‌ ஒன்று நஷ்டத்தில்‌ இருப்பதால்‌ அவர்கள் தங்களின் நிறுவனத்தை விற்க இருப்பது பற்றி தெரிய வந்தது.

நான் அந்த நிறுவனத்தை மீண்டும் ஃபிரஷ்ஷாக ஆரம்பிக்க திட்டமிட்டேன். நிறுவனத்தின் நிர்வாகத்தை நானும்‌ என்‌ மனைவியும்‌ கையில்‌ எடுத்‌தோம்‌. நான்‌ ஐடி துறையில்‌ கிரைசிஸ்‌ மேனேஜ்மென்ட்‌ குறித்த வேலையில் ஈடுபட்டு வந்ததால், நஷ்டத்தில் இருக்கும் தொழிலை எவ்வாறு மீட்டு எடுக்க முடியும்ன்னு திட்டமிட ஆரம்பித்தேன்...” என் ராஜா நிறுத்த, தொடர்ந்தார்‌ அவரது மனைவி ஜெனி. 

“நாங்க வாங்கிய நிறுவனத்தில்‌ ஏற்கனவே 200 பேர்‌ வேலை பார்த்து வந்தாங்க. பொதுவாக ஒரு நிறுவனம்‌ புதிய நிர்வாகத்தின் கைக்கு மாறும்போது அங்கு வேலை பார்த்த பழைய ஊழியர்களை நீக்குவது வழக்கம். புதிய நிர்வாகம் புதிய வேலையாட்களை நியமிப்பார்கள்.

நாங்கள் அப்படிச் செய்யல. அதற்கான முதல் காரணம் அவர்கள்‌ அனைவரும்‌ அனுபவ முள்ளவர்கள்‌. மேலும்‌ பழச்சாறுகளை எவ்வாறு தயாரிக்க வேண்டும்‌ என்று தெரிந்தவர்கள்‌. எல்லோரும் ‌பெண்கள்‌ என்பதால், வேலையிலும்‌ பொறுப்பாகச் செயல்படுவார்கள்‌. 

தயாரிக்கப் போகும் பழச்சாறுகளில் சின்னச்‌சின்ன மாற்றங்களை மட்டும்‌ நான் கொண்டு வந்‌தேன்‌. பொருட்கள் தயார். அடுத்து மார்க்கெட்டிங்‌ செய்ய வேண்டும். சூப்பர் மார்க்கெட்டில் விற்பனைக்கு கொடுத்தோம். அதனைத் தொடர்ந்து சொந்தமா ஒரு அவுட்லெட்‌ போடலாம்ன்னு முடிவு செய்தோம். 

அடுத்து எங்களின் தோட்டத்தினை கூகுள் மேப்புடன் இணைத்திருக்கிறோம். அதனால் பார்வையாளர்கள் எளிதாக வந்து செல்ல முடிகிறது.

எங்க தோட்டம் சபரிமலை போகும்‌ ஹைவே சாலையில் அமைந்திருப்பதால், கோயிலுக்குச் செல்லும் பக்தர்களுக்கு அந்த சமயத்தில் அன்னதானம் செய்வோம். அவ்வாறு வரும் பக்தர்கள் இங்கு இளைப்பாறிச் செல்வார்கள். சிலர் எங்களின் பழச்சாறுகளை வாங்கியும் செல்வார்கள்.

பழங்கள்‌ மட்டுமில்லாமல்‌ பழச்சாறுகள்‌ நிரப்பக்கூடிய பாட்டில்களைக் கூட நாங்களே தயாரிக்கிறோம். நான்‌ பொறியியல்‌பட்டதாரி என்பதால்‌, பாட்டில்களைத் தயாரிக்கக் கூடிய இயந்திரம் எவ்வாறு இருக்க வேண்‌டும்‌ என்று வடிவமைத்து அதனை ரெடி செய்தேன்‌. பழச்சாறுகளைத் தொடர்ந்து பழங்களில் இருந்து வைனும் தயாரிக்கிறோம்‌. 

ஆனால், எங்களின் முக்கிய பிசினஸ் பழச்சாறுகள்‌ என்றாலும்‌ தோட்டத்திற்கு வருபவர்கள்‌ வைன்‌ குறித்து கேட்க ஆரம்பித்தார்கள்‌. அவர்களுக்காக உணவுப் பாதுகாப்புத் துறையிடம்‌ உரிமம்‌ பெற்று மது அல்லாத வைனை தயாரித்து விற்பனை செய்கிறோம்‌.

பழச்சாற்றினை - வைனை - பருகியதும் புளிப்புத் தன்மையுடன் அதைக் குடித்த உணர்வு ஏற்படுமே தவிர போதை தராது. வைனை திராட்சையில்‌ மட்டுமில்லாமல்‌ ஆப்பிள்‌, நேந்திரம்‌ பழம்‌ மற்றும்‌ அன்னாசிப் பழத்தில்‌ இருந்தும்‌ தயாரிக்கிறோம்‌. திராட்சைதான் எங்களின் மெயின் மூலப்பொருள் என்பதால், அதில் இருந்து ஊறுகாய், ஜாம், டீ போன்றவற்றை தயாரித்து வருகிறோம்.