பாலைய்யா படத்தின் ரீமேக்கா விஜய் 69?
இதுதான்... இந்த வதந்திதான் சோஷியல் மீடியா முழுக்க மட்டுமல்ல... கோலிவுட் திசைகளிலும் ஒலிக்கின்றது.‘சதுரங்க வேட்டை’, ‘தீரன் அதிகாரன் ஒன்று’, ‘துணிவு’ போன்ற மெகா ஹிட் படங்களை இயக்கிய ஹெச்.வினோத், அடுத்ததாக விஜய் நடிக்கும் - தற்காலிகமாக ‘விஜய் 69’ என பெயரிடப்பட்டிருக்கும் - படத்தை இயக்குகிறார்.  இத்திரைப்படத்தின் படப்பிடிப்பை முடித்ததும் முழுமையாக அரசியல் பக்கம் களமிறங்குவதாக அறிவித்திருக்கிறார் விஜய். படத்தில் கதாநாயகியாக பூஜா ஹெக்டே நடித்து வருகிறார். இதைத் தாண்டி ப்ரியா மணி, மமிதா பைஜு, பாபி தியோல் எனப் பல நட்சத்திரங்களும் படத்தில் நடிக்கிறார்கள்.
‘படத்தில் இந்த நட்சத்திரங்களெல்லாம் கேமியோ செய்கிறார்கள்... அனிருத் இசையில் இந்தப் பாடகர் முதல் பாடலை அதிரடியான ராப் வரிசையில் கொடுத்திருக்கிறார்...’ என பல தகவல்கள் சமூக வலைத்தளங்களில் இப்படம் தொடர்பாக அவ்வப்போது பேசப்பட்டு வருகின்றன. ஆனால், தகவல்களாக பேசப்பட்ட எந்த விஷயம் குறித்தும் தயாரிப்பு நிறுவனத்திடமிருந்து மறுத்தோ ஏற்றோ அதிகாரபூர்வ அறிவிப்பு வரவில்லை.
இந்நிலையில்தான் தலைப்பில் இருக்கும் விஷயம் காட்டுத் தீயாகப் பரவி வருகிறது.சில நாட்களுக்கு முன் ‘தளபதி 69’ படத்தின் தயாரிப்பு நிறுவனமான ‘கே.வி.என் புரொடக்ஷன்ஸ்’, பாலைய்யா நடிப்பில் தெலுங்கில் மாபெரும் வெற்றி பெற்ற ‘பகவந்த் கேசரி’ திரைப்படத்தின் ரீமேக் ரைட்ஸை வாங்கியிருப்பதாக தகவல்கள் கசிந்தன; கசிகின்றன.
‘பகவந்த் கேசரி’ பாலைய்யா நடிப்பில் கடந்தாண்டு டோலிவுட்டில் வெளியான திரைப்படம். இத்திரைப்படத்தை ரீமேக் செய்து பாலைய்யா கதாபாத்திரத்தில் விஜய் நடிப்பதாகவும் அவரின் மகளாக மமிதா பைஜு நடிப்பதாகவும் கிசுகிசுக்கிறார்கள்.
உண்மையில் இந்த ‘பகவந்த் கேசரி’ படமே ஆமிர்கான் நடிப்பில் வெற்றி பெற்ற ‘தங்கல்’ படத்தின் (தூக்கலாக) தெலுங்கு மசாலா தூவிய வெர்ஷன்தான்.இந்நிலையில், ‘அதெல்லாம் உண்மை இல்லை. ‘தளபதி 69’ படம் ‘பகவந்த் கேசரி’ படத்தின் ரீமேக் கிடையாது. அதிரடி ஆக்ஷன் படம்...’ என மறுக்கிறார்கள் படத்தைச், சேர்ந்தவர்கள்.
ஆனால், ‘பிங்க்’ இந்திப் படத்தை அஜித்தை வைத்து ‘நேர்கொண்ட பார்வை’ என ரீமேக் செய்த அனுபவம் ஹெச்.வினோத்துக்கு உண்டு. எனவே, ‘பகவந்த் கேசரி’யின் ரீமேக் ஆக ‘தளபதி 69’ இருக்கலாம் என சிலர் கற்பூரம் அடித்து சத்தியம் செய்கிறார்கள்.பார்க்கலாம்!
காம்ஸ் பாப்பா
|