நடிகை நமீதாவை தெரிந்தளவுக்கு மாற்றுப் பாலினத்தைச் சேர்ந்த நமீதா மாரிமுத்துவை பலருக்கு தெரிந்திருக்க வாய்ப்பு இல்லை. தலைநகரத்தில் பிறந்த இவர் என்ஜினியரிங் பட்டதாரி என்பதோடு உலகளவில் பல அழகிப் போட்டிகளில் கலந்து கொண்டு தேசத்துக்கு பெருமை சேர்த்தவர்.

மாடலிங், பிசினஸ் என பல்வேறு துறைகளில் கவனம் செலுத்தி வரும் இவர் சினிமாவையும் விட்டுவைக்கவில்லை. சமுத்திரக்கனி, சசிகுமார் நடித்த ‘நாடோடிகள் 2’ படத்திலிருந்து தன்னுடைய சினிமா பயணத்தை ஆரம்பித்தவர் குறுகிய காலத்தில் இருபது படங்களுக்கும் மேல் நடித்துள்ளார். தற்போது விஜய் ஆண்டனியின் ‘வள்ளிமயில்’, ‘சைலன்ட்’ உட்பட சில படங்களில் நடித்துள்ளார்.

ஒரு கட்டத்தில் வீட்டில் என்னை புரிஞ்சுக்கிட்டு ‘நீ மத்த திருநங்கைகள் மாதிரி இல்லாமல் குடும்பத்துக்கும், சமூகத்துக்கும் பெருமை சேர்க்கணும்’னு என்னை ஆதரிக்க ஆரம்பிச்சாங்க. அதிலிருந்து என்னுடைய கவனத்தை அழகிப் போட்டி, மாடலிங், சினிமா பக்கம் திருப்பினேன். 2014 லிருந்து சினிமாவில் இருக்கிறேன்.

இந்தியா சார்பாக இருமுறை உலக அழகிப் போட்டிகளில் பங்கேற்று ஜெயித்திருக்கிறேன். 2019ல் ஸ்பெயின்ல நடந்த போட்டியில் இந்தியா சார்பாக கலந்துகொண்ட முதல் திருநங்கை நான் மட்டுமே.

ரொம்ப சந்தோஷமா இருந்துச்சு. பெண்கள் மத்தியில் ‘மிஸ் யூனிவர்ஸ்’ போட்டியில் கலந்துகொள்வது கனவு மட்டுமல்ல, அது நடக்குமா என்று கூட தெரியாது. அப்படி கேள்விக்குறியுடன் இருந்த எனக்கு வாய்ப்பு கிடைச்சதோடு மட்டுமல்லாமல், ஜெயித்ததும் வாழ்நாளில் மறக்க முடியாதது.

நான் பெருமைக்காக சொல்லவில்லை. ரியாலிட்டி ஷோ, அழகிப் போட்டி என்று பல்வேறு போட்டிகளில் கலந்துகொண்ட முதல் திருநங்கை நான் மட்டுமே. ஸ்பெயின் போட்டியில் இந்தியா சார்பாக பங்கேற்ற முதல் திருநங்கை நான் மட்டுமே. மிஸ் இன்டர்நேஷனல் குயின் போட்டியில் பத்து வருடமாக தமிழ்நாட்டிலிருந்து யாரும் கலந்துகொள்ளாதபோது அதையும் முறியடிச்சேன். மிஸ் யூனிவர்ஸ்ல என்னுடைய பேர் பதிவாகியிருக்கு.

இளமையில் எந்தப் புரிதலும் இல்லாமல் இருந்தேன். எனக்கே என்ன நடக்கிறது என்று தெரியாமல் இருந்தேன். அதன்பிறகுதான் இந்த சமூகத்தில் திருநங்கைகளுக்கும் இடம் உண்டு, அவர்களுக்கும் வாழ்வாதாரம் உண்டு என்பதைத் தெரிஞ்சுக்கிட்டு என் வாழ்க்கையை எப்படி அமைச்சுக்கணும்னு ஒரு வழியை தேர்ந்தெடுத்து வாழ ஆரம்பிச்சேன்.  

ஆனால், சமூகம் எனக்கு அவ்வளவு எளிதில் இடம் கொடுக்கவில்லை. ஆரம்பத்தில் யாரும் என்னைப் புரிஞ்சுக்கல. என்னுடைய புரொஃபஷனை பார்த்து போகப் போக சமூகத்தில் வாழ இடம் கிடைச்சதோடு, என்னை செலிபிரிட்டியாகவும் பார்க்க ஆரம்பிச்சுட்டாங்க.

சின்ன வயசுலேர்ந்து டான்ஸ்ல ஆர்வம் இருந்ததால நடிகையா வரணும், மாடலிங் துறையில் சாதிக்கணும் என்ற கனவு இருந்துச்சு. ஜெயந்தி மாஸ்டர், கலா மாஸ்டரிடம் டான்ஸ் கத்துக்கிட்டேன். தனியார் டிவி நிகழ்ச்சிகளில் நடந்த பல நடனப் போட்டிகளிலும் கலந்து கொண்டு பரிசு வாங்கியிருக்கிறேன்.

பெரியவங்க சொல்வதுபோல், வாழ்க்கையில் ஓர் அடி எடுத்து வெச்சா அடுத்த அடிக்கு  வழி கிடைச்சுடும் என்பதுபோல் எனக்கான வழி கிடைக்க ஆரம்பிச்சதால சினிமாவில் என்னுடைய பயணத்தைத் தொடர முடிஞ்சது. தமிழ் சினிமாவில் இருபது படங்களுக்கு மேல் நடித்துள்ளேன்.